အာဏာသိမ်း ဒိုင်ယာရီ

ရခိုင်မှာအောက်တိုဘာလထဲတိုက်ပွဲတွေငြိမ်နေပါတယ်မှတ်နေတာအေအေဒီနေ့သတင်းထုတ်ပြန်လိုက်တယ်။ပီးခဲ့လဒုတိယနှစ်ပတ်အတွင်းတိုက်ပွဲတွေမှာစစ်ကောင်စီတပ်သားနှစ်ဆယ်ကျော်သေဆုံးတယ်တဲ့။ခွင့်ပြန်တဲ့နယ်ခြားစောင့်ရဲငါးဆယ်ကျော်လဲထွက်ပြေးနေတယ်တဲ့။ရခိုင်ပြည်နယ်မှာလဲသွေးမအေးသေးဘူးပေါ့။ ထူးခြားမှုအနေနဲ့တိုက်ခိုက်မှုတွေတစ်ခါမှမဖြစ်ဖူးတဲ့ရှေးဟောင်းယဥ်ကျေးမှုနယ်မြေပုဂံမြို့နားကငါ့သရောက်မှာရဲစခန်းကိုPDFတွေကဆိုင်ကယ်တွေနဲ့အလစ်ဝင်ပစ်သွားလို့စခန်းမှုးအပါအဝင်တစ်ဆယ်ကျော်သေဆုံးသွားတယ်။လက်နက်တွေလဲပါသွားတယ်။စစ်ကောင်စီတပ်တွေကိုဘယ်နေရာမှအနားပေးလို့မရဘူး။လစ်ရင်လစ်သလိုသင်ခန်းစာပေးနိုင်လေကောင်းလေပဲ။  

ဘာလိုလိုနဲ့တမိုးကုန်ဆုံးလို့ပွင့်လင်းရာသီကိုပြန်ရောက်လာပြန်ပြီ။မနှစ်ကဒီလိုအချိန်ပွင့်လင်းရာသီရောက်တာနဲ့စစ်ကောင်စီဟာစစ်ကိုင်းတိုင်းကိုအနော်ရထာစစ်ဆင်ရေးဆိုပြီးထိုးစစ်ကြီးတစ်ခုစခဲ့တယ်။တော်လှန်ရေးတပ်ဖွဲ့တွေကြံကြံခံရင်ဆိုင်ခဲ့ရတယ်။ကရင်ပြည်နယ်လေးကေကော်ကိုလဲထိုးစစ်စဖို့ပြင်ဆင်နေတဲ့ကာလပေါ့။ ဒီနှစ်မှာပွင့်လင်းရာသီမှာတော့စစ်ကောင်စီတပ်တွေငြိမ်နေတယ်။ဘယ်ဒေသကိုမှစစ်ဆင်ရေးကြီးတွေလုပ်မယ်ဆိုတဲ့အသံမျိုးမကြားမိသေးဘူး။သူတိုအင်အားနည်းနေလို့ခံစစ်ပြင်နေတာလား၊တခုခုကိုကြိတ်ကြံနေတာလားတော့မပြောတတ်ဘူး။အလားတူပဲတော်လှန်ရေးအဖွဲ့တွေဘက်ကလဲလှုပ်ရှားမှုတွေနည်းပါးသွားသလိုပဲ။NUGကတစ်နှစ်အတွင်းအပြတ်တိုက်မယ်ပြောလို့ပြင်ဆင်နေကြတာလား၊တော်လှန်ရေးအရှိန်ကျသွားတာလားတော့မပြောတတ်ဘူး။နှစ်ဖက်စလုံးမှာဘယ်လိုတွေဖြစ်လာမလဲဆိုတာလာမယ့်လတွေမှာအဖြေပေါ်လာလိမ့်မယ်ထင်တယ်။

