အာဆီယံကမြန်မာ့အရေးဆွေးနွေးထုတ်ပြန်ချက်အပြီးပထမဆုံးလှုပ်ရှားမှုအဖြစ်အာဆီယံဥက္ကဌနဲ့အတွင်းရေးမှုးတို့ဒီနေ့နေပြည်တော်မှာမင်းအောင်လှိုင်နဲ့တွေ့ကြတယ်လို့ကြားတယ်။အစည်းအဝေးအပြီးတလကျော်ကြာမှလေးကန်နှေးကွေးစွာနဲ့မြန်မာပြည်ရောက်လာကြတယ်ထင်ပါတယ်။ခုလိုလာရောက်ဖို့တောင်အာဆီယံအဖွဲ့ထဲမှာအကြိတ်အနယ်ဆွေးနွေးခဲ့ရတယ်ဆိုပဲ။ဒီတခေါက်ကအကြိုသဘောမျိုးလာကြည့်တာနေမှာ။ခုထိအာဆီယံကိုယ်စားလှယ်ကိုတောင်မခန့်နိုင်သေးဘူး။အတော်အသုံးမကျတဲ့အဖွဲ့အစည်းပဲ။ခက်တာကနိုင်ငံတကာကလည်းမြန်မာ့အရေးကိုလောလောဆယ်အာဆီယံကိုလွဲထားတယ်ဆိုတော့မင်းအောင်လှိုင်တို့အကြိုက်ပေါ့။

ဒီနေ့NUGကပထမဆုံးအကြိမ်အွန်လိုင်းသတင်းစာရှင်းလင်းပွဲလုပ်တယ်။ဒီလိုရုန်းကန်ဆဲအခြေအနေမျိုးမှာNUGအနေနဲ့သတင်းစာရှင်းလင်းပွဲလုပ်နိုင်ဖို့ဆိုတာလွယ်တဲ့ကိစ္စတော့မဟုတ်ဘူး။နိုင်ငံတကာကသတင်းထောက်တွေရဲ့မေးခွန်းတွေအောက်မှာတော်ရုံအဖွဲ့အစည်းဆိုရင်လမ်းပျောက်သွားနိုင်တယ်။ NUG ကတော့အဆင်ပြေပြေလုပ်သွားနိုင်တယ်ပြောရမယ်။သူ့အနေနဲ့ကအမှန်တရားဘက်မှာရပ်တည်နေတာကိုး။စစ်ကောင်စီလိုအကြမ်းဖက်လိမ်လည်လှည့်ဖျားနေတာမှမဟုတ်တာ။သတင်းစာရှင်းလင်းပွဲမှာတော့ရိုဟင်ဂျာကိစ္စ၊PDFကိစ္စတွေအမေးများတယ်။ဒီကြားထဲစစ်ကောင်စီကအချိန်ကိုက်တပြည်လုံးကိုအင်တာနက်ဖြတ်ပြီးသတင်းစာရှင်းလင်းပွဲကိုနှောက်ယှက်သေးတယ်။အင်တာနက်ဖြတ်တာနဲ့ပတ်သက်ပြီးပြည်သူတွေကတော့ထင်ကြေးအမျိုးမျိုးပေးကြတာပါပဲ။ဘာပဲပြောပြောစစ်ကောင်စီက NUG ကိုလန့်နေပြီဆိုတာတော့သေချာတယ်။ ဒီနေ့နေလည်ဘက်ကရန်ကုန်အထွက်အမြန်လမ်း ZERO MILE မှာပစ်ခတ်မှုတွေဖြစ်သွားသေးတယ်။

ချင်းပြည်နယ်နဲ့စစ်ကိုင်းတိုင်းအနောက်ခြမ်းမှာစစ်သူပုန်တွေနဲ့ဒေသခံတွေကြားတိုက်ပွဲတွေဆက်ဖြစ်နေတယ်။စစ်ဘေးရှောင်တွေလဲပိုများလာတာပေါ့။မိုးဦးကလဲကျလာပြီးဆိုတော့စစ်ဘေးရှောင်တွေအတွက်အခက်အခဲတွေဖြစ်ပေါ်နေတယ်။စစ်သူပုန်တွေဟာဘယ်လောက်တောင်ယုတ်မာသလဲဆိုရင်စစ်ဘေးရှောင်တွေကိုအကူအညီပေးတဲ့သူတွေကိုဖမ်းဆီးတယ်၊ပစ္စည်းတွေကိုသိမ်းပစ်တယ်။နောက်ဆုံးမထင်ရင်မထင်သလိုလူကိုပါသတ်ပစ်တယ်။တကယ့်ဖက်ဆစ်စစ်တပ်ပဲ။ဒီကောင်တွေလက်အောက်ကဘယ်တော့များမှလွတ်မှာလဲ။

