အောက်တိုဘာ ၂၀၊ ၂၀၂၅။ (တနင်္ဂနွေ)

တအာင်းအမျိုးသားလွတ်မြောက်ရေး တပ်မတော်(TNLA)ထိန်းချုပ်ထားတဲ့ မန္တလေးတိုင်း၊ မိုးကုတ်မြို့ကို စစ်အုပ်စုက နေ့စဉ်ရက်ဆက် လေကြောင်းတိုက်ခိုက်နေတာကြောင့် လက်ကျန်မိုးကုတ်ဒေသခံတွေဟာ စစ်ရှောင်ဖို့ ပြင်ဆင်နေကြပါပြီ။  မိုးကုတ်ကို TNLA သိမ်းပြီးနောက် ပြန်ဝင်လာတဲ့သူတွေရှိပေမဲ့ အခုအားလုံးနီးပါး ပြန်ထွက်ဖို့ ပြင်နေကြတယ်။ ငွေရေးကြေးရေး သိပ်မတက်နိုင်တဲ့သူတွေပဲ ကျန်နေခဲ့မှာပါ။ အရင်ကတော့ မိုးကုတ်မြို့မှာပဲ တောင့်ခံနေထိုင်ခဲ့ကြပေမဲ့ စစ်ရေးအရ အရေးပါတဲ့ မိုးကုတ်-သပိတ်ကျင်းလမ်းပေါ်က ဖော့တောလမ်းဆုံကို စစ်အုပ်စုသိမ်းပိုက်ပြီးနောက် လေကြောင်းအန္တရာယ်က ပိုဆိုးရွားလာတာကြောင့် နေရပ်စွန့်ခွာ ထွက်ပြေးကြရတာ ဖြစ်တယ်။ ပြီးခဲ့တဲ့ စက်တင်ဘာလ တစ်လထဲမှာပဲ တိုက်ပွဲဖြစ်နေတာ မရှိတဲ့ မိုးကုတ်ကို လေကြောင်းတိုက်ခိုက်မှု အကြိမ် ၂၀ ကျော် ပြုလုပ်ခဲ့ပြီး ဒေသခံ သုံးဆယ်ထက်မနည်း သေဆုံးခဲ့တယ်။ နေရပ်စွန့်ခွာ တိမ်းရှောင်သူ များလာတာကြောင့် မိုးကုတ်-မန္တလေး ကားခလည်း လူတစ်ဦးကို ငွေကျပ် ငါးသိန်းအထိ ပေးလာရတယ်။ ထိုခရီးဟာအရင်ကဆို ဆိုင်ကယ်ဆီဖိုး ၅၀၀၀ကျပ်လောက်နဲ့ ရောက်တဲ့ခရီးပါ။ အခုတော့ မန္တလေးကိုရောက်ဖို့အတွက် ဧရာဝတီမြစ်ကို နှစ်ခါကူးပြီးသွားနေရတယ်။ စစ်ဘေးသင့်ဒေသတွေမှာ ခရီးစားရိတ်တွေလဲ မကြားဖူးတဲ့အခြေအနေတွေရောက်နေတယ်။