ကျိုက်ထီးရိုးဘုရားမှာလာမယ့်တန်ဆောင်မုန်းလပြည့်နေလူစည်ကားဖို့စစ်ကောင်စီကြိုးပမ်းနေတယ်။ဟိုတလောကကျိုက်ထီးရိုးဘုရားတောင်ခြေကင်ပွန်းစခန်းမှာပစ်ခတ်မှုတွေဖြစ်ပြီးဘုရားဖူးတချို့သေဆုံးပီးကတည်းကဘုရားဟာခြောက်ကပ်သွားတယ်။ဘုရားဖူးတွေမလာကြတော့ဘူး။ဒါကိုစစ်ကောင်စီကအရင်အတိုင်းပုံမှန်လည်ပတ်စေချင်တယ်။ဘုရားတွေအများစုဟာအခါကြီးရက်ကြီးတွေဆိုပိုမိုစည်ကားလေ့ရှိတယ်။ဒါပေမယ့်ဒီပုံအတိုင်းဆိုလာမည့်တန်ဆောင်မုန်းလပြည့်နေ့မှာလဲကျိုက်ထီးရိုးကိုဘုရားဖူးတွေလာကြမှာမဟုတ်ဘူး။ဒါကြောင့်စစ်ကောင်စီဟာထိုနေ့တွေမှာတောက်တက်ကားစီးခွင့်၊ဘုရားပေါ်မှာတည်းခိုခွင့်အခမဲ့နဲ့စတုဒီသာတွေပါကျွေးမယ်ဆိုပြီးဆွဲဆောင်နေတယ်။ဘုရားဖူးတွေစည်ကားနေသယောင်ထင်ယောင်ထင်မှားဖြစ်အောင်Non CDM ဝန်ထမ်းတွေကိုလဲဘုရားဖူးသွားဖို့အတင်းအကျပ်စေခိုင်းနေတယ်။ သူတို့ဘယ်လိုပဲဆွဲဆောင်နေပါစေအရင်ကငြိမ်းချမ်းခဲ့တဲ့ကျိုက်ထီးရိုးဘုရားဝန်းကျင်ဟာအခုအရင်လိုမဟုတ်တော့ဘူး။မငြိမ်မသက်မှုတွေရှိလာနေပြီ။ထိုဒေသမျိုးကိုအသက်နဲ့ရင်းပြီးဘယ်သူမှဘုရားဖူးသွားကြလိမ့်မယ်မထင်ဘူး။အခုလိုစစ်ကောင်စီကအတင်းအကျပ်လုပ်နေတော့ပိုဆိုးတာပေါ့။ ပြည်တွင်းမှာပုံမှန်လည်ပတ်နေသယောင်စစ်ကောင်စီကပြုလုပ်နေသမျှအားလုံးမအောင်မြင်ခဲ့ဘူး။အခုတကြိမ်လဲသူတို့မျှော်မှန်းသလိုဖြစ်လာမှာမဟုတ်ဘူး။

ကချင်ပြည်နယ်မိုးမောက်မှာစစ်ကောင်စီတပ်တွေနဲ့KIAတို့တိုက်ပွဲတွေဆက်လက်ပြင်းထန်နေတယ်။မိုးမောက်မြို့အရှေ့ဖက်ကလုံဂျာတောင်ကြောမှာရှိတဲ့KIAတပ်စခန်းတွေကိုစစ်တပ်ကသိမ်းပိုက်ဖို့ကြိုးစားနေတာပါ။ထိုKIAစခန်းတွေဟာြမစ်ကြီးနား-ဗန်းမော်လမ်းကိုကောင်းစွာြခိမ်းခြောက်နိုင်တယ်။ထိုလမ်းတလျောက်ရှိစစ်တပ်စခန်းတွေလဲလုံခြုံမှုမရှိလို့အင်အားငါးရာကျော်သုံးပြီးအသည်းအသန်တိုက်ခိုက်နေတယ်။တပတ်ကျော်ကြာနေပြီဖြစ်တဲ့တိုက်ပွဲတွေမှာစစ်ကောင်စီဖက်ကတစ်ရာကျော်သေဆုံးသွားပြီလို့သိရတယ်။ တနိုင်ငံလုံးကထောင်တွေမှာပိတ်ထားတဲ့ထောင်ဝင်စာတွေကိုစစ်ကောင်စီကပြန်လည်ခွင့်ပြုလိုက်ပြီ။ဒါပေမယ့်အစစ်အဆေးတွေကတော့အများကြီးပိုပြီးတင်းကျပ်လာတယ်။အခုလိုထောင်ဝင်စာတွေကိုတင်းကျပ်ချင်လို့အင်းစိန်ထောင်ဗုံးခွဲမှုကိုစစ်ကောင်စီကစီစဉ်တာလဲဖြစ်နိုင်တာပဲ။

ဒီရက်ထဲမှာအကျဉ်းကျခံနေရတဲ့အနုပညာရှင်တွေဖြစ်တဲ့အဆိုတော်ပိုပို၊မဝင်းမင်းသန်းနဲ့ဒါရိုက်တာမိုက်တီးတို့ပြန်လွတ်လာကြတယ်။ဒါကြောင့်လက်ရှိထောင်ထဲမှာကျန်နေတဲ့အနုပညာရှင်တွေသိပ်မရှိတော့ဘူး။ပြန်လွတ်လာတဲ့သူအတော်များများကလဲအနုပညာလှုပ်ရှားမှုတွေသိပ်မလုပ်ကြတော့ဘူး။နာမည်ကြီးမော်ဒယ်ပိုင်တံခွန်တောင်အလုပ်ပေါ်ပေါ်ထင်ထင်ပြန်လုပ်နေတဲ့အတွက်ဝေဖန်ခံနေရတယ်။အနုပညာရှင်တွေအနေနဲ့ဒီအချိန်မှာစစ်ကောင်စီနဲ့ဝေးဝေးနေပြီးဘာမှမလှုပ်ရှားတာပိုကောင်းလိမ့်မယ်။မဟုတ်ရင်ပြည်သူတွေရဲ့ငြိုငြင်မှုကိုခံရနိုင်တယ်။ ဒီနေ့ည၈နာရီမှာကချင်အနန့်ပါဖြစ်ရပ်ဝမ်းနည်းခြင်းအထိမ်းအမှတ်မီးပိတ်သပိတ်ပြုလုပ်ကြတယ်။မြို့ကြီးတွေမှာနေရာတိုင်းမလုပ်နိုင်ပေမယ့်သူ့နေရာနဲ့သူတော့ကွက်ကြားပါဝင်ကြပါတယ်။အခုနောက်ပိုင်းထိုပုံစံသပိတ်တွေကိုစိတ်ဝင်စားသိရှိမှုတဖြည်းဖြည်းနည်းသွားပြီ။စစ်ကောင်စီကခြိမ်းခြောက်ရမ်းကားနေတာလဲပါမှာပေါ့။လူစိတ်ဝင်စားမှုနည်းလာတဲ့အလျောက်နောက်ပိုင်းထိုပုံစံသပိတ်တွေလဲပျောက်ကွယ်သွားလိမ့်မယ်။

ကချင်ပြည်နယ်၊မိုးမောက်နဲ့ဗန်းမောက်မြို့နယ်ထဲမှာတိုက်ပွဲတွေပြင်းထန်နေတယ်။ဖားကန်အနန့်ပါဖြစ်ရပ်မတိုင်ခင်ကတည်းကစစ်ကောင်စီကထိုမြို့နယ်တွေထဲကKIAတပ်စခန်းတွေကိုစစ်ကြောင်းထိုးနေတာပါ။တိုက်ပွဲတွေပြင်းထန်နေတာတစ်ပတ်လောက်ရှိနေပြီးအခုထိရည်မှန်းချက်အတိုင်