အာဏာသိမ်း ဒိုင်ယာရီ

ပြီးခဲသည့်စက်တင်ဘာလ အတွင်း သမိုင်းတလျှောက် အမြင့်ဆုံးဈေးနှုန်း အဖြစ် ၁ ဒေါ်လာလျှင် ကျပ် ၂၇၀၀ ကျော်အထိ ဖြစ်သွားခဲ့သည်/ ဧရာဝတီ မနေ့ကအလှူငွေကိစ္စဆက်ပြောရမယ်ဆိုရင်တော်လှန်ရေးမှာအလိုအပ်ဆုံးကတော့ငွေပဲ။လက်နက်ကိုင်တော်လှန်ရေးဆိုပိုတောင်လိုသေးတယ်။NUGကလဲဒီကိစ္စကိုအသည်းအသန်လုံးပန်းနေတယ်။ထီရောင်းတယ်၊ကံစမ်းမဲလက်မှတ်ရောင်းတယ်၊ဒါပေမယ့်အဲ့ဒီကရတာတွေကတပွဲထိုးတစ်ခါပဲရမယ့်ငွေတွေဖြစ်နေတယ်။ပမာဏအားဖြင့်လဲNUGအတွက်ဆင့်ပါးစပ်နှမ်းပက်သလောက်ပဲဖြစ်နေတယ်။ရေရှည်ပုံမှန်ငွေရမယ့်နည်းလမ်းကတော့အခွန်ကောက်တာပဲ။တော်လှန်ရေးကရေရှည်သွားရမှာကိုး။ LocalPDFတွေအတွက်ကတော့ပြည်သူတွေလှူဒါန်းတဲ့အလှူငွေကိုပဲအားပြုနေရတယ်။ဘက်ဂျက်လုံလုံလောက်လောက်မရှိတာမို့ရင်ဆိုင်တိုက်ပွဲတွေမဆင်နွဲနိုင်သေးပဲပျောက်ကျားစနစ်နဲ့သာသွားနေရတယ်။တသက်လုံးပျောက်ကျားတိုက်နေလို့မရတဲ့အတွက်ရေရှည်မှာဘယ်လိုဖြစ်လာမလဲဆိုတာတော့စဥ်းစားရခက်တယ်။

ခုတလောတော်လှန်ရေးအဖွဲ့တွေအတွက်အလှူငွေကောက်ခံတဲ့ကိစ္စမှာအငြင်းပွားဖွယ်ရာတွေဖြစ်ပေါ်နေတယ်။တနိုင်ငံလုံးကPDF  တွေရှင်သန်လှုပ်ရှားနိုင်ဖို့ကပြည်တွင်းပြည်ပကမြန်မာတွေရဲ့အလှူငွေတွေအပေါ်မှာတိုက်ရိုက်မူတည်နေတာပါ။အထူးသဖြင့် NUG နဲ့ချိတ်ဆက်မထားတဲ့ Local PDF တွေအတွက်အတော်အရေးပါတယ်။နိုင်ငံတကာအကူအညီဆိုတာကလဲခုချိန်ထိဘာမှဖြစ်မလာသေးပါဘူး။ ဒီအခြေအနေမှာအလှူခံတဲ့သူရဲ့ပုံရိပ်ပေါ်မူတည်ပြီးယုံကြည်မှုတည်ဆောက်ကြရတယ်။တချို့ကလဲအကွက်ကျကျအယုံသွင်းပြီးအလှူငွေတွေကိုလိမ်သွားတဲ့ကိစ္စတွေပေါ်ပေါက်လာတယ်။ ယုံကြည်မှုတည်ဆောက်ဖို့ဖို့အတွက်တချို့တွေကပြန်လည်ဖြေရှင်းနေကြတယ်။ဘာပဲလုပ်လုပ်ယုံကြည်မှုကအရေးကြီးတယ်လေ။ဒီပြသာနာဟာလဲသိပ်ကြီးကြီးမားမားဖြစ်လာမှာမဟုတ်ဘူး။ပြည်သူတွေရဲ့အသိဥာဏ်ကဒီခေတ်မှာမြင့်မားနေပြီလေ။

