အာဏာသိမ်း ဒိုင်ယာရီ

မကွေးတိုင်း၊ပွင့်ဖြူမြို့နယ်မှာPDFတွေပါလာတဲ့ကားတစ်စီးကိုစစ်သူပုန်တွေခြုံခိုတိုက်ခိုက်လို့ကားပေါ်ပါသူ၁၂ယောက်ခန့်ကျဆုံးသွားပြီးလက်နက်တွေပါဆုံးရှုံးသွားတယ်။စစ်သူပုန်တွေကကားရှေ့တည့်တည့်ကလက်နက်ကြီးနဲ့ပစ်လို့ထိုမျှအကျအဆုံးများကုန်တာပဲ။ဒီကာလမှာPDFတွေဘက်ကတကြိမ်ထဲအကျအဆုံးအများဆုံးကဒီတခေါက်ဖြစ်မယ်ထင်တယ်။ထိုနယ်မြေဟာPDFစိုးမိုးနယ်မြေဖြစ်ပြီးစစ်သူပုန်တွေကအလစ်အငိုက်ချောင်းတိုက်တာဆိုတော့သတင်းပေါက်ကြားသွားတာလို့ယူဆရတယ်။ကိုယ့်လူတွေဖက်ကပေါ့ဆတာလဲပါတာပေါ့လေ။ တစ်ခုဖြေသာသွားတာကနေ့မကူးပဲစစ်ကိုင်းတိုင်း၊ခင်ဦးမြို့နယ်မှာစစ်သူပုန်အုပ်စုကိုPDFကအလစ်ချောင်းတိုက်လို့ရဲမှုးအပါအဝင်စစ်အုပ်စုဖက်က၁၃ယောက်ခန့်သေဆုံးသွားတယ်။လက်နက်တွေလဲရလိုက်တယ်။တိုက်ဆိုင်မှုလို့ဆိုပေမယ့်ကိုယ်တွေဘက်နစ်နာမှုပိုများတယ်။

NUGကသတင်းစာရှင်းလင်းပွဲလုပ်တယ်။သူတို့ပြောသွားတာကတော့မကြာမှီမှာတော်လှန်ရေးကိုအရှိန်မြင့်မယ်တဲ့။အရှိန်မြင့်မယ်လို့ပြောနေတာတကယ်တော့ကြာနေပြီ။လက်တွေ့မှာအခုထိဖြစ်မလာသေးဘူး။စစ်ရေးအရှိန်မြင့်ပြီးခုခံစစ်ကနေတိုက်စစ်ပြောင်းမယ်ဆိုရင်တလကိုဒေါ်လာဆယ်သန်းခန့်လိုတယ်လို့ပြောသွားသေးတယ်။အခုလောလောဆယ်တော့ဘွန်းနဲ့မင်းအောင်လှိုင်အိမ်ရောင်းရငွေကနေ၄၅သန်းလောက်ရနေပြီ။သန်း၅၀တောင်မပြည့်သေးတဲ့ဒီပမာဏဟာစစ်ရေးမှာသုံးမယ်ဆိုရင်ဘာမှမပြောပလောက်ဘူး။ဒါကြောင့်လက်ရှိအချိန်မှာအဓိကကငွေပဲ။ NUGကနည်းလမ်းပေါင်းစုံနဲ့ရှာဖွေနေတယ်ဆိုပေမယ့်အဖျားရှူးရှူးသွားတယ်။ရံပုံငွေရှာဖွေရေးပရောဂျက်တစ်ခုလုပ်ပြီဆိုရင်အစပိုင်းမှာတက်ကြွပေမယ့်နောက်ပိုင်းမှာသွေးအေးသွားတယ်။အခုရပ်တန့်ထားရတဲ့နွေဦးထီကသက်သေပဲ။NUG PAY ဟာလဲဘယ်လောက်ထိဖြစ်လာမလဲမပြောတတ်သေးဘူး။အခုချိန်ထိလဲနိုင်ငံတကာကဘာစစ်ရေးအကူအညီမှမရသေးဘူး။ငွေအလုံအလောက်မရှိရင်တော့တော်လှန်ရေးဟာကြာလိမ့်ဦးမယ်။

NUG ကသူ့ရဲ့ကိုယ်ပိုင်ငွေကြေးစနစ်ဖြစ်လာမယ့်NUG PAYကို Launch လုပ်တော့မယ်လို့ကြေငြာလိုက်ပြီ။ NUG PAY ဟာဒစ်ဂျစ်တယ်ငွေကြေးစနစ်တစ်ခုလဲဖြစ်လို့စစ်ကောင်စီကခြေရာခံလို့မရနိုင်ဘူး။NUG Pay အောင်မြင်ရင် တော်လှန်ရေးအောင်ဖို့ပိုမြန်မှာမို့ဝိုင်းပြီးသုံးဖို့လိုမယ်။ NUG Pay ရဲ့ ကြီးမားတဲ့အားသာချက်ကြီးတခုကတော်လှန်ရေးထောက်ပို့လမ်းကြောင်းတရားဝင်ပွင့်သွားပြီဖြစ်တယ်။အဓိကကတော့ပြည်တွင်းထဲပြည်သူတွေနဲ့တော်လှန်ရေးအဖွဲ့အစည်းကြားမှာ လုံခြုံပြီးစိတ်ချရတဲ့ ငွေလမ်းကြောင်းတခုကို နည်းပညာသုံးပြီး ဖန်တီးလိုက်ပြီဖြစ်လို့ တော်လှန်ရေးထဲ...

ဒီနေ့ဟာပြည်သူ့ခေါင်းဆောင်ဒေါ်အောင်ဆန်းစုကြည်မွေးနေ့ဖြစ်တယ်။မနှစ်ကလိုပဲပြည်သူတွေဟာနေရာအနှံ့အပြားမှာသူမမွေးနေ့အတွက်ဆုတောင်းမှုတွေပြုလုပ်ပေးကြတယ်။အခုဆိုရင်သူမဟာအသက်၇၇နှစ်ရှိနေပြီးဖြစ်ပြီးသူမရဲ့အချိန်အများစုကိုထောင်ထဲမှာပဲကုန်ဆုံးနေရတယ်။အခုလဲစစ်ကောင်စီဟာလောလောလတ်လတ်သူမကိုထောင်ဒဏ်ဆယ်နှစ်ခန့်ချပြီးပြီ။မတရားရင်ဆိုင်နေရတဲ့နောက်ထပ်အမှုများစွာလဲကျန်သေးတယ်။ဒီအရေးတော်ပုံသာမအောင်မြင်ရင်သူမဟာကျန်ရှိနေတဲ့လူ့သက်တမ်းကိုထောင်ထဲမှာပဲကုန်ဆုံးသွားဖို့ရှိမယ်။ဒါကြောင့်အရေးတော်ပုံအမြန်အောင်မြင်အောင်ကြိုးစားကြရမယ်။  

မေလ ၁၀ ရက်နေ့က စစ်သူပုန်တွေဟာ စစ်ကိုင်းတိုင်း မုံတိုင်ပင်ရွာသား စုစုပေါင်း၂၈ ဦးကို သတ်ဖြတ်ကာ အလောင်းများကို အိမ်နှင့်အတူမီးရှို့သွားခဲ့တယ်လို့  RFA ကထုတ်လွင့်သွားတယ်။ ဘုန်းကြီးကျောင်းတစ်ခုဝင်းအတွင်း လူငယ်၊ လူကြီး အရပ်သား ၃၀ ခန့်ကို သုံးတန်းစုပြီး...

ကမ္ဘာဘဏ်ကလာမယ့်နှစ်တွေအတွက်မြန်မာ့စီးပွားရေးအခြေအနေကိုမခန့်မှန်းနိုင်တော့ဘူးလို့ထုတ်ပြန်လိုက်တယ်။ပြီးခဲ့တဲ့နှစ်ကမြန်မာ့စီးပွားရေးဟာ၁၈ရာခိုင်နှုန်းကျုံဝင်သွားခဲ့ပြီးဒီနှစ်မှာလဲပြန်ကောင်းလာဖို့လမ်းမမြင်ဘူး။အာဆီယံနိုင်ငံတွေအားလုံးကိုဗစ်အလွန်မှာစီးပွားရေးအတက်ပြနေပေမယ့်မြန်မာနိုင်ငံကတော့အနုတ်ဂဏန်းအောက်ထိုးဆင်းလျက်ပဲ။ထိုင်းနယ်စပ်မှာဆိုတရားမဝင်ရွှေ့ပြောင်းမြန်မာနိုင်ငံသားအလုပ်သမားတွေထောင်ချီဖမ်းဆီးနေရလို့ထောင်တွေတောင်မဆန့်တော့ဘူး။ပြည်တွင်းမှာလူတန်းစားပေါင်းစုံဟာဘာမှလုပ်ကိုင်စားသောက်လို့မှမရတော့ပဲ။စစ်အာဏာသိမ်းပြီးတစ်နှစ်ကျော်အတွင်းမှာစီးပွားရေးဟာဗုံးဗုံးလဲပြိုဆင်းသွားပြီ။စစ်တပ်ကနိုင်ငံကိုအုပ်ချုပ်နေသ၍အဖတ်ဆယ်ဖို့ရလမ်းမမြင်ဘူး။

