စစ်ဗိုလ် နိုင်ငံရေးလုပ်ရင် စကားကောင်းကောင်း မပြောတတ်

လျှပ်စစ်ဓာတ်အား လုံလောက်မှု မရှိတဲ့ မြန်မာပြည်မှာ လျှပ်စစ်ရထား၊ လျှပ်စစ်ကားတွေပြေးဆွဲမယ်လို့ ပြောပြီး မကြာဘူး ၁၀ နှစ်အတွင်း မြန်မာဟာ အာဆီယံမှာ ထိပ်တန်းနိုင်ငံဖြစ်နိုင်တယ်ဆိုတဲ့ ပြက်လုံးသာသာ စကားကို ဆိုခဲ့ပြန်ပါတယ်။ ပြီးခဲ့တဲ့ အပတ်ကလည်း ပြည်ပက စားသုံးဆီဝယ်ရတာ နိုင်ငံခြားငွေကုန်တယ်၊ တွက်ချက်မှုအရ လူတယောက်ဟာ တနှစ်ကို ဆီ ၁၀ ပိဿာကျော် စားနေကြတယ်၊ တယောက်ချင်းစီ ဆီစားသုံးမှုလျော့ကြပါလို့ မြန်မာပြည်သူတွေကို သတိပေး စကားပြောခဲ့ပြန်ပါတယ်။

ဒါကို စစ်အစိုးရဝါဒဖြန့်သတင်းစာဖြစ်တဲ့ မြဝတီ၊ကြေးမုံ၊ မြန်မာ့အလင်းသတင်းစာတွေလည်း စစ်အာဏာရှင်အလိုကျ စားသုံးဆီရဲ့ဆိုးကျိုးဆောင်းပါးတွေ၊ ဆောင်ပုဒ်တွေဖော်ပြခဲ့ရုံမက အောက်တိုဘာ ၁ ရက်နေ့ ကြေးမုံအယ်ဒီတာ့အာဘော်မှာ ပြည်သူတွေအနေနဲ့ ကျန်းမာရေးကို သတိမမူ၊ ဈေးသက်သာပြီး တွက်ခြေကိုက်မှုကိုသာ ဦးစားပေးခဲ့လို့ စားအုန်းဆီကို တနှစ်ထက်တနှစ်ပိုသွင်းရကြောင်း၊ မိမိတို့ဆန္ဒထက် နိုင်ငံ့အကျိုးစီးပွား၊ မိမိတို့အကျိုးစီးပွားကို အလေးထားဖို့လိုကြောင်း မြန်မာပြည်သူတွေကို အပြစ်တင်ခဲ့ပါတယ်။

ပြည်ပက sanction တွေ၊ ပြည်တွင်းမှာ စီးပွားရေး ကောင်းကောင်း မလည်ပတ်နိုင်လို့ နိုင်ငံခြားဝင်ငွေ မရှိဖြစ်နေတဲ့ စစ်ကောင်စီက ပြည်သူတွေကို ဆီလျော့စားခိုင်းတာဟာ ကျန်းမာရေးထက် နိုင်ငံခြားငွေကုန်မှာ စိုးရိမ်လို့ဆိုတာ မြန်မာပြည်သူတွေကလည်း သိကြပါတယ်။ တကယ်တော့ စားအုန်းဆီကို ပြည်ပက အကြီးအကျယ် တင်သွင်းနေတာ စစ်တပ်ရဲ့ ဦးပိုင်ကုမ္ပဏီက ထိပ်ဆုံးမှာပါတာကိုလည်း သိကြပါတယ်။ စစ်ဗိုလ်ချုပ်ပဲဖြစ်ဖြစ်၊ စစ်ဗိုလ်ချုပ်လူထွက်ပဲဖြစ်ဖြစ် ပြည်သူအပေါ်စေတနာမရှိတာ၊ လက်လွတ်စပယ်စကားတွေပြောတတ်တယ်ဆိုတာကိုလည်း အတွေ့အကြုံတွေအရ သိပြီးဖြစ်ပါတယ်။

