Military Coup Myanmar

စစ်ကောင်စီဟာသူတို့ဘက်လက်နက်ချတဲ့သူတွေကိုမက်လုံးတစ်ခုပေးလိုက်ပြီ။လက်နက်နဲ့တကွသူတို့ဘက်ကိုပြန်လာရင်လက်နက်အမျိုးအစားပေါ်မူတည်ပြီးဆုငွေတွေပေးမယ်လို့သတင်းထုတ်ပြန်လိုက်တယ်။ရိုင်ဖယ်တလက်ကိုသိန်းငါးဆယ်ကစပြီးပစ္စတို၊လက်လုပ်သေနတ်၊လမ်းလျှောက်စကားပြောစက်တွေအတွက်ဆုငွေအမျိုးမျိုးပေးမယ်လို့မက်လုံးပေးထားတယ်။ သူတို့ဘယ်လိုမက်လုံးပေးပါစေ၊လက်နက်လာအပ်မယ့်တော်လှန်ရေးအဖွဲ့အဝင်တစ်ဦးတစ်ယောက်မှရှိမှာမဟုတ်ဘူး။တော်လှန်ရေးအဖွဲ့တွေကလူတိုင်းဟာပြင်းထန်တဲ့ခံယူချက်တွေနဲ့တိုက်ပွဲဝင်နေကြတာဆိုတော့ငွေဘယ်လောက်များနေပါစေမက်လုံပေးလဲအလကားပါပဲ။ပြီးတော့စစ်ကောင်စီဆိုတာယုံရတာမှာမဟုတ်တာ။တစ်ဦးတစ်လေလောက်များစိတ်ပြောင်းပြီးလက်နက်သွားအပ်ရင်တောင်မှဆုကြေးရမှာမဟုတ်ပဲစစ်ကြောရေးရောက်သွားဖို့သာပိုနီးစပ်နေတယ်။စစ်အုပ်စုဟာသူတို့ရဲ့ဉာဏ်တထွာတမိုက်လောက်နဲ့တော်လှန်ရေးကိုသွေးခွဲဖို့ကြိုးစားနေတယ်။

ပဲခူးတိုင်း၊ထန်းတပင်မြို့နယ်ညောင်ပင်သာရွာမှာကလေးငယ်၇ဦးအပါအဝင်စုစုပေါင်းဒေသခံ၁၈ဦးကိုစစ်သူပုန်တွေကဖမ်းဆီးပြီးမီးရှို့သတ်ဖြတ်သွားပါတယ်။ကလေးငယ်တွေထဲမှာခြောက်နှစ်အရွယ်ကလေးငယ်တစ်ယောက်ပါပါဝင်တယ်။ ထိုရွာအနီးမှာPDFတွေနဲ့စစ်သူပုန်တွေအကြားတိုက်ပွဲတွေဖြစ်ပွားခဲ့တယ်။အကြိမ်ကြိမ်မိုင်းဆွဲတိုက်ခိုက်ခံရပြီးစစ်သူပုန်၃၀ခန့်အကျအဆုံးတွေရှိခဲ့တယ်။ထိုတိုက်ပွဲတွေပြီးနောက်စစ်သူပုန်တွေကလက်စားချေတဲ့အနေနဲ့မဆိုင်တဲ့အရပ်သားပြည်သူရွာသားတွေကိုသတ်ဖြတ်သွားတာပဲ။ ပဲခူးတိုင်းအတွင်းမှာအရင်ကတည်းကစစ်တပ်ဖက်ကစစ်ကြောင်းထိုးတာတွေရှိခဲ့ပေမယ့်အခုလိုအစုလိုက်အပြုံလိုက်သတ်ဖြတ်မှုတွေမရှိခဲ့ဘူး။အခုတော့စစ်သူပုန်တွေဟာနေရာမရွှေး၊ဒေသမရွှေးစစ်ရာဇဝတ်မှုတွေကိုပြောင်ပြောင်တင်းတင်းဆက်လက်ကျူးလွန်မယ့်ပုံပဲ။