မကွေးတိုင်း၊ဂန့်ဂေါမြို့နယ်မှာစစ်တပ်ကCDMကျောင်းအုပ်၊သူနာပြုဆရာမ၊ကိုယ်ဝန်ဆောင်အမျိုးသမီးအပါအဝင်အရပ်သားပြည်သူငါးဦးကိုအရှင်လတ်လတ်မီးရှို့သတ်ဖြတ်သွားတယ်။သူတို့တွေဟာဘေးလွတ်ရာစစ်ဘေးရှောင်ရင်းစစ်သူပုန်စစ်ကြောင်းနဲ့တိုးပြီးသတ်ဖြတ်ခံလိုက်ရတာဖြစ်တယ်။တကယ်ဆိုသူတို့တွေဟာPDFပုံစံလဲပေါက်နေကြတာမဟုတ်ဘူး။အရပ်သားစစ်စစ်ဆိုတာသိသာနေတာပဲ။စစ်သူပုန်တွေဟာသူတို့အပြင်ရွာတွေကိုမီးတိုက်ရင်မပြေးနိုင်ပဲရွာထဲမှာကျန်ခဲ့တဲ့သက်ကြီးရွယ်အိုတွေပါမကျန်၊အိမ်မွေးတိရိစ္ဆာန်တွေပါမကျန်နေရာစုံမှာမီးရှို့သတ်ဖြတ်လေ့ရှိတယ်။ အခုဆိုရင်ဖျက်စီးခံလိုက်ရတဲ့ရွာတွေကအရွယ်ကောင်းလူငယ်တွေအကုန်PDFတွေဖြစ်ကုန်ပြီ။ဖက်ဆစ်စစ်တပ်ကိုနာကျည်းမှုတွေကအဆုံးစွန်ထိရောက်နေပြီ။စစ်တပ်အနေနဲ့ဒီလိုပြည်သူတွေကိုထိန်းနိုင်ဖို့ဘယ်လိုမှမဖြစ်နိုင်တော့ဘူး။

စစ်ကောင်စီကလက်နက်ချဖို့ဖိတ်ခေါ်နေပေမယ့်တကယ်တန်းလက်နက်ချအလင်းဝင်နေတာသူတို့တပ်သားတွေပဲ။ရခိုင်မှာစစ်ကောင်စီတပ်သားရာနဲ့ချီပြီးထွက်ပြေးလာတယ်လို့ရခိုင်လက်နက်ကိုင်အဖွဲ့အေအေကသတင်းစာရှင်းလင်းပွဲမှာပြောသွားတယ်။လောလောဆယ်မှာစစ်တပ်ဒုခေါင်းဆောင်စိုးဝင်းရောက်နေပြီးရခိုင်ကိုစစ်မျက်နှာသစ်ဖွင့်ဖို့ပြင်ဆင်နေတယ်။သူရောက်လာရင်တော့သေချာသလောက်ပဲ။ကရင်နဲ့ကယားတုန်းကလဲသူသွားပြီးနောက်တိုက်ပွဲတွေပြင်းထန်လာတာပဲလေ။ဘယ်လိုပဲဖြစ်ဖြစ်ရခိုင်မှာစစ်မျက်နှာသစ်ထပ်ဖွင့်ရင်တော့စစ်တပ်အတွက်အရှုံးကြီးပဲ။ပိုပြီးစစ်ပန်းလာလိမ့်မယ်။ အခုတောင်ကရင်ပြည်နယ်မြဝတီမြို့အဝင်ကရဲစခန်းတစ်ခုတိုက်ခိုက်သိမ်းပိုက်ခံရတယ်။စခန်းမှုးကိုပါအရှင်မိတယ်။ကယားမှာလဲတပ်အချိန်းအပြောင်းလုပ်တဲ့စစ်ကြောင်းအတိုက်ခိုက်ခံရပြီးလက်နက်ခဲယမ်းများစွာရရှိလိုက်တယ်။စစ်တပ်ဟာကရင်နဲ့ကယားမှာလက်နက်တွေအလှူပေးနေတာတော်တော်များနေပြီ။  