အာဆီယံကိုယ်စားလှယ်ရဲ့မြန်မာပြည်လာမယ့်ခရီးစဥ်ကိုနောက်ဆုံးမိနစ်မှာပဲဖျက်သိမ်းလိုက်တယ်။အာဆီယံကိုယ်စားလှယ်ကဒေါ်အောင်ဆန်းစုကြည်နဲ့တွေ့ဖို့တောင်းဆိုတာကိုစစ်ကောင်စီကလုံးဝလက်မခံပဲတော်လှန်ရေးနဲ့ဘာမှမဆိုင်တဲ့ဒုသမ္မတ၊လွှတ်တော်ဥက္ကဌနဲ့သာပေးတွေ့လို့ခရီးစဥ်ပျက်သွားတယ်ပြောတယ်။ဒါတောင်စစ်ကောင်စီကအာဆီယံကိုမလိမ့်တပတ်လုပ်ချင်သေးတာ။တကမ္ဘာလုံးကဖိအားတွေဝိုင်းပေးထားကြတော့အာဆီယံဟာလဲစစ်ကောင်စီကိုအရင်လိုအလျော့မပေးနိုင်တော့ဘူး။လက်ရှိအခြေအနေမှာဆက်လက်စောင့်ကြည့်ရမှာကဒီလကုန်မှာကျင်းပမယ့်အာဆီယံထိပ်သီးအစည်းအဝေးမှာမင်းအောင်လှိုင်ကိုပေးတက်မတက်ဆိုတာပဲ။

ဒီနေ့အလုပ်ကိစ္စတစ်ခုနဲ့အစိုးရဘဏ်ကိုရောက်ဖြစ်တယ်။လူတွေများမြင်မကောင်းဘူး၊ဘဏ်ထဲခြေချစရာနေရာတောင်မရှိဘူး။ဒီကြားထဲဘဏ်အပြင်မှာတစ်ခါ၊ဘဏ်ထဲမှာတစ်ခါနှစ်ဆင့်တန်းစီရသေးတယ်။လာသမျှလူတွေအကုန်နီးပါးကငွေထုတ်တွေချည်းပဲ။အချိန်အကြာကြီးစောင့်ရသေးတယ်။ရတော့တစ်လကိုသုံးသိန်းတဲ့။ကိုယ်အပ်ထားတဲ့ငွေကိုခုလိုဒုက္ခမျိုးစုံခံပြီးထုတ်တာတောင်အပြည့်ထုတ်ခွင့်မရပဲခွဲတမ်းနဲ့ထုတ်နေရတာအာဏာသိမ်းပြီးကတည့်ကပဲ။ဒီလကဒေါ်လာစျေးတွေတက်ကုန်တော့ငွေထုတ်တဲ့သူတွေပိုများလာတယ်လို့ပြောကြတယ်။ဘဏ်ထဲမှာနေရင်တန်ဖိုးကျနေမဲ့အစားငွေထုတ်ပြီးတစ်ခုခုဝယ်ထားရမယ်လို့တွေးကြတာပေါ့။စစ်ကောင်စီမှာလဲပေးစရာငွေမကျန်တော့ဘူး။လူတွေကလဲဘဏ်ကိုအယုံအကြည်မရှိတော့ဘူး။တွေးကြည့်ရင်စိတ်ညစ်စရာကြီးပဲ။