ဘင်္ဂလားပင်လယ်အော်ဘက်မှာမုန်တိုင်းငယ်တစ်ခုဖြစ်ပေါ်လာနိုင်ပြီးဆိုင်ကလုံးမုန်တိုင်းအဖြစ်အားကောင်းလာကာမြန်မာနိုင်ငံဧရာဝတီမြစ်ဝကျွန်းပေါ်ဒေသဖက်ဝင်လာနိုင်တယ်လို့မိုးလေဝသကျွမ်းကျင်သူတွေကခန့်မှန်းထားတယ်။၂၀၀၈ခုနှစ်ကမြန်မာပြည်သူအသက်ပေါင်းများစွာကိုနုတ်ယူသွားခဲ့တဲ့နာဂစ်မုန်တိုင်းဟာလဲဒီလိုအချိန်မှာပဲဧရာဝတီမြစ်ဝကျွန်းပေါ်ဒေသကိုဝင်ရောက်ခဲ့တယ်။တူညီတာတစ်ခုကဒီကာလမှာစစ်အာဏာရှင်တွေမြန်မာပြည်မှာရှိနေတာပဲ။သူတို့တွေလက်ထက်မှာမုန်တိုင်းဒဏ်သာခံရရင်မြန်မာပြည်သူတွေနူရာဝဲဆွဲဖြစ်တော့မယ်။ ဧရာဝတီမြစ်ဝကျွန်းပေါ်ဒေသဆိုတာလူဦးရေသန်းချီပြီးနေထိုင်ရာဒေသတစ်ခုပါ။ထိုနေရာကိုမုန်တိုင်းဝင်လာရင်ပြည်သူတွေရဲ့အသက်အိုးအိမ်စည်းစိမ်အမြောက်အများဆုံးရှုံးလိမ့်မယ်။စစ်ကောင်စီကဘာမှလုပ်ပေးမှာမဟုတ်ဘူး။မုန်တိုင်းတကယ်ဝင်မလာဖို့ပဲဆုတောင်းရမှာပဲ။

အာဆီယံအစည်းအဝေးဟာမြန်မာ့အရေးမှာထုံးစံအတိုင်းရှုံချကြောင်းထုတ်ပြန်ချက်တွေနဲ့ပဲပြီးဆုံးသွားခဲ့ပါတယ်။ဒီနှစ်အာဆီယံအလှည့်ကျဥက္ကဌဟာအင်ဒိုနီးရှားဆိုတော့မြန်မာ့အရေးအပြောင်းအလဲတချို့များဖြစ်လာမလားလို့မျှော်လင့်ခဲ့ပေမယ့်နှစ်တစ်ဝက်သာကုန်သွားတယ်၊ဘာမှထူးခြားမလာခဲ့ပါဘူး။အင်ဒိုနီးရှားဘက်ကတော့သက်ဆိုင်သူအားလုံးနဲ့တိတ်တဆိတ်တွေဆုံနေကြောင်းပြောတယ်။ဒါပေမယ့်လဲတစ်ခုခုထူးခြားလာမယ်လို့မထင်တော့ပါဘူး။ကမ္ဘာကြီးဟာမြန်မာ့အရေးတစ်ခုလုံးကိုအာဆီယံအပေါ်ပုတ်ထုတ်ပြီးခေါင်းခံခိုင်းထားတယ်။အာဆီယံကလဲဘာမှမလုပ်နိုင်တော့စစ်ကောင်စီအပေါ်ထိရောက်တဲ့အရေးယူမှုတစ်စုံတရာမရှိပဲဒီအတိုင်းပဲဆက်သွားမယ်ထင်ပါတယ်။

အာဆီယံလူသားချင်းစာနာမှုအကူအညီပေးရေးယာဉ်တန်းဟာရှမ်းပြည်နယ်တောင်ပိုင်း၊ဆီဆိုင်မြို့အနီးမှာပစ်ခတ်ခံလိုက်ရတယ်။ထိုယာဉ်တန်းဟာPNLOဆက်ဆံရေးရုံးမှာစစ်ဘေးဒုက္ခသည်တွေကိုကူညီရေးဆွေးနွေးဖို့သွားချိန်လမ်းမှာပစ်ခတ်ခံရလို့လှည့်ပြန်သွားရတယ်။ပစ်ခတ်မှုကြောင့်လူတွေထိခိုက်တာမရှိ‌ပေမယ့်ကားတွေတော့ပျက်စီးသွားတယ်။တိုက်ခိုက်မှုရဲ့တရားခံတော့မပေါ်သေးဘူး။စစ်တပ်နဲ့တော်လှန်ရေးအဖွဲ့တွေတဖက်နဲ့တဖက်လွှဲချနေကြတယ်။ တကယ်ကထိုနေရာဟာစစ်တပ်ထိန်းချုပ်မှုနယ်မြေအောက်မှာရှိနေပြီးတော်လှန်ရေးအဖွဲ့တွေအလွယ်တကူလှုပ်ရှားလို့မရတဲ့နေရာဖြစ်တယ်။ပြီးတော့အာဆီယံအစည်းအဝေးရှိတဲ့အချိန်မှာဒီကိစ္စဖြစ်လာတာဆိုတော့ဘယ်သူလုပ်တာဖြစ်နိုင်မလဲစဉ်းစားကြည့်ပေါ့။

