အတွေးအမြင်စစ်​ကောင်စီ၏ဗီဇကို ထပ်​ဖော်ပြ​လိုက်​သော ရေ​ဘေး

ယောနသံ/People’s Spring

အာဏာသိမ်းခေါင်းဆောင်၏ မျက်နှာဖုံးကို နေပြည်တော်တွင်သူများက စက်တင်ဘာ ၁၁ရက်​နေ့မှာ မိုးထဲရေထဲတွင် ခွာချလိုက်သည်။

အာဏာသိမ်း​ခေါင်းဆောင်နှင့် စစ်အုပ်စုက ပြည်သူများအ​ပေါ် ရက်စက်ယုတ်မာမှု ၊တာဝန်မဲ့မှု၊ ​စေတနာမဲ့မှု ၊အရည်အချင်း မရှိမှု တို့ကို ၎င်းနှင့် အနီးဆုံးရှိ​နေ​သော ​ဇေယျာသီရိ၊ ပုဗ္ဗသိရီ၊ ပျဥ်းမနား ၊တပ်ကုန်း နှင့် ရမည်းသင်း မြို့နယ် တို့မှဒေသခံပြည်သူများက မျက်ဝါးထင်ထင်ထပ်မံ မြင်​တွေ့ခဲ့ကြသည်။

ထိုဖြစ်စဉ်သည် အာရှတိုက်အတွင်း လတ်တလောနာမည်ကြီးနေသည့် ယာဂီတိုင်ဖွန် မုန်တိုင်းနှင့် တိုက်ရိုက်သက်ဆိုင်သည်။ တိုင်ဖွန်း ယာဂီအရှိန်ကြောင့် မြန်မာနိုင်ငံဒေသအများအပြား၌ စက်တင်ဘာလ ၉ ရက်မှစ၍ မိုးသည်းထန်စွာရွာခဲ့သည်။ မုန်တိုင်းမှအကြွင်းအကျန် ဧရာမတိမ်တိုက်ကြီးသည် မြန်မာနိုင်ငံကိုဖြတ်သန်းစဉ် မိုးရွာစေခြင်းဖြစ်သည်။

Public Service Announcement

မိုးအများဆုံးရွာသည့် ရှမ်းပြည်နယ်အရှေ့ပိုင်းတွင် စက်တင်ဘာလ၁၀ရက်မနက်မှစ၍ ရေဘေးကြုံခဲ့သည်။ ထို့နောက်တွင် ရှမ်းပြည်နယ်တောင်ပိုင်း၊ မန္တလေးတိုင်းတို့၌ မိုးဆက်ရွာပြီး ရေးဘေးသင့်ဧရိယာကျယ်ပြန့်လာသည်။

စစ်ကောင်စီသည် လက်ရှိ​ရေ​ဘေးနှင့်ပတ်သက်၍ အ​ရေး​ပေါ် သတင်းထုတ်ပြန်မှုသတိ​ပေးမှုမလုပ်ခဲ့ပါ။ ထို့အပြင် ​ရေ​ဘေးကယ်ဆယ်ရေးအတွက် ကြိုတင်ပြင်ဆင်မှုလုံးဝမရှိခဲ့ကြောင်း ရေ ဘေးသင့်ဒေသမှ ပြည်သူများ နှင့် အရပ်ဖက်အဖွဲ့အစည်းအချို့ကတညီတညွတ်တည်း​ပြောသည်။

စစ်​ကောင်စီက ​ရေ​ဘေးကယ်ဆယ်​ရေးအတွက်ကြိုတင်ပြင်ဆင်မှုလုံးဝမလုပ်ဘဲ ထိုအစား ​လေယာဥ်များ ၊ရဟတ်ယာဥ်များဖြင့် ပြည်သူများကိုပါပစ်မှတ်ထား၍နိုင်ငံတစ်ဝန်း ဗုံးကြဲသတ်ဖြတ်​သော အမှုကိုသာ အာရုံစိုက်လုပ်​နေချိန်တွင် ​ရေ​ဘေးက ​ရောက်လာခြင်းဖြစ်သည်။