းမရသေးလို့စစ်တပ်ဟာမိုးမောက်မြို့လူနေရပ်ကွက်တွေထဲကိုလက်နက်ကြီးတွေနဲ့ပါပစ်ခတ်သောင်းကျန်းနေတယ်။မြို့ထဲကပြည်သူတစ်ဦးသေဆုံးပြီးတချို့တွေဒဏ်ရာရကြတယ်။စစ်တပ်ဖက်ကနေ့စဥ်ထိခိုက်ကျဆုံးမှုတွေရှိနေလို့အင်အားထပ်ဖြည့်နေတယ်။တနိုင်ငံလုံးနေရာအနှံအပြားစစ်မျက်နှာပေါင်းစုံနဲ့ရင်ဆိုင်နေရချိန်မှာKIAလိုEAOမျိုးကိုတိုက်စစ်ဖွင့်နိုင်တဲ့စစ်တပ်ကိုအံသြမိတယ်။အခုနောက်ပိုင်းစစ်ကောင်စီဟာတိုင်းရင်းသားလက်နက်ကိုင်အဖွဲ့တွေကိုအင်အားအလုံးအရင်းနဲ့ထိုးစစ်မဆင်နိုင်တာအတော်ကြာနေပြီ။KIAဖက်ကလဲအနန့်ပါဖြစ်ရပ်ကြီးပူပူနွေးနွေးဖြစ်ထားတဲ့အတွက်စိတ်ဓာတ်အင်အားကောင်းကောင်းနဲ့တုန့်ပြန်မှာသေချာတယ်။ဒီတော့စစ်သူပုန်တွေအကျအဆုံးများလိမ့်မယ်။

အာဆီယံနိုင်ငံခြားရေးဝန်ကြီးတွေမြန်မာအရေးအရေးပေါ်အစည်းအဝေးလုပ်ကြတယ်။လာမယ့်လမှာကျင်းပမယ့်အာဆီယံထိပ်သီးညီလာခံမှာစစ်ကောင်စီကိုဘယ်လိုကိုင်တွယ်ကြမလဲဆိုတာကိုအကြိုဆွေးနွေးကြတာပါ။ကြေငြာချက်တစ်စုံတရာတော့မထုတ်ပြန်သေးဘူး။စင်ကာပူဝန်ကြီးကတော့အာဆီယံအတွက်ခက်ခဲတဲ့ဆုံးဖြတ်ချက်ချဖို့အချိန်ကျလာပြီလို့ပြောသွားတယ်။လာမယ့်နှစ်မှာအင်ဒိုနီးရှားကအလှည့်ကျဥက္ကဌဖြစ်လာမှာပါ။ဘာပဲဖြစ်ဖြစ်အာဆီယံအနေနဲ့စစ်ကောင်စီအပေါ်အမြင့်ဆုံးအရေးယူနိုင်တာတစ်ခုကအာဆီယံကမြန်မာကိုထုတ်ပစ်လိုက်တာပဲ။အာဆီယံကမြန်မာကိုထုတ်ပစ်လိုက်လဲစစ်ကောင်စီကအရေးလုပ်နေမှာမဟုတ်ဘူး။သူ့အတွက်ဘာမှထိခိုက်နစ်နာမှုရှိမှာမဟုတ်ဘူး။မြန်မာ့အရေးကိုအာဆီယံလက်ထဲထည့်ထားသမျှတော့စစ်ကောင်စီစိတ်ကြိုက်ဖြစ်နေမှာပဲ။