စစ်ကောင်စီကPDFတွေအလင်းဝင်ရင်အ‌ရေးမယူပဲကြိုဆိုမယ်လို့ကြေငြာလိုက်တယ်။နောက်နေ့မှာပဲPDFတွေလက်နက်အပ်အလင်းဝင်တဲ့သတင်းတွေထုတ်ပြန်တယ်။တောထဲကPDFတွေတကယ်အလင်းဝင်မယ်ဆိုရင်တောင်အဲ့လောက်မမြန်ဘူး။ပြီးတော့သတင်းထဲမှာပါလာတဲ့သူတွေကအိုကြီးအိုမတွေချည်းပဲ။စစ်ကောင်စီဟာဆိုက်ဝါးတွေနဲ့သတင်းအတုတွေဖန်တီးချင်ပေမယ့်ခေါင်းမရှိရှာဘူး။သူတို့ရဲ့ကြေငြာချက်ဟာသူတို့အားနည်းနေတာကိုဖုန်းကွယ်ချင်လို့ဖြစ်သလိုတော်လှန်ရေးဘက်တော်သားတွေကိုသွေးခွဲချင်တာလဲပါမယ်။အာဆီယံနိုင်ငံတွေနဲ့တွေ့ဆုံနေတဲ့အမေရိကန်နိုင်ငံခြားရေးအတွင်းဝန်တောင်စစ်တပ်ဟာပြည်တွင်းကလက်နက်ကိုင်တွေကိုမနိုင်တော့ဘူးလို့သုံးသပ်လိုက်ပြီ။ဒါဟာအမှန်တရားပဲ။ဒါပေမယ့်သူမနိုင်၊ကိုယ်မနိုင်အခြေအနေကြီးနဲ့ဇာတ်မြောနေမှာစိုးတယ်။  

ကိုဂျင်မီနှင့်ကိုဇေယျာသော်တို့ကိုသေဒဏ်ချမှတ်ထားတဲ့အမိန့်ကိုပြန်စဉ်းစားဖို့စစ်ခေါင်းဆောင်မင်းအောင်လှိုင်ကိုဟွန်ဆန်ကမေတ္တာရပ်ခံထားတယ်။စာ၏အဓိပ္ပာယ်လိုတိုရှင်းမှာ"ဒီလိုရုပ်ပျက်ဆင်းပျက်တွေဖြစ်နေရင်ငါလဲမင်းဘက်ကပြောပေးရခက်တယ်"ဆိုတဲ့အဓိပ္ပာယ်သာဖြစ်တယ်။ဒါပေမယ့်လဲစစ်ကောင်စီကိုဒါကိုပယ်ချလိုက်တယ်။စစ်ကောင်စီဟာနိုင်ငံတကာဖိအားကိုအခုထိလုံးဝဂရုမစိုက်ဘူးဆိုတဲ့သဘောပဲ။ဒါဟာလဲသူ့အလွန်မဟုတ်ဘူး။နိုင်ငံတကာကလဲနေ့စဉ်မီးရှို့ခံနေရသော၊သတ်ဖြတ်ခံနေရသောမြန်မာပြည်သူတွေအတွက်သူ့ကိုဘာအ‌ရေးယူမှုမှမရှိတာကိုး။အဲ့ဒီတော့သူလုပ်ချင်တာလုပ်နေတော့တာပဲ။နောက်ပိုင်းမှာတော့ဘယ်လိုဖိအားတွေပေးလာမလဲဆိုတာတော့ဆက်လက်စောင့်ကြည့်ရမှာပဲ။ ထင်ရာစိုင်းနေတဲ့စစ်ကောင်စီဟာတောရွာတွေသာမကပဲမြို့ကြီးတွေမှာပါအိမ်ကြီးအိမ်ကောင်းတွေကိုဖျက်စီးနေတယ်။မန္တလေးမြို့ဆင်ခြေဖုံးမြို့နယ်တွေကဂရမ်မရှိတဲ့အိမ်မှန်သမျှအကြောင်းပြချက်မရှိဘူဒိုဇာနဲ့ဖြိုချဖျက်စီးနေတာအတော်များနေပြီ။မြစ်ငယ်မှာဆိုဟိုတခေါက်ထဲကရပ်ကွက်တစ်ခုလုံးကုန်သွားပြီ။အခုထိကိုတခြားဆင်ခြေဖုံးရပ်ကွက်တွေမှာဖျက်စီးမှုတွေဆက်တိုက်ပြုလုပ်နေတယ်။