၂၀၀၈ ဖွဲ့စည်းပုံအခြေခံဥပဒေအရ စစ်အာဏာရှင်စနစ်ကို သက်ဆိုးရှည်အောင် ဝင်ပြီး ကပြအသုံးတော်ခံခဲ့တဲ့ ဗိုလ်ချုပ်ကြီးဟောင်း သမ္မတဦးသိန်းစိန်လက်ထက်မှာ ပြည်ထောင်စုဝန်ကြီးတွေနဲ့ သမ္မတအကြံပေးတဦးရဲ့ လက်လွတ်စပယ်ပြောစကားတွေကြောင့် ပြည်သူတွေကြား ပွက်လောရိုက်ခဲ့ဘူးပါတယ်။

ပြည်ထောင်စု ကြံ့ခိုင်ရေးနဲ့ဖွံ့ဖြိုးရေးပါတီကနေ လယ်ယာနဲ့ဆည်မြောင်းဝန်ကြီးဖြစ်လာတဲ့ ဒုတိယဗိုလ်ချုပ်ကြီးဟောင်း ဝန်ကြီးမြင့်လှိုင်က စိုက်ပျိုးစရိတ်ချေးငွေမဆပ်နိုင်တဲ့ လယ်သမားတွေကို ထမင်းတနပ်လျော့စားပြီး အကြွေးတွေဆပ်ကြ ဖို့တိုက်တွန်းခဲ့ပါတယ်။ ဒါကြောင့် သူဟာ ပြည်သူတွေကြား “တနပ်စားမြင့်လှိုင်”လို့ လှောင်ပြောင်ခေါ်ဝေါ်တာ ခံခဲ့ရပါတယ်။

၂၀၁၂ ခုနှစ်တုန်းက သမ္မတဦးသိန်းစိန်ရဲ့အကြံပေး (အခု စစ်ကောင်စီခန့် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးလုပ်နေတဲ့) ဦးကိုကိုလှိုင်ဟာလည်း လျှပ်စစ်မီးမလာလို့ ဆန္ဒပြတဲ့ပြည်သူတွေကို မီးမလာရင် ဖယောင်းတိုင်ထွန်းနေလို့ပြောခဲ့လို့ လှုမှုကွန်ယက်စာမျက်နှာတွေမှာ ကာတွန်းတွေနဲ့ပါ ဝေဖန်လှောင်ပြောင်ခံခဲ့ရပြီး ဖယောင်းတိုင် ကိုကိုလှိုင် လို့ လူသိများပါတယ်။ အဲဒီလို စကားကို ရှေ့နောက် ဆင်ခြင်ပြီး မပြောတတ်တဲ့ ပုဂ္ဂိုလ်ဟာ အခု အာဏာသိမ်းစစ်ကောင်စီကဖွဲ့စည်းတဲ့အိမ်စောင့်အစိုးရအဖွဲ့မှာ အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဖြစ်လာခဲ့ပါတယ်။

ကြံ့ခိုင်ရေးနဲ့ဖွံ့ဖြိုးရေးပါတီကပဲ မွေးမြူရေး၊ ရေလုပ်ငန်းနဲ့ကျေးလက်ဒေသဖွံ့ဖြိုးရေးဝန်ကြီးဖြစ်လာတဲ့ ဒုတိယဗိုလ်ချုပ်ကြီးဟောင်း ဦးအုန်းမြင့်ဟာလည်း မကွေးတိုင်း၊ တောင်တွင်းကြီးမြို့ သစ်ရာကောက်ကျေးရွာလူထုနဲ့တွေ့ဆုံတဲ့အခါ လူထုကို ရိုင်းရိုင်းစိုင်းစိုင်းပြောလို့ နာမည်ဆိုးနဲ့ကျော်ဇော်ခဲ့သူဖြစ်ပါတယ်။ သောက်သုံးရေအခက်ဖြစ်နေတဲ့ ကျေးရွာလူထုက ရေသန့်ရအောင်လုပ်ပေးပါလို့ ပြောတဲ့အပေါ် ကျေးလက်ဖွံ့ဖြိုးရေးဝန်ကြီးက သူမလုပ်ပေးနိုင်တာကို ဘုကန့်လန့်တောင်းဆိုတယ်ဆိုပြီး ဒေါသထွက်ခဲ့ပါတယ်။ ရေသန့်ရချင်ရင်တော့ ရေသန့်ရှိတဲ့နေရာမှာ သွားနေမှရမယ်။ ဒီလိုနေရာမှာ နေလို့မရဘူး။ စေတနာပျက်အောင်မပြောနဲ့။ ဗိုလ်ချုပ်အုန်းမြင့်.. နယ်တကာလှည့်ပြီး ပါးရိုက်ရဲတယ်ကွ ဆိုပြီး မိန့်ခွန်းပြောလာတဲ့ကောင်။ ရှင်းတယ်နော် ဆိုပြီး ကျေးရွာလူထုကို ဟိန်းဟောက်ငေါက်ငမ်းခဲ့ပါတယ်။

