Military Coup Myanmar

၁၀၂၇စစ်ဆင်ရေးဆင်နွဲနေတဲ့မြောက်ပိုင်းမဟာမိတ်သုံးဖွဲ့နဲ့တွေ့ဆုံခဲ့တယ်လို့စစ်ကောင်စီကပြောကြားလိုက်ပါတယ်။ထိုတွေ့ဆုံပွဲကိုတရုတ်အစိုးရအကူအညီနဲ့ပြုလုပ်နိုင်ခဲ့တယ်လို့လဲပြောတယ်။တွေ့ဆုံပွဲကိုမြောက်ပိုင်းမဟာမိတ်သုံးဖွဲ့လုံးတက်ရောက်တယ်လို့သတင်းထုတ်ပြန်ထားတယ်။ဒါပေမယ့်မြေပြင်သတင်းတွေအရတော့ကိုးကန့်တပ်တစ်ခုသာတက်ရောက်ခဲ့ပြီးတအောင်းတပ်နဲ့ရခိုင်တပ်တို့ပါဝင်ခဲ့ခြင်းမရှိကြောင်းသိရတယ်။စစ်ကောင်စီနဲ့ကိုးကန့်တပ်တို့ဟာဒီလကုန်အထိယာယီအပစ်ရပ်ရန်၊လောက်ကိုင်မှစစ်ကောင်စီတပ်တို့ဆုတ်ခွာရန်နှင့်လောက်ကိုင်အပါအဝင်ကိုးကန့်ဒေသကိုကိုးကန့်တပ်ကိုထိန်းချုပ်ခွင့်‌ပေးရန်သဘောတူခဲ့ကြတယ်လို့ပေါက်ကြားလာတဲ့သတင်းတွေအရသိရတယ်။စစ်ကောင်စီရောကိုးကန့်တပ်ရောအသေးစိတ်အချက်အလက်တွေကိုတော့ထုတ်ဖော်ပြောဆိုခြင်းမရှိသေးဘူး။ကိုးကန့်ဘက်ကဆိုရင်တွေ့ဆုံပွဲနဲ့ပတ်သက်ပြီးဘာသတင်းမှထုတ်မပြောသေးဘူး။မြေပြင်မှာတော့ဒီနေ့အထိတိုက်ပွဲတွေဆက်လက်ပြင်းထန်နေပါတယ်။ ဒီသတင်းဟာအခုမှာကောက်ခါငင်ခါသိလိုက်ရတာဖြစ်တဲ့အတွက်ဘာဆက်ဖြစ်လာမလဲဆိုတာတော့ခန့်မှန်းရခက်နေတယ်။တွေ့ဆုံပွဲဖြစ်မြောက်သွားတာတော့သေချာသလောက်ရှိတယ်။စစ်ကောင်စီဟာသူတို့အရေးနိမ့်နေချိန်မှာတရုတ်ကိုအသည်းအသန်အကူအညီတောင်းပြီးမြောက်ပိုင်းမဟာမိတ်တွေရဲ့စစ်ရှိန်ကိုလျော့ချဖို့ကြိုးစားနေတာပဲ။

ရှမ်းပြည်နယ်မြောက်ပိုင်းရှိကမ္ဘာကျော်သတ္တုတွင်းတည်ရှိရာနမ္မတူမြို့ကိုTNLAကထပ်မံသိမ်းပိုက်လိုက်ပါတယ်။ထိုမြို့ကိုဒီဇင်ဘာလ၂၆ရက်နေ့ကစတင်တိုက်ခိုက်ခဲ့ပြီး၂ရက်အကြာမှာသိမ်းပိုက်နိင်ခဲ့ပါတယ်။လောလောဆယ်မှာတော့မြို့ထဲကထွက်ပြေးသွားတဲ့စစ်ကောင်စီတပ်ဖွဲ့ဝင်တွေကိုလိုက်လံရှင်းလင်းနေတယ်။နမ္မတူမြို့သိမ်းတိုက်ပွဲအတွင်းစစ်ကောင်စီဘက်ကတိုင်းစစ်ဌာနချုပ်ဖြစ်တဲ့လားရှိုးမြို့အဝင်အထွက်တွေကိုပိတ်ဆို့ထားတယ်လို့သိရတယ်။အရင်ကလားရှိုးကိုမှတ်ပုံတင်ရှိသူများကိုသာအဝင်အထွက်ပြုလုပ်ခွင့်ပေးပြီးအခုတော့ဘယ်သူ့ကိုမှအဝင်အထွက်လုပ်ခွင့်မပေးတော့ဘူး။နမ္မတူမြိုဟာလားရှို့မြို့အနောက်ဘက်မိုင်အနည်းငယ်သာဝေးကွာတယ်လေ။TNLAကသိမ်းပိုက်ပြီးနောက်စစ်ကောင်စီကမြို့ကိုလေကြောင်းမှဗုံးကြဲတိုက်ခိုက်နေလို့နေရာတော်တော်များများပျက်စီးလျက်ရှိတယ်။တမြို့လုံးအနေအထားနဲ့ဆိုရင်၄၀ရာခိုင်နှုန်းလောက်ပျက်စီးသွားပြီ။မြို့ထဲကဒေသခံအများစုကတော့တိမ်းရှောင်နေကြတယ်။TNLAဟာအခုဆိုရင်ရှမ်းမြောက်မှာမြို့ပေါင်း၅မြို့အထိသိမ်းပိုက်ထားပြီးကွတ်ခိုင်နဲ့သိန္ဒီမြို့တွေကိုလဲဆက်လက်တိုက်ခိုက်နေတယ်။

၁၀၂၇စစ်ဆင်ရေးစတင်ခဲ့တာနှစ်လတိတိရှိခဲ့ပါပြီ။ဒီ၂လအတွင်းမှာစစ်ရေးအရှိန်လျော့ကျသွားခြင်းမရှိပဲစစ်ကောင်စီကိုဆက်လက်ထိုးနှက်တိုက်ခိုက်လျက်ရှိတယ်။ရခိုင်ပြည်နယ်အပါအဝင်တနိုင်ငံလုံးမှာစစ်တပ်စခန်းပေါင်း၄၀၀ကျော်သိမ်းပိုက်ထားပြီးမြို့ပေါင်း၂၄မြို့အထိရရှိထားတယ်။ရှမ်းမြောက်မှာဆိုစစ်တပ်စခန်းတွေကုန်သလောက်ဖြစ်သွားပြီးအခြေစိုက်တပ်ရင်းစခန်းတွေလောက်သာကျန်တော့တယ်။တချို့စစ်ကောင်စီတပ်ရင်းတွေတပ်ရင်းလိုက်ပြုတ်ကုန်လို့တပ်ရင်းနံပါတ်တွေတောင်ပျောက်ကုန်ပြီ။လက်နက်ချအလင်းဝင်တဲ့စစ်ကောင်စီတပ်သားအရေအတွက်ဟာလဲငါးရာကျော်ရှိလာခဲ့ပြီ။ ဒီလထဲမှာတရုတ်ရဲ့ဖိအားပေးမှုကြောင့်ကိုးကန့်အဖွဲ့နဲ့စစ်ကောင်စီတို့တွေ့ဆုံခဲ့ပေမယ့်ဘာမှမထူးခြားခဲ့ပါဘူး။အခုဆိုရင်MNDAAဟာသူတို့ရဲ့အဓိကပန်းတိုင်ဖြစ်တဲ့လောက်ကိုင်မြို့ကိုအပြင်းအထန်တိုက်ခိုက်နေပါပြီ။TNLAကလဲဒီလထဲမှာပဲရှမ်းမြောက်ကမြို့၃ခုကိုဆက်တိုက်သိမ်းပိုက်နိုင်ခဲ့တယ်။ ရခိုင်ပြည်နယ်မှာလဲAAကသူတို့အခြေစိုက်ဒေသတခုရဖို့အတွက်ရခိုင်မြောက်ပိုင်းမှာအပြင်းအထန်ထိုးစစ်ဆင်နေတယ်။ပလက်ဝမြို့တဝိုက်ကိုထိန်းချုပ်ထားပြီးမကြာခင်မှာပဲမြို့ကိုရရှိဖို့ရှိမယ်။ကရင်နီပြည်နယ်မှာတော့မြို့တော်လွိုင်ကော်ကိုရရှိရေးကြိုးစားနေပြီးတပြိုင်နက်ပြည်နယ်အတွင်းဝင်ရောက်နိုင်တဲ့စစ်ကောင်စီထောက်ပို့လမ်းကြောင်းအားလုံးနီးပါးကိုထိန်းချုပ်နိုင်နေပြီ။ ပြည်မဖြစ်တဲ့စစ်ကိုင်းတိုင်းဘက်မှာတော့တိုးတက်မှုတွေနှေးကွေးသွားတယ်။ဒီလထဲမှာမော်လူးမြို့ကိုသာထပ်မံရရှိထားပြီးမဟာဗျူဟာကျတဲ့ထီးချိုင့်မြို့ကိုအခုချိန်ထိမသိမ်းနိုင်သေးပါဘူး။အရင်အတိုင်းမပြောင်းလဲပဲရှိနေတာကတော့တောင်ပိုင်းပါပဲ။အခုချိန်ထိမြို့တစ်မြို့မှမသိမ်းနိုင်သေးပါဘူး။ဘာပဲဖြစ်ဖြစ်တော်လှန်ရေးအရှိန်ကတော့နောက်လမှာလဲမလျော့ပဲဒီထပ်ပိုတိုးလာဖို့ရှိမယ်။

NUGရဲ့နွေဦးဖွံ့ဖြိုးရေးဘဏ်ဟာပထမဆုံးမြေပြင်ဘဏ်ခွဲအဖြစ်စစ်ကိုင်းတိုင်းကောလင်းမြို့မှာဖွင့်လှစ်လိုက်ပါတယ်။အဆိုပါနွေဦးဘဏ်ဟာဟိုတလောကရှယ်ယာဒေါ်လာ၁၀သန်းဖိုးရောင်းချထားပြီးအရှိန်အဟုန်တစ်ခုနဲ့လည်ပတ်လျက်ရှိတယ်။ကောလင်းမြို့ဟာNUGလက်အောက်ခံတော်လှန်ရေးတပ်တွေသိမ်းပိုက်ထားတဲ့မြို့ဖြစ်တာကြောင့်ဘဏ်ခွဲဖွင့်လှစ်နိုင်တဲ့အခြေအနေမျိုးတော့ရှိတယ်။ဒါပေမယ့်လုံးဝစိတ်ချရတာမျိုးတော့မဟုတ်ဘူး။ကောလင်းမြို့အနီးရှိဝန်းသိုမြို့အခြေစိုက်စစ်ကောင်စီတပ်ရင်းကမထင်ရင်မထင်သလိုကောလင်းမြို့ထဲလက်နက်ကြီးတွေနဲ့ပစ်နေတယ်။မြို့နေလူထုကိုပစ်မှတ်ထားပစ်ခတ်နေတာဖြစ်ပြီးပြီးခဲ့တဲ့ရက်တွေကကောလင်းမြို့မဈေးကိုပစ်ခတ်ခဲ့တာကြောင့်ဒေသခံပြည်သူငါးဦးခန့်သေဆုံးခဲ့သေးတယ်။ထိုလက်နက်ကြီးတွေရန်ကကင်းဝေးဖို့ဝန်းသိုမြို့ကိုပါသိမ်းပိုက်နိုင်ဖို့လိုတယ်။ဒါတောင်လေကြောင်းခြိမ်းခြောက်မှုအန္တရာယ်ကရှိသေးတယ်။ စစ်ကိုင်းတိုင်းအတွင်းကတော်လှန်ရေးအဖွဲ့တွေသိမ်းပိုက်ထားတဲ့ခမ်းပတ်နဲ့ရွေပြည်အေးမြို့တွေကိုလဲစစ်ကောင်စီကထိုးဆင်ပြန်ဆင်ဖို့ပြင်ဆင်နေတယ်။အခုချိန်ထိတော့စစ်ကောင်စီဘက်ကထိထိရောက်ရောက်တိုက်ခိုက်နိုင်တာမျိုးတော့မရှိသေးဘူး။

တရုတ်ဟာစစ်ကောင်စီကိုမီးစတဖက်ရေမှုတ်တစ်ဖက်ဗျူဟာကိုအသုံးပြုပြီးဆက်လက်ဆက်ဆံလျက်ရှိတယ်။ဘာလို့လဲဆိုတော့ဒီရက်ပိုင်းအတွင်းမှာပဲကျင်းပသွားတဲ့မဲခေါင်လန်မန်အစည်းအဝေးဗီဒီယိုကွန်ဖရန့်မှာစစ်ခေါင်းဆောင်မင်းအောင်လှိုင်အွန်လိုင်းကနေစကားပြောခွင့်ရသွားတယ်။ထိုအစည်းအဝေးကိုကြီးမှုးကျင်းပတဲ့ဗီယမ်နမ်ကမဖိတ်ခဲ့ပေမယ့်တရုတ်ရဲ့တိုက်တွန်းမှုကြောင့်စကားပြောခွင့်ရသွားတာလို့သိရတယ်။ဒါ့အပြင်မနေ့ကလဲစစ်ကောင်စီနဲ့တရုတ်တို့ဟာရခိုင်ပြည်နယ်ကျောက်ဖြူရေနက်ဆိပ်ကမ်းစီမံကိန်းအတွက်စာချုပ်တွေဆက်လက်ချုပ်ဆိုခဲ့တယ်။ဒါတွေကိုကြည့်ခြင်းအားဖြင့်တရုတ်ဟာမင်းအောင်လှိုင်ကိုမြောက်ပိုင်းသုံးဖွဲ့ကတဆင့်စစ်ရေးနဲ့ဖိအားပေးနေပြီးတဖက်မှာလဲလိုက်လျောမှုတွေပြုလုပ်နေတာကိုတွေ့ရတယ်။တဖက်ကတွေးကြည့်ရင်တော့တရုတ်ကပေးတဲ့လိုက်လျောမှုတွေဟာဘာမှထွေထွေထူးထူးတော့မဟုတ်ပါဘူး။သာမန်ဒေသတွင်းအစည်းအဝေးလေးတစ်ခုကိုအွန်လိုင်းကတက်ခွင့်ရတာရယ်၊တိုက်ပွဲတွေပြင်းထန်နေတဲ့ရခိုင်လိုဒေသမျိုးမှာဘယ်ဆီနေမှန်းမသိတဲ့စီမံကိန်းတစ်ခုအတွက်စာချုပ်ချုပ်တာရယ်ပါ။တရုတ်ရောစစ်ကောင်စီပါနှစ်ဖက်လုံးမှာအစာမကြေမှုတွေရှိနေဆဲပဲ။တရုတ်ကကျားဖြန်းအွန်လိုင်းလောင်းကစားကိစ္စနဲ့သူ့ရဲ့မြန်မာပြည်ထဲကစီမံကိန်းတွေရှေ့ဆက်မရတာနဲ့ပတ်သက်ပြီးမကျေမနပ်ဖြစ်နေသလိုစစ်ကောင်စီကလဲမြောက်ပိုင်းမဟာမိတ်သုံးဖွဲ့ကိုတရုတ်ကအားပေးနေတယ်လို့ယူဆပြီးနာကြည်းနေတယ်။ဒါပေမယ့်စစ်ကောင်စီအတွက်ရွေးချယ်စရာရှိမနေဘူး။ခုလောလောဆယ်မှာရှမ်းမြောက်ကတိုက်ပွဲတွေအပစ်ရပ်နိုင်ရေးတရုတ်ကိုခြေသလုံးဖက်ပြီးအကူအညီတောင်းနေရတယ်။တရုတ်ကတော့အခုချိန်ထိစစ်ကောင်စီကိုပညာကောင်းကောင်းပေးထားဆဲပဲ။သူတို့နှစ်ဦးရဲ့အကွဲအပြဲကြောင့်တော်လှန်ရေးမှာအမြတ်ထွက်နေတာကိုတွေ့ရတယ်။

ရခိုင်ပြည်နယ်ရှိ ရှေးဟောင်းမြို့တော် မြောက်ဦးမြို့မှာအရပ်သားတွေကိုပစ်မှတ်ထားပြီး စစ်ကောင်စီ လက်နက်ကြီးဖြင့် ပစ်ခတ်တိုက်ခိုက်၍ အရပ်သားတစ်ဦးထပ်မံသေဆုံးပြီး နှစ်ရက်အတွင်း စစ်ကောင်စီတိုက်ခိုက်မှုကြောင့် သေဆုံးသူ အရပ်သား လေးဦးအထိ ရှိလာပြီဖြစ်တယ်။ ပြီးခဲ့တဲ့ရက်တွေအတွင်းရက္ခိုင့်တပ်တော် (AA)က မြောက်ဦးမြို့မရဲစခန်း၊ သူတော်မတောင်စခန်းနှင့် မြောင်းဘွေရဲစခန်းတို့ကို တိုက်ခိုက်ခဲ့ပြီးနောက်စစ်ကောင်စီရဲ့ မြောက်ဦးမြို့အခြေစိုက်...