မနေ့ကအခြေခံပညာကျောင်းတွေစတက်ရတယ်။ဒါပေမယ့်ကျောင်းတက်နှုန်းကတနိုင်ငံလုံးမှာမှ၂၀ ရာခိုင်နှုန်းပဲရှိတယ်လို့သိရတယ်။စစ်ကျွန်ပညာရေးအောက်မှာဘယ်မိဘမှကိုယ့်ကလေးကိုစိတ်ချလက်ချကျောင်းမတက်ခိုင်းရဲဘူး။ကျောင်းတွေနားမှာလဲပေါက်ကွဲမှုတွေဆက်တိုက်ဖြစ်ပွားနေတယ်။စစ်ကောင်စီကပြည်သူတွေလုပ်တာဆိုပြီးထိုးချနေပေမယ့်တကယ်တမ်းကသူတို့လက်ချက်ပဲဆိုတာအကုန်သိနေတယ်။

ဆိုရှယ်မီဒီယာတွေမှာတော့ဒီလကစပြီးတော်လှန်ရေးကိုအရှိန်မြှင့်မယ်လို့ပြောဆိုနေကြတယ်။အင်တာနက်လိုင်းတွေပြီးခဲ့တဲ့လကတည်းကပြန်ဖွင့်ပေးလိုက်တော့တော်တော်များများလဲလိုင်းပေါ်ပြန်ရောက်နေကြပြီ။ မဖွင့်ပေးလို့လဲမရတော့ဘူးလေ။ အင်တာနက်မရှိတော့စီပွားရေးတွေအကုန်ရပ်ဆိုင်းကုန်တယ်။ ဒီနေ့မန္တလေးမှာစစ်သူပုန်တွေတပ်စွဲထားတဲ့နေရာတွေကိုပစ်ခတ်မှုတွေစတင်ဖြစ်ပွားလာတယ်။အရင်ဒါမျိုးကရန်ကုန်မှာပဲဖြစ်လေ့ဖြစ်ထရှိတာ။အခုမန္တလေးကိုကူးစက်သွားပီဆိုတော့လူတွေပြောသလိုတော်လှန်ရေးဟာတကယ်ပဲအရှိန်မြှင့်လာပြီလား။

ကယားမှာတိုက်ပွဲတွေဆက်ဖြစ်နေတယ်။ဒီနေ့ဆိုရင်စစ်သူပုန်တွေဘက်ကရဟတ်ယာဥ်တွေတောင်သုံးလာတယ်။ဒါပေမယ့်အကျအဆုံးများစွာနဲ့ပြန်ဆုတ်ရတာပါပဲ။ညနေပိုင်းမှာတော့စစ်သူပုန်တွေကိုခုခံဖို့ကယားပြည်နယ်တစ်ခုလုံးက PDF တွေအကုန်ပူးပေါင်းလိုက်ကြောင်းကြေငြာချက်ထွက်လာတယ်။ ကယားဟာစစ်ကောင်စီအတွက်ခက်ခဲနေဉီးမှာပါ။တိုက်ပွဲတွေဖြစ်နေတာဆယ်ရက်ကျော်လာပြီ။ခုချိန်ထိကယားကိုစစ်ကောင်စီမထိန်းချုပ်နိုင်သေးဘူး။ မကွေးတိုင်းပေါက်မြို့နယ်ဘက်မှာလဲတိုက်ပွဲတွေစဖြစ်နေပြီကြားတယ်။ စစ်နယ်မြေတွေဟာတဖြေးဖြေးနဲ့မြန်မာပြည်အလယ်ပိုင်းနားရောက်လာပြီ။

PDF တောင်ပိုင်းစစ်ဌာနချုပ်ရဲ့ပထမအကြိမ်စစ်သင်တန်းဆင်းပွဲအခမ်းအနားဗီဒီယိုဖိုင်ကို NUG ကထုတ်ပြန်လိုက်ပါတယ်။ မကြာမီလာတော့မည်ပေါ့။ ပြည်တွင်းမှာကိုဗစ်တွေ့နှုန်းကလဲပြန်လည်မြင့်တက်လာပါပြီ။သဘက်ခါဆိုစစ်ကောင်စီရဲ့ကျောင်းတွေလဲပြန်ဖွင့်ပြီ။ စစ်ကောင်စီရဲ့စီမံခန့်ခွဲမှုနဲ့ကိုဗစ်နဲ့စတွေ့တော့မှာပါ။