ဒီပြောဆိုမှုအပေါ် ပြည်သူတဦးချင်းအနေနဲ့ရော အဖွဲ့လိုက်ပါ ဆန္ဒပြခဲ့ကြပြီး ရုပ်ရှင်ဇာတ်ကားတွေထဲမှာလည်း ထည့်သွင်းလှောင်ပြောင်ခဲ့ကြပါတယ်။ ဒီလိုနဲ့ နယ်လှည့်ပါးရိုက် အုန်းမြင့်လို့ နာမည်တွင်ခဲ့သူဖြစ်ပါတယ်။

စစ်ဗိုလ်လူထွက် ပြည်ထောင်စုဝန်ကြီးနဲ့ သမ္မတအကြံပေးတွေပဲ ပေါက်တက်ကရစကားတွေ ပြောတာလားဆိုတော့ သူတို့ကို ခန့်အပ်ခဲ့တဲ့ ဗိုလ်ချုပ်ကြီးဟောင်း သမ္မတဦးသိန်းစိန်ကလည်း ဒီပုပ်ထဲက ဒီပဲပါပဲ။ ၂၀၁၄ ခုနှစ်တုန်းက သမ္မတကြီးဦးသိန်းစိန်ရဲ့ ပြည်သူတွေ အရက်အစား နွားနို့သောက်ကြဖို့ ပြောခဲ့လို့ အင်တာနက် စာမျက်နှာတွေပေါ်မှာ အရက်အစား နွားနို့သောက်ခိုင်းခြင်းကို ချက်ချင်းရပ်၊ သမ္မတပြောဆိုချက်ဟာ မြန်မာပြည် အရက်ဈေးကွက်ကို အကြီးအကျယ်ထိခိုက်စေတယ် စသည်ဖြင့် နောက်ပြောင်စရာတွေဖြစ်ခဲ့ပါတယ်။ အရက်အစား နွားနို့ သောက်ခိုင်းရတဲ့ အကြောင်းအရင်း က အရမ်းရိုးရှင်းပါတယ်။ မြန်မာပြည်မှာ အရက်သောက်လို့ မှုခင်းတွေများနေတာ၊ နွားနို့ပြောင်းသောက်ကြရင် မှုခင်းတွေ နည်းလာမယ်လို့ သမ္မတကြီး က ထူးထူးခြားခြား ရှုမြင်တာ ဖြစ်ပါတယ်။

အခုလည်း ဗိုလ်ချုပ်မှူးကြီးမင်းအောင်လှိုင်က သူ့အာဏာသိမ်းထားတဲ့ ၈ လကျော်အတွင်း လူထုအဟာရအတွက် ငှက်ပျောပင်စိုက်ပါ၊ နွားကိုပြည်ပပို့ကုန်အဖြစ်ပို့ပါ၊ တိုင်းရင်းဆေးနဲ့ကိုဗစ်ကုသဆေးထုတ်မယ်၊ တနိုင်ငံလုံးလျှစ်စစ်ဘတ်စ်ကားတွေသုံးနိုင်အောင်လုပ်မယ်၊ မြေအောက် ရထားလမ်းတွေ ဖောက်မယ်၊ ၁၀ နှစ်အတွင်း အာဆီယံမှာထိပ်တန်းနိုင်ငံဖြစ်ရမယ်လို့ အဓိပ္ပါယ်မဲ့ပေါက်ကရစ ကားတွေနဲ့ ထင်တိုင်းကြဲလို့နေပါတယ်။

အဲဒီတော့ မြန်မာပြည်မှာ စစ်သားဘဲဖြစ်ဖြစ် စစ်သား လူထွက်ဘဲဖြစ်ဖြစ် အာဏာရှိလာရင် ပေါက်ကရ ပြောတတ်တယ်ဆိုတဲ့ အချက်ကို ဗိုလ်ချုပ်မှူးကြီးမင်းအောင်လှိုင်က အခုထိ သက်သေထူနေတုန်းပဲလို့ ဆိုရမှာပါ။

Source: ဧရာဝတီ