စစ်ကိုင်းတိုင်းပုလဲမြို့နယ်ကပြည်သူ့ကာကွယ်ရေးအဖွဲ့ရုံးလေကြောင်းကနေစီးနင်းတိုက်ခိုက်ခံလိုက်ရတယ်။ရဟတ်ယာဉ်တွေနဲ့စစ်သားတွေချပြီးပစ်ခတ်စီးနင်းသွားတာဖြစ်တယ်။ကြိုတင်သတင်းရတဲ့အတွက်PDFတွေဖက်ကထိခိုက်မှုတော့မရှိခဲ့ဘူး။ရုံးနဲ့ရုံးတွင်းပစ္စည်းတွေကိုတော့လက်လွှတ်လိုက်ရတယ်။ရုံးအတွင်းမှာဖမ်းထားတဲ့စစ်ကောင်စီသတင်းပေးတွေနဲ့ပစ်မှုကျူးလွန်ထားသူတွေကိုတော့စစ်တပ်ကခေါ်ဆောင်သွားတယ်။တချို့တွေကိုလဲနေရာမှာတင်သတ်ဖြတ်သွားတယ်။အနီးနားတဝိုက်ကိုစစ်သူပုန်တွေကဆက်လက်စစ်ကြောင်းထိုးရာမှာPDFတွေနဲ့တိုက်ပွဲတွေပြင်းထန်စွာဖြစ်ပွားပြီးစစ်သူပုန်၃၀ခန့်သေဆုံးသွားတယ်။ထိုစစ်ကြောင်းဟာရဟတ်ယာဉ်တွေနဲ့ပဲပြန်လည်ဆုတ်ခွာသွားတယ်။ မြောင်မြို့နယ်မှာလဲအလားတူလေကြောင်းကစီးနင်းခံရလို့PDFစခန်းတစ်ခုလက်လွှတ်လိုက်ရတယ်။လူတွေတော့ဘာမှထိခိုက်မှုမရှိပေမယ့်စခန်းသိမ်းခံရတာကြောင်းလက်နက်ခဲယမ်းပစ္စည်းရိက္ခာတွေဆုံးရှုံးကုန်တယ်။စစ်ကိုင်းနဲ့မကွေးမှာစစ်သူပုန်တွေမြေပြင်ကစစ်ကြောင်းမထိုးနိုင်တော့တာကြောင့်လေကြောင်းကနေပဲအလစ်ဝင်ရောက်တိုက်ခိုက်တဲ့ဗျူဟာကိုပြောင်းလဲကျင့်သုံးလာနေပြီ။ဒါကိုတန်ပြန်နိုင်ဖို့တော်လှန်ရေးအဖွဲ့တွေအနေနဲ့နည်းလမ်းရှာဖို့လိုနေပြီ။

အနန့်ပါကျေးရွာဗုံးကြဲတိုက်ခိုက်ခံရမှုကြောင့်သေဆုံးသူအရေအတွက်တစ်ရာနီးပါးဖြစ်လာပြီ။ဒဏ်ရာရသူတွေကိုဖားကန့်ဘက်ကဆေးရုံတွေကိုပို့ဆောင်နိုင်ဖို့စစ်ကောင်စီကလက်မခံပဲလမ်းတွေပိတ်ဆို့ထားတာကြောင့်လူနာတွေသွေးထွက်လွန်ပြီးသေဆုံးသူအရေအတွက်တိုးလာခြင်းဖြစ်တယ်။အရပ်သားတွေအပေါ်ဗုံးကြဲတိုက်ခိုက်ပြီးဒဏ်ရာရသူတွေကိုဆေးရုံတင်ခွင့်မပေးတာဟာတော်တော်ယုတ်မာရိုင်းစိုင်းတဲ့စစ်ကောင်စီရဲ့အပြုအမူပဲ။ KIAဖက်ကဒီဖြစ်ရပ်အပေါ်တန်ဖိုးကြီးတဲ့ရင်းနှီးမှုဟာတော်လှန်ရေးအတွက်အားဖြစ်စေမယ်လို့ပြောလိုက်တယ်။KIAဗိုလ်ချုပ်ဂွမ်မော်ကဆိုရှယ်မီဒီယာမှတဆင့်မင်းအောင်လှိုင်အပေါ်အိတ်ဖွင့်ပေးစာပို့တယ်။ဒီဖြစ်ရပ်မတိုင်ခင်အထိKIAဟာစစ်ကောင်စီကိုတိုက်စစ်မဖွင့်သေးပဲခုခံစစ်သာဆင်နွှဲနေတာပါ။အခုစစ်ကောင်စီရဲ့အဆင်အခြင်မဲ့လုပ်ရပ်ကြောင့်ကချင်ပြည်နယ်မှာတိုက်ပွဲကြီးတွေဖြစ်လာလိမ့်မယ်လို့ခန့်မှန်းနေကြတယ်။ စစ်ကောင်စီဟာနွေဦးတော်လှန်ရေးမှာEAOအဖွဲ့တွေကိုမပါပါအောင်ဆွဲခေါ်နေသလိုပဲ။ပထမဆုံးKNUနယ်မြေထဲကလေးကေကော်ဒေသကိုစစ်ကြောင်းထိုးပြီးKNUကိုဆွဲခေါ်ခဲ့တယ်။ပြီးတော့အေအေစစ်စခန်းတစ်ခုကိုဗုံးကြဲတိုက်ခိုက်ပြီးငြိမ်သက်နေတဲ့ရခိုင်မှာအေအေနဲ့စစ်မျက်နှာအသစ်ဖွင့်ခဲ့တယ်။အခုလဲKIAကိုစစ်ကြေငြာလိုက်ပြီ။စစ်ကောင်စီဟာအိပ်နေတဲ့ကျားကိုသွားနိုးလိုက်တာပဲ။    

ဒီနွေဦးတော်လှန်ရေးကာလမှာအဆိုးရွားဆုံး၊ယုတ်မာအရိုင်းစိုင်းဆုံးလုပ်ရပ်တစ်ခုကိုစစ်ကောင်စီကကချင်ပြည်နယ်မှာကျူးလွန်ခဲ့တယ်။ကချင်ပြည်နယ်၊ဖားကန့်မြို့နားကအနန့်ပါကျေးရွာလေးမှာKIA/KIOနှစ်ပတ်လည်နေ့အကြိုအခမ်းအနားဖျော်ဖြေပွဲတစ်ခုမနေ့ညကပြုလုပ်ခဲ့တယ်။KIOကအရာရှိတွေ၊ကချင်အနုပညာရှင်တွေ၊ပြည်သူတွေအမြောက်အမြားရှိနေတဲ့ပွဲတစ်ခုကိုညကိုးနာရီလောက်မှာစစ်တပ်ကလေယာဥ်နဲ့ဗုံးကြဲသွားတယ်။ပွဲခင်းထဲမှာရှိနေတဲ့ပြည်သူ၅၀ခန့်ပွဲချင်းပြီးသေဆုံးပြီး၁၀၀ခန့်ဒဏ်ရာအပြင်းအထန်ရကုန်တယ်။သေဆုံးသူတွေထဲမှာKIO/KIAအရာရှိတွေနဲ့ကချင်နာမည်ကြီးအနုပညာရှင်တွေပါသွားတယ်လို့ကနဦးသိရတယ်။တိုက်ပွဲမဖြစ်ပဲ၊စစ်ပွဲဧရိယာတစ်ခုမဟုတ်ပဲအရပ်သားတွေအပေါ်ရည်ရွယ်ချက်ရှိရှိတိုက်ခိုက်တာပါ။ ဒါဟာစစ်ကောင်စီကအစုလိုက်အပြုံလိုက်လူသတ်မှု၊စစ်ရာဇဝတ်မှုကြီးကိုကျူးလွန်လိုက်တာပဲ။ပြီးတော့ကချင်တိုင်းရင်းသားတစ်ရပ်လုံးနဲ့KIOကိုပြောင်ပြောင်တင်းတင်းစိန်ခေါ်လိုက်တာပဲ။ဒီကိစ္စဟာလွယ်လွယ်နဲ့ပြီးသွားမှာမဟုတ်ဘူး။နှစ်ဖက်လုံးမှာအကျိုးသက်ရောက်မှုတွေပြင်းထန်လာလိမ့်မယ်။