စစ်ကောင်စီကအကယ်ဒမီပေးပွဲကိုသုံးနှစ်စာပေါင်းပြီးပြုလုပ်လိုက်တယ်။ထိုပွဲကိုပြည်တွင်းကအနုပညာရှင်တွေအကုန်မတက်မနေရလို့ခြိမ်းခြောက်ထားတာကြောင့်တော်တော်များများတက်ရောက်ကြတာတွေ့ရတယ်။ဒါပေမယ့်လဲထိုအကယ်ဒမီပေးပွဲသတင်းတွေလူထုကြားမှာမပြန့်နှံခဲ့ဘူး။ဘယ်သူတွေဘာရသွားတယ်ဆိုတာတောင်မသိလိုက်ဘူး။စစ်ကောင်စီလုပ်သမျှပွဲတွေအကုန်ပြည်သူကသပိတ်မှောက်ထားကြတယ်။ ထိုပွဲမှာအကယ်ဒမီရတဲ့သူတွေအတွက်လဲတကယ့်ကိုအောက်သက်သက်ဖြစ်နေမှာပဲ။စစ်ကောင်စီပေးတဲ့အကယ်ဒမီကိုပြည်သူကသပိတ်မှောက်ထားတဲ့အတွက်သူတို့လဲလွတ်လွတ်လပ်လပ်ပျော်နိုင်မယ်မထင်ဘူး။

အာဏာသိမ်းပြီး နှစ်နှစ်ကျော်အတွင်း နိုင်ငံအနှံ့ ပုန်ကန်မှုများကြောင့် စစ်မျက်နှာများစွာ ဖွင့်ထားရသည့် စစ်ဗိုလ်ချုပ်ကြီးများက တော်လှန်ရေးသမားတို့ တုံ့ပြန်၊ ခုခံနိုင်စွမ်းမရှိသည့် လေကြောင်းတိုက်ခိုက်မှုများကို အားပြု စစ်ဆင်နေသည်။ ဒေသအလိုက် မှိုလိုပေါက်နေသည့် တော်လှန်ရေးအဖွဲ့များ၏ ပြောက်ကျားခုခံမှု၊ မိုင်းကို အားပြုခုခံမှုများကြောင့် မြေပြင်စစ်ကြောင်းများ...

စစ်ခေါင်းဆောင်မင်းအောင်လှိုင်ကပြီးခဲ့တဲ့တပ်မတော်နေ့မှာPDFတွေနဲ့သူတို့ကိုကူညီထောက်ပံပေးနေတဲ့EAOတွေကိုအပြတ်တိုက်မယ်လို့ကြိမ်းဝါးသွားတယ်။အဲ့ဒီနောက်စစ်အသုံးစားရိတ်ကိုဒီနှစ်မှာနှစ်ဆနီးပါးမြှင့်တင်လိုက်တယ်။စစ်တပ်ကတော့ဒီနှစ်မှာမီးကုန်ရမ်းကုန်ကြမ်းမယ့်သဘောရှိတယ်။တဖက်မှာလဲNUGကနောက်ဆုံးအဆင့်တန်ပြန်ထိုးစစ်ဆင်ကာလအတွက်ပြင်ဆင်နေကြောင်းပြောထားတယ်ဆိုတော့ဒီနှစ်ထဲမှာတိုက်ပွဲတွေပိုမိုပြင်းထန်လာမယ့်ပုံပဲ။မိုးရာသီကရောက်တော့မယ်ဆိုတော့မိုးတွင်းမှာပဲစစ်ဆိုင်ကြမလား၊မိုးကုန်မှဖြစ်လာမလားမပြောတတ်သေးဘူး။ပြည်သူတွေကတော့မြေဇာပင်ဖြစ်ဦးမှာပဲ။

စစ်အာဏာရှင်ဆန့်ကျင်ရေး အင်အားစုတွေရဲ့ လူအင်အား man power ဟာ စစ်တပ်ရဲ့လူအင်အားထက် သာလွန်နေပြီ ဖြစ်တဲ့အကြောင်း၊ အခုအချိန်မှာ တန်ပြန် ထိုးစစ် အကြို ကာလကို ရောက်နေပြီး နောက်ဆုံးအဆင့် တန်ပြန်ထိုးစစ်ဆင်ကာလအတွက်ပြင်ဆင်နေကြောင်းNUGကပြောလိုက်ပြန်တယ်။NUGကထိုကဲ့သို့လေနဲ့ပဲတိုက်နေတာအခုဆိုရင်၂၀၂၃နှစ်တဝက်ကုန်ခါနီးပါပြီ။မကြာမီမှာမိုးရာသီကာလရောက်လာပါတော့မယ်။မိုးရာသီဆိုတာမြန်မာပြည်မှာစစ်တိုက်ရခက်ခဲတဲ့ရာသီတစ်ခုပါ။အဲ့ဒီတော့NUGရဲ့ပြင်ဆင်မှုဟာမိုးကုန်တဲ့အထိသွားမယ့်သဘောရှိတယ်။ NUGကအဲ့လိုလေကြီးမိုးကြီးတွေပြောပြီးအချိန်တွေကုန်လာလိုက်တာအခုဆိုရင်တော်လှန်ရေးကာလသုံးနှစ်ထဲဝင်လာပြီ။တချို့ဒေသတွေမှာစစ်တပ်ရဲ့နောက်တန်းအခြေစိုက်တပ်ရင်းစခန်းတွေကိုတိုက်ခိုက်နိုင်မှုတွေရှိလာပေမယ့် ခုအချိန်ထိမဟာဗျူဟာမြောက်ထိုးစစ်ဆင်မှုတွေတစ်ခုမှမတွေ့ရသေးပါဘူး။တဖြည်းဖြည်းနဲ့NUG ရဲ့ထိုးစစ်ဟာသူပြောနေတဲ့လေလုံးတွေကြားမှာပဲပြီးဆုံးမသွားဖို့မျှော်လင့်တယ်။

စစ်ကောင်စီဟာမနေ့ကကဆုန်လပြည့်နေ့မှာနိုင်ငံရေးအကျဉ်းသားနှစ်ထောင်ကျော်ကိုပြန်လွှတ်ပေးခဲ့တယ်။ဒါပေမယ့်ထိုပြန်လွှတ်ပေးမှုဟာမြန်မာပြည်ကိုတရုတ်၊ရုရှားအပါအဝင်နိုင်ငံတကာကလာရောက်ချိန်နှင့် ချိန်ကိုက်လွှတ်ပေးခြင်းသာဖြစ်တယ်။ ဖမ်းဆီးထားတဲ့လူတွေကိုပြန်လွှတ်ပြီးသူ့ရဲ့လမ်းစဉ်ကိုလက်ခံအောင်လုပ်တာကဟိုအရင်တွေကတည်းကလည်း လုပ်နေကျပဲ။ အခုတော့ စကစနဲ့ တွေ့ဆုံမှုတွေ လုပ်လာနေကြတာနဲ့အချိန်ကိုက် စီစဉ်ထားတဲ့ အတိုင်းလျော့ပေးနေတယ်။လက်ရှိမှာစစ်ကောင်စီ၏ဖိတ်ကြားချက်ဖြင့်မြန်မာနိုင်ငံကိုတရုတ်နိုင်ငံတော်ကောင်စီဝင် နိုင်ငံခြားရေးဝန်ကြီး မစ္စတာချင်ကန်း၊ ရုရှားအစိုးရကိုယ်စားလှယ်အဖွဲ့တို့အပြင် အာဆီယံ စီးပွားရေးအကြံပေးကောင်စီ(ASEAN-BAC) ဥက္ကဋ္ဌတို့ရောက်ရှိနေတယ်။ လွတ်ငြိမ်းချမ်းသာခွင့်နဲ့အခါကြီးရက်ကြီးတွေမှာအကျဉ်းသားတွေလွှတ်ပေးလေ့ရှိပေမယ့်နိုင်ငံအကျဉ်းသားတွေအများဆုံးလွှတ်ပေးတာဟာဒီတကြိမ်ပထမဦးဆုံးပဲ။ဒါပေမယ့်လဲဒါဟာဖိအားတွေများနေတဲ့စစ်ကောင်စီရဲ့လှည့်ကွက်တစ်ခုပဲ။