စစ်ကောင်စီဟာစစ်ကိုင်းတိုင်း၊မကွေးတိုင်းနဲ့ချင်းပြည်နယ်ကိုတပ်အင်အားတွေအများအပြားဖြည့်တင်းနေတယ်။အဲ့ဒီဒေသတွေကိုမကြာမီမှာစစ်ဆင်ရေးအကြီးအကျယ်လုပ်ဖို့ရှိလိမ့်မယ်။ဒေသခံPDF တွေကလဲရသလောက်ခုခံကာကွယ်နေတယ်။စစ်ကောင်စီတပ်တွေသွားရာလမ်းတလျှောက်မိုင်းတွေတဝုန်းဝုန်းကွဲနေတယ်။ ထိတွေ့မှုအများဆုံးဖြစ်ပွားနေတဲ့ဒေသကတော့စစ်ကိုင်းတိုင်းပဲ။ စစ်သူပုန်တွေတိုက်ပွဲမှာသေဆုံးနှုန်းကလဲသိသိသာသာမြင့်တက်လာနေတယ်။အချက်အတွေအရNUGကခုခံစစ်မကြေငြာမီစက်တင်ဘာ၇ရက်ရှေ့ပိုင်းမှာတရက်ကိုနှစ်ဆယ်ပတ်ဝန်းကျင်သာရှိရာကနေခုခံစစ်ကြေငြာပြီးနောက်ပိုင်းတရက်ကိုသုံးဆယ်နှုန်း၊ဒီလထဲမှာဆိုခြောက်ဆယ်နှုန်းလောက်ထိမြင့်တက်လာတယ်။ရှေ့လျှောက်ဒီထက်ပိုတက်လာဖို့ပဲရှိမယ်။ကြာရင်သူတို့တွေလုံးပါးပါးလာတော့မယ်။ လေ့လာသူတွေကတော့အောက်တိုဘာ၊နိုဝင်ဘာ၊ဒီဇင်ဘာသုံးလဟာစစ်ရေးအရအဆုံးအဖြတ်လို့သုံးသပ်ကြတယ်။ဘာတွေဆက်ဖြစ်လာမလဲဆိုတာကတော့ရင်ခုန်စိတ်လှုပ်ရှားဖွယ်ကောင်းနေပါပြီ။

ပြီးတဲ့လကုန်ပိုင်းကထိုးတက်ခဲ့တဲ့ဒေါ်လာစျေးနဲ့ရွှေစျေးဟာစစ်ကောင်စီလက်အောက်ခံဗဟိုဘဏ်ရဲ့ဆေးမှီးတိုကုစားမှုတွေကြောင့်မတက်ခင်အခြေအနေကိုတော့ပြန်ရောက်လာပြီ။ဒေါ်လာစျေးကနှစ်ထောင်ဝန်းကျင်၊ရွှေစျေးက၁၉သိန်းဝန်းကျင်ပေါ့။ဒါပေမယ့်ပြန်မကျတော့တာကစက်သုံးဆီစျေးနှုန်းနဲ့ကုန်စျေးနှုန်းတွေပဲ။အဲ့ဒါတွေကပြည်သူလူထုကိုတိုက်ခိုက်ထိခိုက်နေတာဆိုတော့လူတိုင်းဟာကြပ်တည်းနေကြတယ်။ ဒေါ်လာစျေးပြန်ကျနေတာလဲခဏပဲဖြစ်လိမ့်မယ်။အဓိကအကြောင်းရင်းဖြစ်တဲ့ပို့ကုန်နဲ့ကုန်သွယ်ရေးကိုတိုးတက်အောင်မလုပ်ဆောင်နိုင်သ၍တချိန်ချိန်မှာပြန်တက်လာမှာပဲ။စစ်ဖြစ်ခါနီးအခြေအနေမှာထိုအရာတွေကိုတိုးတက်အောင်လုပ်ဖို့ဆိုတာလဲဘယ်လိုမှမဖြစ်နိုင်ပါ။အခုဆိုတရုတ်ဘက်လဲနယ်စပ်ဂိတ်တွေအကုန်ပိတ်လိုက်ပြီဆိုတော့ကုန်သည်တွေ၊တောင်သူတွေ၊ကားသမားတွေဒုက္ခရောက်ကြလိမ့်ဦးမယ်။