ရှမ်းပြည်နယ်၊ကရင်ပြည်နယ်၊မွန်ပြည်နယ်၊မန္တလေးတိုင်း၊ ပဲခူးတိုင်း၊ မကွေးတိုင်းတို့မှ မြို့နယ်၄၀ ထက်မနည်း ရေဘေးကြုံတွေ့​နေ​သော်လည်း စက်တင်ဘာလ ၁၁ရက်ထုတ် စစ်ကောင်စီဝါဒဖြန့်သတင်းစာမျက်နှာဖုံးများတွင် ရေဘေးသတိပေးချက်လုံးဝမပါဝင်ပါ။

စစ်​ကောင်စီလက်​အောက်ခံ မိုး​လေဝသနှင့် ဇလ​​ဗေဒဦးစီးဌာနသည်ပင် ၎င်းတို့ရုံးလည်းရှိ​သော ​နေပြည်​တော် ဝန်ကျင်းဆိုးရွာစွာ​ရေကြီး​တော့မည်ကို ကြိုတင်မသိခဲ့ပါ ။ထို​ကြောင့် စက်တင်ဘာ ၁၀ ရက်အထိ စစ်​တောင်းမြစ် ၊ သံလွင်မြစ် ၊ငဝန်မြစ်​ ၊ရေကြီးနိုင်​ကြောင်းသာသတိ​ပေးခဲ့သည်။​နေပြည်​တော်ဝန်းကျင်နှင့်တပ်ကုန်း ၊ရမည်းသင်း စသည့်တို့ ​ရေကြီးလာ​တော့မည်ကို သတိမ​ပေးခဲ့ပါ။

ပဲ နှင့် ချည်မျှင်အထွက်နှုန်းများကောင်း​​နေကြောင်း၊ ဗုဒ္ဓပူဇနိယပွဲတော် ပျော်ရွှင်စွာ ကျင်းပနေကြောင်း၊ သန်းခေါင်စာရင်းကောက်မည်အကြောင်းများသာ မျက်နှာဖုံးတင်ထားသည်။

အမှန်တကယ်တွင် စက်တင်ဘာ ၁၁ ရက် သည် နိုင်ငံနှင့်အဝှမ်း ဆိုးရွားသည့်ရေဘေးကြုံတွေ့နေခြင်းဖြစ်ပြီး စစ်​ကောင်စီ ရုံထိုင်​သော နေပြည်တော် အနီးတဝိုက်တွင်လည်း စံချိန်တင် ရေဘေးကြုံတွေ့နေသည်။ ပုဗ္ဗသိရီ၊ ​ဇေယျာသီရီ ၊ ပျဥ်းမနား ၊ရမည်းသင်း နှင့် တပ်ကုန်းမြို့မှ‌ရေဘေးသင့်ဒေသခံများမှပြည်သူ အချို့သာ ဘေးလွတ်ရာသို့အချိန်မီ ထွက်ပြေးနိုင်ခဲ့သော်လည်း အများစုသည် နေအိမ်များအတွင်း၌ပိတ်မိနေခဲ့သည်။

ကြည့်နေရင်း တရိပ်ရိပ်တက်လာသော ရေများကြောင့် အိမ်ခေါင်မိုးများ၊ သစ်ပင်များပေါ်တက်နေကြရသည်။ နေပြည်တော်သတင်းစုံ၊တပ်ကုန်းသူ/သားတို့ဆုံဆည်းရာ၊ နေပြည်တော်အသိုင်းအဝိုင်းစသည့် facebook လူမှုကွန်ရက်စာမျက်နှာများတွင် ရေဘေးကယ်ဆယ်‌ ရေးအကူအညီတောင်းခံမှုများ ယနေ့တနေကုန် ပလူပျံနေသည်။

အရပ်ဖက်ကယ်ဆယ်ရေးအဖွဲ့များ ၊ပရဟိတအဖွဲ့များ၊ မီးသတ်တပ်ဖွဲ့များတွင်လည်း စက်ပစ္စည်းအင်အား၊ လူအင်အား မလောက်ငကြသလို အချိန်မီလည်း မကယ်ဆယ်နိုင်ခဲ့ကြပေ။ လာရောက်ကယ်တင်ပေးပါရန် အကူအညီတောင်းသူများထံသို့ အချိန်မီရောက်မသွားနိုင်ခဲ့ကြပေ။ ညမိုးချုပ်မှ အကူအညီရသူများရှိသလို အကူအညီမရဘဲ နေအိမ်ခေါင်မိုးများ၊ သစ်ပင်များပေါ်၌ ပိတ်မိနေသူများလည်းရှိသည်။

​နေပြည်​တော်အနီးတဝိုက်ကိုပင် အ​ရေး​ပေါ်ကယ်ဆယ်​ရေး ​​မလုပ်နိုင်သဖြင့် ​ရေကြီးလွှမ်းမိုးမှု ပထမရင်ဆိုင်ရ​သော တာချီလိတ်မြို့အပါအဝင် ရှမ်းပြည်နယ်အရှေ့ပိုင်းမြို့နယ်များ၊ ကလော ၊အောင်ပန်းမြို့နယ်အပါအဝင် ရှမ်းပြည်နယ်တောင်ပိုင်းမြို့နယ်များမှ ပြည်သူများကိုမူ စစ်​ကောင်စီကစာရင်းပင်သွင်းမည်မထင်​ပေ။

နေပြည်တော်ကောင်စီနယ်မြေအတွင်းရေဘေးတွင် အိမ်အလုံးလိုက်မျောပါသွားသူများ၊ တောင်ကျရေနဲ့မျောပါသေဆုံးသူများ၊ ကယ်ဆယ်ရေးစက်လှေမှောက်၍ကလေးငယ်သေဆုံးမှုများ၊ သစ်ပင်ပေါ်တက်စဉ် ပြုတ်ကျ၍သေဆုံးမှုများရှိနေကြောင်း နေပြည်တော်အသိုင်းအဝိုင်းလူမှုကွန်ရက်စာမျက်နှာများတွင် ကာယကံရှင်မိသားစုဝင်များက ရေသားနေကြသည်။ အသက်လုပြေးနေရသည့်အရေးပေါ်အခြေအနေတွင် သေဆုံးသူစာရင်းကို မသိရှိရသေးပေ။

ပုဗ္ဗသိရိမြို့နယ်အတွင်း သစ်ပင်ပေါ်၌ပိတ်မိနေသူများကို လူမှုရေးအဖွဲ့တစ်ခုကသွားရောက်ကယ်ဆယ်ရာ ရေထဲသို့ ၂ ဦးပြုတ်ကျ သေဆုံးသွားကြောင်း အမျိုးသမီးတစ်ဦးက ငိုယိုပြောဆိုနေသည်ကိုတွေ့ရသည်။ အဖေ၊ ဦးလေး၊ ညီ၊ ညီမ၊ ဒေါ်လေးစသဖြင့် မိသားစု ​ဆွေမျိုးများ ရေစီးနှင့်မျောပါသွား၍ တွေ့ရှိပါကကယ်ဆယ်ပေးကြပါရန် လူမှုကွန်ရက်တွင် ပြည်သူ အချင်းချင်းအကူအညီတောင်းခံကြသည်။

အရှိန်ပြင်းပြင်းစီးနေသည့် နီကျင့်ကျင့်တောင်ကျရေများက ချောင်းကူးတံတားအချို့ကို ချိုးဖျက်သွားခဲ့သည်။ ရေစီးနှင့်အတူ အိမ်မွေးတိရိစ္ဆာန်အချို့နှင့် အိမ်သုံးပစ္စည်းအချို့ မျောပါသွားသည်ကိုတွေ့ရသည်။

အာဏာသိမ်း ခေါင်းဆောင် နှင့်စစ်​ကောင်စီသည် ၎င်းနှင့်အနီးဆုံးနေရာတွင်ရှိနေသည့် ရေဘေးသင့်ပြည်သူများထံသို့ ကူညီကယ်ဆယ်ရေးအဖွဲ့များ ပို့ဆောင်ခြင်းမရှိခဲ့ပေ။ မြင်သာသည့်ကယ်ဆယ်ရေးလုပ်ဆောင်မှုလည်း မတွေ့ရပေ။ NLDပါတီထောက်ခံမှုများသည့်ရွာများကို သွားရောက်မကူညီကြရန် စစ်အုပ်စုလူမှုကွန်ရက်စာမျက်နှာများတွင် လှုံ့​ဆော် ရေးသား​နေကြသည်ကိုပင်​တွေ့ရသည်။