စစ်ကောင်စီက အာဏာသိမ်းပြီးနောက် အမေရိကန်ဒေါ်လာအဝင်/အထွက်တွေကို ထိန်းချုပ် ကိုင်တွယ်လိုက်တဲ့ နိုင်ငံခြားငွေတွေလဲရမယ် ဆိုတဲ့နောက်မှာ စက်သုံးဆီရှားပါးပြတ်လပ်ရတဲ့ ပြဿနာဖြစ်လာတာကို တွေ့ရပါတယ်။   သီလဝါဆိပ်ကမ်းက ပြဿနာတွေ အခု ဒီဇင်ဘာလ ပထမပတ်အတွင်းကြုံနေရတဲ့ ရန်ကုန်၊ မန္တလေးနဲ့ နေပြည်တော်အပါအဝင် မြို့အများစုမှာ စက်သုံးဆီဝယ်မရတဲ့ပြဿနာ ဘာကြောင့်...

စစ်ပြေးတွေစစ်တပ်ထဲပြန်လာရင်ပြစ်ဒဏ်တွေလွတ်ငြိမ်းခွင့်ပြုမယ်လို့ကြေညာခဲ့တဲ့စစ်ကောင်စီဟာဘယ်စစ်ပြေးမှပြန်ဝင်မလာလို့အကျဉ်းထောင်းတွေထဲကပြစ်ဒဏ်ကျနေတဲ့စစ်သားတွေကိုရာထူးတဆင့်မြင့်နဲ့ရှေ့တန်းပို့ဖို့ခေါ်ထုတ်နေတယ်လို့သိရတယ်။စစ်တပ်ဟာဘယ်လိုပဲဟန်ဆောင်ဖုံးဖိနေသော်ငြားသူတို့မှာအင်အားလျော့နည်းလာပြီးစစ်အင်အားလိုအပ်ချက်မြင့်မားလာတာတိုက်ပွဲဝင်စိတ်ဓါတ်ပျောက်ဆုံးနေတာသူတို့လုပ်ရပ်ကအထင်သားပေါ်လွင်မြင်သာနေတယ်။တနိုင်ငံလုံးအကျဉ်းထောင်ထဲရှိနေတဲ့စစ်ပြေးရဲပြေးအပါအဝင်ရာဇဝတ်မှုနဲ့ထောင်ကျနေတဲ့ရဲစစ်သားတွေကိုလွတ်ငြိမ်းနဲ့အတူတဆင့်တိုးရာထူးပေးစစ်တပ်ထဲပြန်ခေါ်လိုက်တာတွေကသူတို့မှာစစ်အင်အားလိုအပ်ချက်တွေဘယ်လောက်မြင့်နေလဲမြင်နိုင်တယ်။ဒီတိုင်းဆိုစစ်ပြေးရဲပြေးတွေဘဝကဝဋ်လည်ပြီလို့ ပြောလို့ ရနိုင်ပါတယ်။စစ်သား ရဲ ဖြစ်နေချိန် အရပ်သားတွေကိုပေါ်တာဆွဲခဲ့တဲ့ဝဋ်တွေက အခုဆိုရင်သူတို့ကို စစ်တပ်က စကားလှအောင်ပြောတရားဝင်ပေါ်တာပြန်ဆွဲတာဖြစ်တယ်။စစ်တပ်ထဲရဲထဲမှာမနေချင်လို့ထောင်ကျမယ်သိရက်နဲ့ပြေးခဲ့ကြသူတွေကဒီနေ့လိုရှေ့တန်းမှာအတုံးအရုန်းသေမယ်ဆိုတာသိချိန်ဘယ်သူကစစ်ထဲဝင်ပီးအသေခံစစ်မှုထမ်းမှာလဲ။အရင်ရက်တွေကချင်းပြည်နယ်ထဲတပ်ရင်းကနေအိန္ဒိယထဲပြေးတဲ့စစ်သားတွေကိုအိန္ဒိယကပြန်လွှဲပေးပြီးနောက်ချက်ချင်းစစ်ရုံးမတင်ပဲတာဝန်ပြန်ထမ်းဆောင်ခိုင်းထာကြည့်ရင်စစ်တပ်ဟာစစ်သားလိုအပ်ချက်အဆမတန်များပြားလာတာကြောင့်စစ်တပ်ပေါ်သစ္စာဖောက်သွားတဲ့အကျင့်ပျက်စစ်သားတွေကိုတောင်အရေးမယူနိုင်ဖြစ်လာတဲ့အထိကိုအင်အားနည်းနေတာ မြင်နိုင်တယ်။စစ်အင်အားလိုအပ်ချက် မြင့်လာပြီးတိုက်ပွဲဝင်စိတ် ပျောက်နေတဲ့ဒီစစ်တပ် ဘယ်လောက် တောင့်ခံမလဲကြည့်ရမယ်။

စက်သုံးဆီတင်သွင်းမှုနဲ့ပတ်သက်ပြီးစစ်ကောင်စီကမူဝါဒအမျိုးမျိုးပြောင်းလဲနေတဲ့ဂယက်ကြောင့်ပြည်တွင်းမှာစက်သုံးဆီပြတ်လပ်မှုဟာပိုမိုဆိုးရွားလာနေပါတယ်။အရင်ကရန်ကုန်တမြို့ထဲလောက်သာဆီပြတ်လေ့ရှိပြီးအခုတော့မန္တလေး၊နေပြည်တော်အပါအဝင်နိုင်ငံအနှံနေရာဒေသအားလုံးနီးပါးစက်သုံးဆီပြတ်နေပြီ။ရန်ကုန်မှာဆိုအရင်ကဆိုင်သေးတွေလောက်ပဲဆီပြတ်တာဖြစ်ပြီးဆိုင်ကြီးတွေမှာဝယ်ယူလို့ရနေခဲ့သေးတယ်။အခုတော့ဆိုင်ကြီးတွေကိုယ်တိုင်ဆီမရှိတော့ပါဘူး။ဆီဘောက်ဆာကားတွေအကုန်သီလဝါဆိပ်ကမ်းမှာတန်းစီပြီးဆီထုတ်ဖို့စောင့်ဆိုင်းနေရတယ်။ထုတ်လို့ရတဲ့ဆီကလဲမဖြစ်စလောက်ဆိုတော့ဆိုင်တွေကိုအလျင်မှီအောင်ဖြည့်ဆည်းပေးနိုင်ခြင်းမရှိတော့ဘူး။ဒါကြောင့်စက်သုံးဆီအရောင်းဆိုင်တွေအားလုံးမှာဆီထုတ်ဖို့နာရီနဲ့ချီပြီးစောင့်နေရတယ်ယာဉ်တန်းရှည်ကြီးတွေဖြစ်ပေါ်နေတယ်။ထိုကဲ့သို့အချိန်ကုန်ခံစောင့်နေလဲဆီရဖို့ကမသေချာတဲ့အခြေအနေပါ။ အကြောင်းရင်းကတော့စစ်ကောင်စီကဆီဝယ်ဖို့ဒေါ်လာရောင်းမပေးတော့တာကြောင့်ပဲ။ဒါ့အပြင်လုပ်ငန်းရှင်တွေကိုပြင်ပကနေဒေါ်လာဝယ်ခိုင်းပြီးစက်သုံးဆီဈေးကိုတော့လွတ်လပ်စွာသတ်မှတ်ခွင့်မပေးပဲစစ်ကောင်စီကဆက်လက်ထိန်းချုပ်ထားတယ်။ဒါ့ကြောင့်လုပ်ငန်းရှင်တွေအနေနဲ့အရှုံးပေါ်နိုင်တာကြောင့်စက်သုံးဆီမတင်သွင်းတော့ဘူး။ပင်လယ်ဝမှာဆီတင်သင်္ဘောတွေရောက်နေပေမယ့်ဒေါ်လာမရှိလို့ဆိပ်ကမ်းကိုမချနိုင်ဘူး။လက်ကျန်ဆီတွေကိုသာထိန်းရောင်းနေတယ်။သပွတ်အူလိုရှုပ်နေတဲ့ဒီပြသာနာဟာအရင်လိုရက်အနည်းအငယ်အတွင်းပြေလည်သွားလိမ့်မယ်လို့မမြင်ဘူး။ကံမကောင်းရင်ပြည်သူတွေဆီတန်းစီရတဲ့ဒုက္ခကရေရှည်ဖြစ်သွားနိုင်တယ်။

စက်သုံးဆီတင်သွင်းနေတဲ့လုပ်ငန်းရှင်ကြီးတွေကိုစစ်ကောင်စီကဗဟိုဘဏ်သတ်မှတ်ဈေးတစ်ဒေါ်လာ၂၁၀၀ကျပ်နဲ့ရောင်းမပေးတော့ဘူးလို့သိရတယ်။ဒါ့ကြောင့်စက်သုံးဆီတင်သွင်းမယ့်လုပ်ငန်းရှင်တွေဟာတင်သွင်းမယ့်ဒေါ်လာသန်းချီကိုအပြင်ပေါက်‌ဈေး၃၅၀၀ကျပ်ခန့်နဲ့ကိုယ့်ဘာသာကိုယ်ရှာရမယ့်သဘောဖြစ်နေတယ်။ဒါ့အပြင်စစ်ကောင်စီဟာသူတို့ထိန်းချုပ်ထားတဲ့ဒေါ်လာဈေးကိုလွတ်ပေးလိုက်ပြီးလို့မနေ့ကကြေငြာလိုက်ပါတယ်။အပြင်ဈေးကွက်မှာကြိုက်ရောင်းကြိုက်ဝယ်လုပ်နိုင်တဲ့သဘောပေါ့။ဒါပေမယ့်ဒေါ်လာဈေးကိုအလုံးစုံလွတ်ပေးတာမျိုးလဲမဟုတ်ပြန်ဘူး။ပို့ကုန်ကရတဲ့ဝင်ငွေရဲ့၃၀ရာခိုင်နှုန်းကိုသူတို့သတ်မှတ်ထားတဲ့၂၁၀၀ကျပ်ဈေးနဲ့ဗဟိုဘဏ်ကိုမဖြစ်မနေပေးသွင်းနေရဦးမယ်။ပို့ကုန်လုပ်ငန်းရှင်တွေဆီကရသလောက်ညှစ်ယူဦးမယ့်သဘောပဲ။ဘယ်လိုပဲထုတ်ပြန်ချက်တွေထုတ်နေပါစေဘက်ပေါင်းစုံကထိုးနှက်ချက်တွေရင်ဆိုင်နေရတဲ့စစ်ကောင်စီဟာအမေရိကန်ဒေါ်လာအရောင်းအဝယ်အတွက်ရည်ညွန်းဈေးသတ်မှတ်ပေးတဲ့အလုပ်ကိုအာဏာသိမ်းပီး၃နှစ်အကြာမှာလက်လျှော့လိုက်ပါပြီ။ဈေးကွက်မှာဖြစ်ချင်ရာဖြစ်စေတော့ဆိုတဲ့သဘောပဲ။သူတို့မှာထုတ်ရောင်းစရာလဲမရှိတော့ဘူး။ပြီးခဲ့တဲ့ရက်တွေကစက်မှုဇုန်လုပ်ငန်းရှင်တွေကိုစက်သုံးဆီခွဲတမ်းမပေးနိုင်တော့ဘူးလို့ပြောခဲ့တာတောင်သိပ်မကြာသေးဘူး။အခုတော့စစ်တပ်ထောက်ခံသူတွေအထူးသဖြင့်စက်သုံးဆီတင်သွင်းသူတွေကိုတောင်ဒေါ်လာရောင်းမပေးနိုင်တော့ဘူးလေ။ဒါဟာအဆုံးသတ်နီးလာပြီဆိုတဲ့လက္ခဏာပဲ။