မနေ့ကကောလင်းမြို့ကိုတော်လှန်ရေးအဖွဲ့တွေသိမ်းပိုက်နိုင်ပြီးနောက်ဒီနေ့လဲစစ်ကိုင်းတိုင်း၊အိန္ဒိယနယ်စပ်တမူးကလေးလမ်းပေါ်ကခမ်းပတ်မြို့ကိုဆက်လက်သိမ်းပိုက်နိုင်ခဲ့ပါတယ်။ခမ်းပတ်မြို့ဟာအိန္ဒိယမြန်မာနယ်စပ်ကုန်သွယ်လေရေးလမ်းဖြစ်တဲ့တမူးကလေးအာရှလမ်းမကြီးပေါ်ကအချက်အချာကျတဲ့နေရာမှာတည်ရှိပြီးစစ်အုပ်စုကလေကြောင်းပစ်ကူနဲ့လက်နက်ကြီးပစ်ကူတွေအကြိမ်ကြိမ်လုပ်ဆောင်ကာခမ်းပတ်မြို့ကိုလက်မလွှတ်ရဖို့ခုခံခဲ့ပေမယ့်မြေပြင်ကစစ်အုပ်စုအများအပြားစခန်းတွေကိုစွန့်ခွာထွက်ပြေးသွားလို့မြို့ကိုသိမ်းနိုင်ခဲ့တာဖြစ်ပါတယ်။ခမ်းပတ်မြို့ကိုသိမ်းပိုက်နိုင်ခြင်းကြောင်းအိန္ဒိယနယ်စပ်ကုန်သွယ်ရေးလမ်းကြောင်းတစ်ခုကိုထိန်းချုပ်လိုက်နိုင်ပြီးစစ်ကောင်စီရဲ့အိန္ဒိယဘက်ကစစ်လက်နက်နဲ့လေယာဉ်ဆီတင်ပို့မှုတွေကိုတစိတ်တပိုင်းထိန်းချုပ်နိုင်မှာပါ။ဒါ့အပြင်နယ်စပ်မြို့ဖြစ်တဲ့တမူးမြို့နဲ့ချင်းပြည်နယ်ဘက်ကိုသွားတဲ့လမ်းမှာအချက်အခြာကျတဲ့ကလေးမြို့ကိုလဲကောင်းကောင်းခြိမ်းခြောက်နိုင်မှာဖြစ်ပါတယ်။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။