ရေ‌ဘေးသင့်ပြည်သူများ တစ်နေကုန်အသက်လုနေခဲ့ကြရပြီး ညနက်ပိုင်းအထိ ရေက တရိပ်ရိပ်ဆက်‌တက်နေချိန်မှသာ စစ်ကောင်စီက ရေဘေးသတိပေးချက်တခု ထုတ်ပြန်လာသည်။

“ရာဂီမုန်တိုင်းအရှိန်ကြောင့် ပျဉ်းမနားမြို့နယ်အတွင်း ဖြတ်သန်းစီးဆင်းလျက်ရှိသော ငလိုက်ချောင်း၊ ဆင်သေချောင်းနှင့် ပေါင်းလောင်းမြစ်များတွင် ရေမြင့်တက်လျက်ရှိသဖြင့် အနိမ့် ပိုင်းဧရိယာများနှင့် ကျေးရွာများအနေဖြင့် ရေဘေးအန္တရာယ် သတိပြုနေထိုင်ကြပါရန် တိုက်တွန်း နိုးဆော်ချက်” ဟုဆိုကာ စက်တင်ဘာလ ၁၁ ရက်၊ ည ၈နာရီတွင် သတိပေးချက်ထုတ်ပြန်ခဲ့သည်။ ထိုသတိပေးချက်သည် ၂ရက်တိတိ နောက်ကျခဲ့ပြီဖြစ်သည်။ ညကြီးမင်းကြီးသတိပေးချက်တွင် ကြိုတင်ကာကွယ်ရေးများ မည်သို့မျှမလုပ်တတ်တော့ကြောင်း လူမှုကူညီရေးအဖွဲ့အချို့ကငြီးတွားသည်။

ယာဂီမုန်တိုင်းသည် တရုတ်နှင့်ဗီယက်နမ်နိုင်ငံကို တိုက်ရိုက်ဝင်ရောက်ခဲ့ပြီး မုန်တိုင်းမှအကြွင်းအကျန်တိမ်တိုက်များသည် မြန်မာနိုင်ငံကိုသာမက ထိုင်းနိုင်ငံကိုလည်းဖြတ်သန်းခဲ့သည်။ မြန်မာနိုင်ငံနှင့်နယ်စပ် ထိုင်းနိုင်ငံ ချင်းရိုင်ခရိုင်တွင်လည်း ဆိုးရွားသည့်ရေ‌ ဘေးကြုံနေသည်။

ထိုင်းစစ်တပ်သည် ထိုင်းနိုင်ငံ​မြောက်ပိုင်း​ရေကြီး​နေ​သောအခါ မြန်မာများအပါအဝင် ရေဘေးသင့်နေသူများကို ရဟတ်ယာဉ်ဖြင့်လိုက်၍ထမင်းထုပ်များချပေးခဲ့သည်။ ရွှေ့ပြောင်းရန်လိုအပ်သူများကို ရဟတ်ယာဉ်ဖြင့်ကယ်ထုတ်ခဲ့သည်။ လာအိုနိုင်ငံတွင်ပင် ​ရေ​ဘေးကြုံသူများကို အစိုးရက ရဟတ်ယာဥ်များဖြင့်အ​ရေး​ပေါ်ကယ်ဆယ်​ရေးလုပ်ပေး​နေသည်။

စစ်​ကောင်ကမူ ပြည်သူကိုပစ်မှတ်ထား၍ လေကြောင်းမှတိုက်ခိုက်ရန်သာအစဥ်တစိုက်အားထုတ်ခဲ့သည်။ ရဟတ်ယာဥ်များ ​လေယာဥ်များသည် အာဏာသိမ်း စစ်အုပ်စု အာဏာလက်မလွတ်​ရေး အတွက်ပြည်သူများကို သတ်ဖြတ်ရန် တွင်သာအသုံးပြုသည်။ ပြည်သူကိုကယ်တင်ရန် စစ်အုပ်စုက ​လေယာဥ်များ ၊ရဟတ်ယာဥ်များအသုံးပြုရန် စိတ်ကူးပင် ရှိပုံမရ​ပေ ။

