ဖေဖော်ဝါရီ ၁၄၊ ၂၀၂၄။ (ဗုဒ္ဓဟူး)

စစ်ကောင်စီကစစ်မှုထမ်းဥပဒေကိုထုတ်ပြန်လိုက်ပြီးဧပြီလနောက်ပိုင်းမှာစတင်စစ်သားစုဆောင်းမယ်လို့ပြောထားပေမယ့်လတ်တလောမှာနိုင်ငံတဝန်းလူငယ်တွေပျောက်ဆုံးမှုတွေ၊ပေါ်တာဆွဲမှုတွေဆက်တိုက်ဆိုသလိုဖြစ်‌နေတယ်။ဒီရက်ပိုင်းမြို့ကြီးတွေမှာလူပျောက်ကြော်ငြာတွေများလာတယ်။ပေါ်တာဆွဲကတော့နေ့ခင်းကြောင်တောင်အဝေးပြေးလိုင်းကားတွေပေါ်ထိဆွဲနေတယ်။မုံရွာမှာဆိုမန္တလေးလမ်းပေါ်မှာပြေးဆွဲနေတဲ့ကားလိုင်းတွေကိုစစ်တပ်ကတားဆီးပြီးလူငယ်လေးဆယ်ကျော်ထက်မနည်းဖမ်းဆီးသွားတယ်။မုံရွာမြို့ပေါ်မှာလဲအပြင်ထွက်တဲ့လူငယ်မှန်သမျှဖမ်းဆီးနေလို့ပြည်သူတွေစိုးရိမ်ထိန့်လန့်နေကြပြီးမြို့ပေါ်လမ်းတွေမှာအသွားအလာတွေမရှိတော့ပဲခြောက်ကပ်နေတယ်။ရန်ကုန်ကတောင်ဒဂုံမြို့နယ်မှာလဲစက်မှုဇုန်ထဲကအဆောင်တချို့မှလူငယ်တွေကိုစစ်တပ်၊ရဲနဲ့ရပ်ကွက်အုပ်ချုပ်ရေးမှုးတို့ပါဝင်တဲ့အဖွဲ့ကလာရောကဖမ်းဆီးသွားတယ်။စစ်မှုထမ်းရမယ်ဆိုပြီးစစ်ကားတွေနဲ့ခေါ်သွားတာလို့သိရတယ်။ဒီရက်ပိုင်းလူငယ်တွေဟာအရင်လိုမလွတ်လပ်တော့ပဲကျီးလန့်စာစားနေနေကြရတယ်။ဘာလုပ်မှမသိကြဘူး။စစ်မှုထမ်းဥပဒေပေါ်ပြီးနောက်ပိုင်းတော်လှန်ရေးအဖွဲ့တွေကသူတို့ဆီလာဖို့ဖိတ်ခေါ်နေပေမယ့်အဲ့ဒါကလဲထင်သလောက်မလွယ်ဘူး။တော်လှန်ရေးအဖွဲ့‌တွေကတော့ဒီရက်ပိုင်းသူတို့ကိုလာရောက်ဆက်သွယ်တဲ့လူငယ်တွေအဆမတန်များပြားလာတယ်လို့‌ပြောနေကြတယ်။စစ်အုပ်စုကတော့အရင်လိုခိုးကြောင်းခိုးဝှက်မဟုတ်တော့ပဲ‌ပေါ်တင်ပေါ်တာဆွဲခွင့်လိုင်စင်ရသွားသလိုပဲ။