တိုင်းရင်းသားလက်နက်ကိုင်တွေနဲ့ထိစပ်နေတဲ့နယ်မြေတွေမှာလဲတိုက်ပွဲတွေဆက်တိုက်ဖြစ်ပွားနေတယ်။KIA/KNUနဲ့စစ်သူပုန်တွေတိုက်ပွဲမဖြစ်တဲ့နေ့မရှိသလောက်ပဲ။K2Kကပဲတိုက်ကွက်တွေဖော်နေတာ...စစ်ကောင်စီကတန်ပြန်တိုက်စစ်ဆင်နိုင်စွမ်းမရှိဘူး။အရင်လတွေကကျသွားတဲ့သူတို့စခန်းတွေပြန်သိမ်းနိုင်ဖို့မပြောနဲ့..အနားတောင်မကပ်နိုင်ဘူး။ ဒါတောင်စစ်ကောင်စီဖက်ကလေကြောင်းပစ်ကူပါနေလို့။လေကြောင်းပစ်ကူသာမရှိရင်မြို့တွေပါကျနေလောက်ပြီ။စစ်ကောင်စီဟာတစ်နိုင်ငံလုံးနေရာအစုံကိုတပ်ဖြန့်ထားရတယ်။အင်အားမလုံလောက်တော့ဘူး။ ရှိတဲ့အင်အားကလဲနေ့စ ဉ်နဲ့အမျှအရည်အသွေးရောအရည်အတွက်ပါကျဆင်းနေတယ်။ ဒါတောင် NUG PDF မလာသေးဘူး။ NUG PDF သာဝင်လာခဲ့ရင်အရေးတော်ပုံအောင်မြင်ဖို့မဝေးတော့ပါဘူး။

မနေ့ကရန်ကုန်ကြည်မြင်တိုင်မှာစစ်သူပုန်တွေကိုအမည်မသိသူတွေကပစ်ခတ်သွားတယ်။ဒီနေ့မနက်လဲသာကေတကစစ်သူပုန်တွေတပ်ဆွဲထားတဲ့နေရာမှာအလစ်ဝင်တိုက်ခံရတယ်။တခြားနေရာတွေမှာလဲအချိန်ကိုက်ပေါက်ကွဲမှုတွေဖြစ်တယ်။စစ်သူပုန်တွေဘယ်လိုက်လို့လိုက်ရမှန်းမသိဘူး။ရန်ကုန်မှာပျောက်ကျားတိုက်ခိုက်တဲ့ဗျူဟာတွေမြင့်လာပြီ။ နယ်တွေမှာလဲစစ်တပ်အားပေးကြံခိုင်ရေးပါတီကဒလန်သတင်းပေးလို့နာမည်ကြီးသူတွေဆက်တိုက်အစဖျောက်ခံနေရတယ်။ မန္တလေးမှာတော့ဒီရက်ပိုင်းသပိတ်တွေကလွဲလို့နည်းနည်းငြိမ်နေတယ်။

ကမ္ဘာကျန်းမာရေးအဖွဲ့ရဲ့နှစ်ပတ်လည်ညီလာခံကိုစစ်ကောင်စီရဲ့ကိုယ်စားလှယ်ကိုမဖိတ်ပဲပြုလုပ်လျက်ရှိပါတယ်။ ဒါဟာစစ်ကောင်စီကိုကမ္ဘာလုံးဆိုင်ရာအဖွဲ့အစည်းတွေကမထောက်ခံဘူးဆိုတဲ့သဘောပါ။ ပြီးတော့ပြည်တွင်းမှာအကျိုးတူပူပေါင်းလုပ်ကိုင်နေသောနိုင်ငံတကာရေနံကုမ္မဏီကြီးတွေဖြစ်တဲ့ပြင်သစ်ကတိုတယ်နဲ့အမေရိကန်ကချက်ဗရွမ်တို့ဟာစစ်ကောင်စီကိုပေးရမယ့်အမြတ်ငွေဒေါ်လာသန်းချီကိုမပေးပဲဆိုင်းငံထားလိုက်ပါပြီတဲ့။ဒါကိစ္စဟာနိုင်ငံတကာကမြန်မာပြည်သူတွေအစဉ်တစိုက်တောင်းဆိုနေတဲ့အချက်တစ်ခုပါ။အာဏာသိမ်းစစ်ကောင်စီဟာတဖြည်းဖြည်းအသက်ရှုကြပ်နေပါပြီ။