အာဏာလု စစ်အုပ်စုက ပြည်သူများအားကယ်တင်ရန် အားမထုတ်သည့် အပြင် ​ရွေး​ကောက်ခံအရပ်သားအစိုးရလက်ထက်က သဘာဝ​ဘေးကြုံလျင် ပြည်သူများကိုကယ်တင်ယာဥ်ရဟတ်ယာဥ်ဝယ်ခဲ့သည်ကိုပင် လူထု​ခေါင်း​ဆောင်​ဒေါ်​အောင်ဆန်းစုကြည်ကို အဂတိလိုက်စားသည်စွပ်စွဲအမှုဆင်၍ ​ထောင်ချခဲ့​သေးသည်။

ယာယီမုန်တိုင်းမှ အကြွင်းအကျန် တိမ်တိုက်များသည် မြန်မာနိုင်ငံအပေါ်တွင် ဆက်လက်ရှိနေဆဲဖြစ်သည်။ မိုးလည်း ဆက်လက်ရွာနေဆဲဖြစ်ပြီး ရေလည်း တရိပ်ရိပ် ဆက်တက်နေဆဲဖြစ်သည်။ ရေလွှမ်းမိုးမှု ဧရိယာပိုမိုကျယ်ပြန့်လာပြီး မြန်မာ့ရေဘေးသည့် အနီရောင်အဆင့်သတိပေးချက်ဖြစ်ပြီဟုမိုး​လေဝသ ကျွမ်းကျင်သူအချို့က​ပြောသည်။

နေပြည်တော်ကောင်စီနယ်မြေအတွင်းရှိ ရေဘေးသင့်ပြည်သူများသည် ယခုဆောင်းပါးရေးနေချိန် စက်တင်ဘာလ ၁၁ရက်၊ည ၁၂ နာရီခန့်အထိအရေးပေါ်အကူအညီများတောင်းခံနေဆဲဖြစ်သည်။

ယခု​ရေ​ဘေးက မင်း​အောင်လှိုင် ဦး​ဆောင်​​သော စစ်​ကောင်စီသည် ပြည်သူ့အသက်ကို တန်ဖိုးမထားတက်သလို ၊ အစိုးရလုပ်လို​သော်လည်း အုပ်ချုပ်ရန် အရည်အချင်း​ရော၊ ​စေတနာပါ မရှိ​သော အကြမ်းဖက်အုပ်စုသာဖြစ်သည်ဆိုသည်ကိုထင်ရှား​စေခဲ့သည်။

ယာဂီမုန်တိုင်းကြောင့် တရုတ်နိုင်ငံတွင် လူသေဆုံးမှုနည်းပါခဲ့သော်လည်း ဗီယက်နမ်နိုင်ငံတွင် ၁၄၀ ထက်မနည်းသေဆုံးခဲ့သည်။ ထိုင်းနိုင်ငံတွင် ယနေ့ညအထိစာရင်းများအရ လေးဦးသေဆုံးထားကြောင်း သတင်းများကဆိုသည်။ စစ်အာဏာရှင်လက်အောက်မှ မြန်မာနိုင်ငံတွင်မူ ရေဘေးကြောင့်သေဆုံးသူစာရင်းများ ပျောက်ဆုံးနေဆဲဖြစ်သည်။

” ရေဘေးမှာ သေဆုံးသွားသူတွေကအဲ့ဒီသကောင့်သားကို ကျိန်စာတိုက်သွားလိမ့်မယ်။ တော်တော်ကို သောက်သုံးမကျတဲ့ အကောင်”

တပ်ကုန်းမြို့နယ်ရေဘေးတွင် နေအိမ်ခေါင်မိုးပေါ်၌ သုံးနာရီကြာနေခဲ့ရသည့် အမျိုးသမီးတစ်ဦးကအာဏာသိမ်းခေါင်းဆောင် မင်း​အောင်လှိုင်အားရည်ညွှန်း၍ ဒေါသတကြီးပြော​လိုက်ပါသည်။