အာဏာသိမ်း ဒိုင်ယာရီ

ရခိုင်ပြည်နယ်မြောက်ပိုင်းမှာစစ်တပ်ကအရပ်သားယာဉ်တွေအသုံးပြုပြီးလူအင်အား၊လက်နက်အင်အားအလုံးအရင်နဲ့ဖြည့်တင်းနေလို့အေအေကသယ်ယူပိုဆောင်ရေးလမ်းကြောင်းတွေကိုစစ်ဆေးတော့မယ်လို့ကြေငြာလိုက်တယ်။အေအေကအဲ့ဒီလိုကြေငြာပြီးနောက်တစ်ရက်မှာပဲစစ်ကောင်စီကရခိုင်မြောက်ပိုင်းကအများပြည်သူရေကြောင်းသွားလာခွင့်တွေအကုန်ပိတ်ပင်လိုက်တယ်။ရခိုင်မြောက်ပိုင်းကမြစ်ချောင်းပေါများလို့ရေလမ်းခရီးကိုသာအဓိကအားထားနေရတာပါ။အခုလိုစစ်ကောင်စီကရေယာဉ်လိုင်းတွေပါအကုန်ပြေးဆွဲခွင့်ပိတ်လိုက်တော့တမြို့နဲ့တမြို့တောင်ကူးလူးဆက်သွယ်ဖို့အဆင်မပြေတော့ဘူး။ဟိုအရင်ကတည်းကစစ်ကောင်စီဟာမောင်တောမြို့မြောက်ပိုင်းကရွာတွေကိုလော့ဒေါင်းချသလိုမျိုးကူးလူးဆက်သွယ်ခွင့်ပိတ်ထားခဲ့တယ်။မောင်တောမြို့ပေါ်ကိုတောင်လွတ်လွတ်လပ်လပ်ဈေးဝယ်ခွင့်မရခဲ့ဘူး။အခုတော့အခြေအနေတွေကပိုမိုဆိုးရွားလာပြီ။စစ်ကောင်စီဟာအေအေကိုမနိုင်တော့လို့ရခိုင်ပြည်လူထုကိုအကြပ်တွေ့အောင်နီးမျိုးစုံနဲ့ကြိုးပမ်းနေတယ်။ အေအေခေါင်းဆောင်တွေကလဲရှမ်းပြည်နယ်ကမြန်မာပြည်မှာအကြီးဆုံးEAOတစ်ခုဖြစ်တဲ့UWSAနဲ့သွားရောက်တွေ့ဆုံနေတယ်။လက်ရှိရခိုင်ပြည်နယ်ကတိုက်ပွဲတွေမှာစစ်တပ်ကလေကြောင်းအသာစီးယူထားတဲ့အတွက်ထိုကိစ္စကိုဖြေရှင်းနိုင်ဖို့UWSAနဲ့သွားရောက်တွေ့ဆုံတာဖြစ်နိုင်တယ်။UWSAဆီမှာတရုတ်ကထောက်ပံထားတဲ့လေယာဉ်ပစ်လက်နက်တွေရှိနေတယ်လေ။အေအေအနေနဲ့လေကြောင်းရန်ကာကွယ်ရေးလက်နက်တွေသာရခဲ့ရင်ရခိုင်မြောက်ပိုင်းတစ်ခုလုံးကိုထိန်းချုပ်ခွင့်ရသွားနိုင်တယ်။

ဒီကာလမြန်မာပြည်မှာသေကြောင်းကြံတဲ့သူတွေအတော်များလာတယ်။အခြေခံလူတန်းစားအများစုဟာဆင်းရဲကြပ်တည်းလာကြပြီ။စားဝတ်နေရေးအတွက်ဘယ်လိုမှရုန်းကန်လို့အဆင်မပြေနိုင်တော့တဲ့အခါနောက်ဆုံးထွက်ပေါက်အနေနဲ့ကိုယ့်ကိုကိုယ်သတ်သေဖို့အထိစဉ်းစားလာကြတယ်။ဒီလိုနဲ့သေကြောင်းကြံစည်မှုတွေခပ်စိတ်စိတ်ဖြစ်ပေါ်လာတယ်။ မြန်မာပြည်မှာဟိုးအရင်အစဉ်အဆက်ကတည်းကငတ်လို့သေတဲ့သူမရှိခဲ့ဖူးဘူး။အခုတော့ငတ်လို့သေတဲ့သူတွေရှိလာခဲ့ပြီ။နိုင်ငံသားအားလုံးရဲ့တဝက်နီးပါးလောက်ဆင်းရဲမွဲတေမှုမျဉ်းအောက်ရောက်နေကြပြီ။အရင်စစ်အစိုးရခေတ်ကတောင်သုံးပုံတစ်ပုံခန့်ပဲရှိခဲ့တာပါ။အခုမင်းအောင်လှိုင်ဒုက္ခပေးလို့လူတိုင်းနီးပါးကိုယ့်အပူနဲ့ကိုယ်ဖြစ်နေကြပြီ။

ကယားပြည်နယ်၊မိုးဗြဲမြို့မှာထင်ထားတဲ့အတိုင်းစစ်ကောင်စီတပ်တွေပြန်ဆုတ်သွားပြီ။ဒါပေမယ့်စစ်တပ်ကမြို့ထဲနဲ့မြို့အနီးပတ်ဝန်းကျင်ကိုလက်နက်ကြီးတွေနဲ့ရမ်းသမ်းပစ်ခတ်နေလို့ဒေသခံပြည်သူတွေထိခုက်သေဆုံးမှုတွေရှိနေတယ်။မြို့ထဲကအိမ်ခြေတစ်ရာကျော်လဲစစ်တပ်ရန်ကြောင့်ပျက်စီးသွားတယ်။ကြာရင်မိုးဗြဲမြို့ဟာချင်းပြည်နယ်ကထန်တလန်လိုတမြို့လုံးပျက်စီးသွားနိုင်တယ်။လွိုင်ကော်နဲ့ဒီမော့ဆိုမှာလဲတိုက်ပွဲတွေတဆက်ထဲဆက်တိုက်ဖြစ်ပွားနေတယ်။ကယားပြည်နယ်ရဲ့အခြေအနေကစစ်ကောင်စီဖက်ကလဲရှေ့ဆက်မတိုးနိုင်ဘူး၊ပြည်သူ့ကာကွယ်ရေးတပ်ဖွဲ့တွေဖက်ကလဲမြို့တွေထိမသိမ်းနိုင်ပဲအီနေတယ်။ဒါပေမယ့်စစ်ကောင်စီရုံးဆိုက်ရာနေပြည်တော်နဲ့မိုင်တစ်ရာခန့်သာဝေးကွာတဲ့ဒေသတစ်ခုကိုတော်လှန်ရေးတပ်ဖွဲ့တွေကထိန်းချုပ်ထားပြီးစစ်ကောင်စီကိုဖိအားပေးထားနိုင်တယ်။  

ဒီနှစ်ရဲ့ကုလသမဂ္ဂအထွေထွေညီလာခံကတော့နီးလာပြီ။မြန်မာနိုင်ငံရဲ့ကိုယ်စားပြုမှုကိုပြန်လည်ရွှေးချယ်ရတော့မယ်။ဒီနှစ်မှာတော့ကိုယ်စားပြုမှုအတွက်မနှစ်ကလောက်ပြည်တွင်းရော၊ပြည်ပမှာပါလှုပ်ရှားမှုတွေသိပ်ရှိမနေဘူး။စစ်ကောင်စီကတော့မြန်မာနိုင်ငံကိုယ်စားပြုမှုကိုရရှိဖို့အကြောင်းမရှိဘူး။သူရဲ့သံတမာန်အရေးထွက်ပေါက်ဟာကိုဂျင်မီတို့ကိုသေဒဏ်ချမှတ်ပြီးကတည်းကအပြီးတိုင်ပိတ်ဆို့သွားခဲ့ပြီ။NUGအနေနဲ့ကလဲဒီနှစ်ထဲမှာနယ်မြေစိုးမိုးမှုတွေရရှိလာတယ်ဆိုပေမယ့်အခုထိလွတ်မြောက်နယ်မြေမရှိသေးဘူး။UNမှာNUGကမြန်မာနိုင်ငံကိုယ်စားပြုမှုရရှိဖို့ကမလွယ်သေးဘူး။အဲ့ဒီတော့ဦးကျော်မိုးထွန်းကိုပဲဆက်ခန့်ထားပြီးဒီအခြေအနေအတိုင်နောက်တစ်နှစ်ဆက်သွားလိမ့်မယ်ထင်တယ်။ပြည်တွင်းနဲ့ပြည်ပနိုင်ငံအချို့ကမြန်မာတွေကတော့ဦးကျော်မိုးထွန်းကိုပဲဆက်ခန့်ထားရေးဆန္ဒထုတ်ဖော်ပွဲတွေပြုလုပ်နေကြတယ်။ တကယ်တန်းတော့ဒီတနှစ်အတွင်းမှာUNအပါအဝင်နိုင်ငံတကာအသိုင်းအဝိုင်းကမြန်မာပြည်အရေးဘာမှထိထိရောက်ရောက်ကူညီပေးခဲ့ခြင်းမရှိပါဘူး။ပြည်သူတွေကိုယ့်အားကိုယ်ကိုးကြလို့သာဒီအခြေအနေအထိရောက်လာတာပါ။ဆက်လက်ပြီးကိုယ့်အားကိုယ်ကိုးကြရမှာပါပဲ။

၂၀၂၂ပထမလေးလပတ်စစ်တပ်ထိပ်သီးအစည်းအဝေးမှာစစ်ခေါင်းဆောင်မင်းအောင်လှိုင်ပြောကြားထားတဲ့မိန့်ခွန်းဖိုင်ပေါက်ကြားလာတယ်။ဒီနှစ်ထဲမှာစစ်တပ်ရဲ့အထိနာမှုတွေကိုသိရှိဝန်ခံထားပြီးတပ်မှုးတွေနဲ့အောက်ခြေစစ်သားတွေကိုအပြစ်ဖို့ထားတယ်။စစ်တပ်ထိပ်ပိုင်းခေါင်းဆောင်တွေသူတို့ကျရှုံးနေတာကိုသူတို့ကိုယ်တိုင်ခံစားမိလာပြီ။ဒါတောင်ဒီမိန့်ခွန်းဟာပထမလေးလပတ်အတွက်ဖြစ်ပြီးထိုကာလမှာရခိုင်မှာအေအေနဲ့တိုက်ပွဲတွေမပြင်းထန်သေးဘူး။အခုဒုတိယလေးလပတ်အတွက်ဆိုရင်စစ်တပ်ရဲ့အခြေအနေဟာပိုဆိုးလာဖို့ပဲရှိတယ်။လက်တွေ့မြေပြင်မှာလဲဒုတပ်ရင်းမှုးကိုယ်တိုင်ဦးဆောင်ပြီးတပ်ရင်းလိုက်အမိန့်ဖီဆန်မှုတွေရှိလာပြီ။ကရင်ပြည်နယ်ကတပ်ရင်းတစ်ခုမှာသတ်ကွင်းထဲစစ်ကြောင်းထိုးခိုင်းလို့မတိုက်နိုင်ဘူးဆိုပြီးလက်နက်တွေပြန်အပ်ကာဆန္ဒပြကြတယ်လို့သတင်းတွေထွက်လာတယ်။စစ်တပ်မှာအမိန့်ဖီဆန်မှုဆိုတာအကြီးလေးဆုံးပြစ်ဒဏ်ပဲ။စစ်ကောင်စီတပ်သားတွေစစ်မတိုက်ရဲတော့ဘူး။စစ်ပန်းလာကြပြီ။တပ်ပျက်နေပြီ။ဒီရက်ပိုင်းကြားရတဲ့သတင်းတွေကြောင့်ပဲစစ်တပ်ဟာတဖြည်းဖြည်းပြိုလဲလာနေပြီလို့စတင်ခံစားလာရပြီ။ဝုန်းကနဲပြိုကျဖို့ဆက်လက်တွန်းအားပေးဖို့လိုတယ်။

ရှမ်းကယားနယ်စပ်မိုးဗြဲမြို့မှာသုံးရက်ဆက်တိုက်တိုက်ပွဲတွေပြင်းထန်နေတယ်။ပြီးခဲ့တဲ့အင်္ဂါနေ့ကမိုးဗြဲမှာစစ်ကောင်စီစစ်ကြောင်းတစ်ခုကိုKNDFတွေအလစ်ဝင်တိုက်လို့အကျအဆုံးများပြီးနောက်စစ်ကောင်စီကမိုးဗြဲမြို့ကိုထိန်းချုပ်နိုင်ဖို့ပြန်လည်ကြိုးစားနေတယ်။ခြေလျင်တပ်အင်အားလေးရာခန့်၊လက်နက်ကြီးတွေ၊သံချပ်ကာကားတွေအပြင်လေကြောင်းတိုက်ခိုက်မှုတွေပါသုံးပြီးအလုံးအရင်းနဲ့ထိုးစစ်ဆင်နေလို့ကယားပြည်နယ်တော်လှန်ရေးတပ်တွေစုပေါင်းပြီးခုခံကာကွယ်နေရတယ်။စစ်ကောင်စီဖက်ကလက်နက်အင်အားသာလွန်ပေမယ့်ထုံးစံအတိုင်းအခြေအနေမကောင်းပါဘူး။သုံးရက်အတွင်းငါးဆယ်ခန့်အသေအပျောက်ရှိနေတယ်။ စစ်ကောင်စီဟာပြီးခဲ့တဲ့ဇူလိုင်လတုန်းကလဲမိုးဗြဲကိုအခုလိုပဲထိုးစစ်ဆင်သေးတယ်။အဲ့တုန်းကလဲမအောင်မြင်ခဲ့ပါဘူး။ဘယ်လောက်ပဲလက်နက်အင်အားကောင်းကောင်းအဓိကမြေပြင်မှာတိုက်ရတဲ့စစ်သည်တွေကစိတ်ဓာတ်ပျက်ပြားနေပြီ။ကယားပြည်နယ်ကိုစစ်ကြောင်းထိုးနေတဲ့တပ်မ၆၆ဆိုရင်တပ်မကြီးတစ်ခုလုံးအသေအပျောက်များလို့ဖွဲ့စည်းပုံပျက်သလောက်ဖြစ်နေတယ်။တပ်ရင်းမှုးနှစ်ဦးခန့်သာအကောင်းအတိုင်းကျန်တော့ပြီးကျန်တဲ့တပ်ရင်းမှုးသေတဲ့သူသေ၊ဒဏ်ရာရတဲ့သူရတွေဖြစ်ကုန်ပြီ။အခုတော့စစ်ကောင်စီကကယားပြည်နယ်ကတပ်မ၆၆ကိုအခြားတပ်မတစ်ခုခုနဲ့ချိန်းဖို့လုပ်နေတယ်။တနိုင်ငံလုံးမှာတိုက်ပွဲတွေဖြစ်နေတဲ့အတွက်ချိန်းစရာတပ်မလဲရှိမယ်မထင်ပါဘူး။  

ရုရှားမှာအရှေ့စီးပွားရေးဖိုရမ်လို့အမည်တပ်ထားတဲ့အစည်းအဝေးကိုမင်းအောင်လှိုင်တက်ခွင့်ရတယ်။ရုရှားရဲ့အပေါင်းအပါနိုင်ငံငါးခုလောက်သာဖိတ်ကြားထားပြီးအစည်းအဝေးလို့အမည်တပ်ထားတာပါ။အဲ့ဒီမှာမင်းအောင်လှိုင်ကရုရှားသမ္မတပူတင်နဲ့ပထမဆုံးအကြိမ်တွေ့ခွင့်ရလိုက်တယ်။ယူကရိန်းကိုကျူးကျော်နေတဲ့ပူတင်ကိုသမာသမတ်ကျတဲ့ကမ္ဘာခေါင်းဆောင်ကြီးလို့မျက်နှာချိုသွေးမြှောက်ပင့်ပြောဆိုလိုက်သေးတယ်။ တကမ္ဘာလုံးဘယ်သူမှလက်မခံတဲ့အကြမ်းဖက်စစ်ခေါင်းဆောင်မင်းအောင်လှိုင်ကိုပူတင်ကလက်ခံတွေ့ဆုံတာဟာနှုတ်ခမ်းပဲ့ချင်းမှုတ်တဲ့သဘောပဲ။ပြီးတော့တော်လှန်ရေးအတွက်သတိထားစရာပဲ။မင်းအောင်လှိုင်ဟာပူတင်ရဲ့အသိအမှတ်ပြုမှုကိုရလိုက်လို့ပြည်တွင်းမှာဖြစ်ပွားနေတဲ့လက်နက်ကိုင်တော်လှန်မှုတွေကိုနှိမ်နှင်းဖို့စစ်လက်နက်တွေအရင်ကထက်အလွယ်တကူဝယ်ယူလို့ရသွားလိမ့်မယ်။မိစ္ဆာနိုင်ငံကြီးတစ်ခုရဲ့ထောက်ခံမှုကိုရရှိသွားတဲ့အတွက်စစ်ကောင်စီဟာပိုမိုကြမ်းတမ်းလာတော့မယ်။