EUပါလီမန်ကမဲခွဲဆုံးဖြတ်ပြီးNUGကိုထောက်ခံကြောင်းကြေငြာချက်ကဒီနေ့အတွက်အတော်မင်္ဂလာရှိတဲ့သတင်းပဲ။ဥရောပကနိုင်ငံပေါင်းနှစ်ဆယ်ကျော်နဲ့ဖွဲ့စည်းထားတဲ့EUဆိုတာUNပြီးရင်ကမ္ဘာမှာဩဇာအကြီးဆုံးအဖွဲ့အစည်းပဲ။သူ့ဆီကဒီလိုသဘောထားမျိုးပြလာတာဟာတော်လှန်ရေးကိုအတော်ရှေ့ရောက်သွားစေလိမ့်မယ်။ အမေရိကန်ကကိုတော့ခုထိNUGကိုထောက်ခံဖို့နှာစေးနေတုန်းပဲ။အရင်တုန်းကUNကဘာမှသုံးစားမရမှန်းသိလို့USကိုအားကိုးမိသေးတယ်။ခုတော့ဂျိုးဘိုင်ဒင်ရဲ့မပြတ်သားမှုတွေ၊မရေရာမှုတွေကြောင့်သူ့နိုင်ငံရေးပြသနာတွေမှာတင်လည်ထွက်နေလေရဲ့။ ဘာပဲဖြစ်ဖြစ်ဒီရက်ပိုင်းနိုင်ငံတကာရေးရာမှာဆက်တိုက်ကောင်းသတင်းတွေကြားနေရတယ်။

စစ်ခေါင်းဆောင်မင်းအောင်လှိုင်ရန်ကုန်ရောက်နေလို့တမြို့လုံးစစ်ခွေးတွေခြေရှုပ်နေကြတယ်။ရန်ကုန်ကလမ်းမကြီးတွေပေါ်မှာလမ်းဆုံတိုင်းမှာသူတို့တွေချည်းပဲ။ဆင်ခြေဖုံးမြို့နယ်တွေမှာဆိုရင်ဆိုင်ကယ်တွေလုံးဝပေးမစီးတော့ဘူး။အတင်းလိုက်ဖမ်းနေတယ်။မင်းအောင်လှိုင်သွားလေရာဘယ်နေရာမှအကျိုးမပေးဘူး။ရန်ကုန်ရောက်တုန်းလေးသူ့ကိုဦးတည်တဲ့တိုက်ခိုက်မှုတွေဖြစ်သွားစေချင်တယ်။ခုတောင်တော်တော်ကြောက်နေတာ။သူ့လမ်းကြောင်းကိုသူ့လူတွေတောင်ကြိုမပြောပဲထိပ်တန်းလျှို့ဝှက်လုပ်ထားတယ်တဲ့။ မင်းအောင်လှိုင်ဟာလူကြားကောင်းအောင်အရည်မရမဖတ်မရခရီးစဥ်တွေထွက်နေတဲ့အချိန်မှာပဲစစ်ကိုင်းတိုင်းကတိုင်းမှုးကတော့ထိန်းသိမ်းခံလိုက်ရတယ်။PDFတွေကိုမထိန်းချုပ်နိုင်လို့ဆိုပြီးစစ်အုပ်စုကခေါင်းစဉ်တက်ပေမယ့်ထိုတိုင်းမှုးဟာCDMလုပ်ဖို့ကြိုးစားနေရင်းဖမ်းခံရတယ်လို့လဲကြားတယ်။စစ်ကြောရေးမှာလက်လွန်ပြီးသေဆုံးသွားပြီးလို့လဲသတင်းတွေထွက်နေတယ်။ဘယ်လိုပဲဖြစ်ဖြစ်တိုင်းမှုးအဆင့်ထိအရေးယူခံနေရပြီးဆိုတော့စစ်အုပ်စုထဲမှာအပ်ကြောင်းတော့ထတာကျိန်းသေတယ်။ပြည်သူတွေအတွက်ကတော့အမြတ်ပဲ။