တော်လှန်ရေးမြန်မြန်အောင်ဖို့လိုတဲ့အကြောင်းရင်းတွေထဲမှာအမေစုကြောင့်လဲပါတယ်။အသက်၇၅နှစ်ကျော်ပြီဖြစ်တဲ့ဒေါ်အောင်ဆန်းစုကြည်ဟာအရင်လိုနေအိမ်အကျယ်ချုပ်မဟုတ်ပဲထောင်ထဲမှာပင်ပန်းဆင်းရဲစွာနေထိုင်နေရတယ်။မင်းအောင်လှိုင်ဟာအငြိုးကြီးစွာနဲ့ဒေါ်အောင်ဆန်းစုကြည်ကိုချမှတ်တဲ့ပြစ်ဒဏ်တွေမှာအလုပ်ကြမ်းတွေပါလာတယ်။ထောင်ဒဏ်စုစုပေါင်းဟာလဲအနှစ်နှစ်ဆယ်ကျော်လာပြီ။သူမဟာဘယ်လောက်ပဲခံနိုင်ရည်ရှိတယ်သမာဓိအားကောင်းတယ်ပြောပြောဒီလိုခက်ခဲကြမ်းတမ်းတဲ့အခြေအနေကြီးမှာသူမရဲ့အသက်အရွယ်ကိုလဲထည့်တွက်ရမယ်။တော်လှန်ရေးမအောင်မြင်ရင်ဒါမှမဟုတ်တော်လှန်ရေးကာလကြာရှည်နေမယ်ဆိုရင်သူမကိုမြန်မာပြည်သူတွေအသက်ရှင်လျက်ပြန်တွေ့နိုင်မယ်မထင်ဘူး။ ပြည်တွင်းမှာနောက်ဆုံးကျန်နေပြီးစစ်ကောင်စီလက်အောက်ရောက်မနေသေးသောဆက်သွယ်ရေးအော်ပရေတာတစ်ခုဖြစ်တဲ့အော်ရီဒူးတောင်စင်ကာပူကုမ္မဏီတစ်ခုကိုရောင်းချလိုက်တယ်လို့ကြေငြာလိုက်ပြီ။ထိုစင်ကာပူကုမ္မဏီဟာလဲစစ်ကောင်စီရဲ့အဆွယ်အပွားတွေပိုင်ဆိုင်နေတယ်။မြန်မာ့ဆက်သွယ်ရေးလောကတစ်ခုလုံးစစ်ကောင်စီလက်အောက်ရောက်သွားပြီ။ဖုန်းကြားဖြတ်ခိုးနားထောင်တာတွေ၊သုံးစွဲသူတွေရဲ့အချက်အလက်တွေကိုခိုးယူတာတွေစသဖြင့်လူ့အခွင့်အရေးချိုးဖောက်မှုတွေကိုပျော်ပျော်ကြီးပြုလုပ်ကြတော့မယ်။

ဒီနေ့ဟာNUGကတစ်နိုင်ငံလုံးခုခံတော်လှန်စစ်ကြေငြာတာတနှစ်ပြည့်တဲ့နေ့ပါ။ဒီတနှစ်အတွင်းစစ်ကောင်စီတပ်သားနှစ်သောင်းကျော်သေဆုံးခဲ့တယ်။တကယ့်မြေပြင်မှာဒီထက်ပိုပြီးအသေအပျောက်များနိုင်တယ်။စစ်ကောင်စီတပ်သားအသေအပျောက်စာရင်းကိုသုံးသောင်းလောက်နဲ့တွက်ပြီးစစ်တပ်ရဲ့စုစုပေါင်းအင်အားကိုခန့်မှန်းခြေသုံးသိန်းနဲ့တွက်မယ်ဆိုရင်ဒီတနှစ်အတွင်းမှာစစ်တပ်အင်အားဆယ်ရာခိုင်းနှုန်းခန့်ပြုန်းတီးသွားတဲ့သဘောပေါ့။ဖက်ဆစ်စစ်တပ်ကြီးတစ်ခုလုံးပြိုကျဖို့ဆိုရင်၃၀ရာခိုင်နှုန်းခန့်ပြုန်းတီးဖို့လိုလိမ့်မယ်။ဒါပေမယ့်တော်လှန်ရေးကာလသုံးနှစ်လောက်တော့ကြာလို့မဖြစ်ဘူး။NUGကတော့နောက်နှစ်ထဲအပြီးတိုက်မယ်လို့ပြောတာပဲ။လာမယ့်နှစ်အတွက်တော်လှန်ရေးရံပုံငွေဒေါ်လာသန်းသုံးရာခန့်လို့အပ်နေတယ်ပြောသွားသေးတယ်။အခုဒီတနှစ်အတွင်းနည်းလမ်းပေါင်းစုံနဲ့ရှာဖွေနေတာတောင်ဒေါ်လာသန်းတစ်ရာခန့်သာရရှိသေးပြီးသူတို့ပြောတဲ့သန်းသုံးရာရဖို့ကတော့တကယ်မလွယ်ပါဘူး။ထိုငွေတွေအားလုံးကပြည်သူဆီကလာတာဖြစ်ပြီးပြည်တွင်းပြည်ပကပြည်သူတွေလဲကူရလွန်းလို့ပန်းနေပြီ။ပြည်ပအကူအညီတစ်ခုခုရရင်ပိုပြီးအဆင်ပြေနိုင်တယ်။ နောက်တစ်ခုကဒီတနှစ်အတွင်းမှာပြည်သူ့ကာကွယ်ရေးတပ်သားတွေဘက်က၁၅၀၀ကျော်ကျဆုံးခဲ့တယ်။စစ်တပ်ကသာအာဏာမသိမ်းခဲ့ရင်နိုင်ငံအတွက်အားကိုးရမယ့်လူငယ်လူရွယ်လေးတွေဒီလောက်အများကြီးကြွေလွင့်စရာအကြောင်းမရှိဘူး။ဒါတောင်စစ်တပ်ရဲ့မတရားဖမ်းဆီးပစ်ခတ်သတ်ဖြတ်မှုကြောင့်သေဆုံးသွားတဲ့ပြည်သူတွေစာရင်းထဲမှာမပါသေးဘူး။ဒါတွေကြောင့်တော်လှန်ရေးမြန်မြန်နိုင်ဖို့လိုတယ်။

မြန်မာနိုင်ငံဆိုင်ရာအထူးအကြံပေးကောင်စီအဖွဲ့(SACM)ဆိုတာရှိပါတယ်။ထိုအဖွဲ့ကမနေ့ကအစီရင်ခံစာတစ်စောင်ထုတ်ပြန်လိုက်တယ်။အဲ့ဒီအစီရင်ခံစာကစစ်ကောင်စီဟာမြန်မာနိုင်ငံကိုဘယ်လောက်ထိထိန်းချုပ်ထားနိုင်လဲဆိုတာဆန်းစစ်ထားတယ်။တနိုင်ငံလုံးမြို့နယ်ပေါင်း၃၃၀မှာ၇၂မြို့နယ်ကိုစစ်ကောင်စီကထိန်းချုပ်ထားနိုင်တယ်။ရာခိုင်နှုန်းအားဖြင့်၂၂ရာခိုင်နှုန်းမျှသာဖြစ်တယ်။အရင်လတွေကတည်းကNUGဟာတနိုင်ငံလုံးရဲ့၅၀ရာခိုင်နှုန်းကိုထိန်းချုပ်ထားနိုင်တယ်လို့ထုတ်ပြန်ထားသေးတယ်။ဒါဟာစစ်ကောင်စီဘယ်လောက်ကျဆုံးနေလဲဆိုတာပြသနေတဲ့အချက်အလက်တွေပါပဲ။ဒီလထဲမှာကျင်းပမယ့်ကုလသမဂ္ဂအထွေထွေညီလာခံမတိုင်မီဒီအစီရင်ခံစာထွက်လာတာစိတ်ဝင်စားဖို့ကောင်းတယ်။ကုလညီလာခံမှာNUGကိုမြန်မာနိုင်ငံရဲ့တရားဝင်အစိုးရလို့သတ်မှတ်လိုက်ရင်တော့အတိုင်းထက်အလွန်ပေါ့။ ကုလသံအမတ်နိုလင်းဟေဇာကတော့ဒေါ်အောင်ဆန်းစုကြည်နဲ့တွေ့ခွင့်ရမှနောက်တစ်ခေါက်မြန်မာနိုင်ငံကိုပြန်လာတော့မယ်တဲ့။စစ်ကောင်စီကသူ့ကိုအသုံးချသွားမှန်းသဘောပေါက်သွားပြီ။ပြည်တွင်းမှာလဲသူမရဲ့ရာထူးဟာအသုံးမဝင်လို့ဖျက်သိမ်းဖို့အထိပြောဆိုနေကြတယ်။ဘယ်လိုပဲဖြစ်ဖြစ်ကုလသမဂ္ဂအနေနဲ့မြန်မာပြည်သူတွေကိုမကူညီနိုင်ရင်တောင်မှစစ်အုပ်စုရဲ့အပျော့ဆွဲဆွဲမှုတွေနောက်ပါမသွားဖို့လိုတယ်။