ဒေါ်အောင်ဆန်းစုကြည်နဲ့တွေ့ခွင့်မပေးလို့ဆိုပြီးအာဆီယံကစစ်ကောင်စီကိုလူရာမသွင်းဖို့စဉ်းစားနေပြီ။အာဆီယံနဲ့ပူးပေါင်းဆောင်ရွက်မှုမရှိဘူးဆိုရင်ဒီလကုန်မှာကျင်းပမယ့်အာဆီယံထိပ်သီးအစည်းအဝေးမှာစစ်ကောင်စီကိုတက်ရောက်ခွင့်မပေးဘူးလို့လေသံပစ်ထားတယ်။တကယ်လုပ်မလုပ်ကတော့စောင့်ကြည့်ရမှာပဲ။အာဆီယံဆိုတာသိပ်ယုံရတာမဟုတ်ဘူး။ ပြင်သစ်မှာတော့NUGကိုထောက်ခံဖို့အောက်လွှတ်တော်မှာမဲခွဲဆုံးဖြတ်လိုက်ပြီ။အထက်လွှတ်တော်မှာဆက်လက်မဲခွဲပြီးပြင်သစ်အစိုးရကသာဒါကိုအတည်ပြုရင်တော်လှန်ရေးအတွက်အများကြီးကောင်းသွားနိုင်တယ်။ အမေရိကန်မှာလဲစစ်ကောင်စီကိုပိတ်ဆို့မှုတွေထပ်လုပ်ဖို့Burma Artကိုပြဌာန်းဖို့လုပ်နေကြပြီ။ နိုင်ငံတကာကတော့စစ်ကောင်စီကိုတရစ်ချင်းစီတိုးတိုးကြပ်နေပြီ။

ခန့်အပ်ခံထားပြီးကတည်းကပျောက်ချင်းမလှပျောက်နေတဲ့အာဆီယံကိုယ်စားလှယ်ကဒီနေ့ထယောင်တယ်။စစ်ကောင်စီကသူ့ကိုဒေါ်အောင်ဆန်းစုကြည်နဲ့ပေးမတွေ့စိတ်ပျက်နေတယ်တဲ့။ဒေါ်အောင်ဆန်းစုကြည့်နဲ့တွေ့ခွင့်ရဖို့အရေးတောင်မာမာထန်ထန်မပြောနိုင်တဲ့အာဆီယံပါ။ တဖက်မှာလဲဒေါ်အောင်ဆန်းစုကြည်ဟာစစ်ကောင်စီမတရားအမှုဆင်ထားတဲ့အမှုအနည်းဆုံးငါးခုလောက်ကိုရင်ဆိုင်ဖြေရှင်းနေရတယ်။ဦးဖြိုးမင်းသိန်းပါသူမအမှုထဲစွဲထည့်ခံနေရတယ်။သူမကိုဘယ်မှာဖမ်းဆီးထားမှန်းလဲသေချာမသိဘူး။ မင်းအောင်လှိုင်ဟာဒေါ်အောင်ဆန်းစုကြည်အပေါ်သူ့ဆရာသန်းရွှေထပ်ကိုအငြိုးကြီးစွာထားနေပုံရတယ်။ဆင်ထားတဲ့အမှုတွေအရဒေါ်အောင်ဆန်းစုကြည်ဟာသူမရဲ့ကျန်တဲ့လူ့သက်တမ်းကိုထောင်ထဲကုန်ဆုံးသွားမှာဖြစ်တယ်။သူမအတွက်ဘယ်လိုမှမတရားဘူး။ဒါကြောင့်တော်လှန်ရေးဟာမြန်မြန်အောင်မြင်မှသူမလွှတ်မြောက်နိုင်လိမ့်မယ်။