အကြမ်းဖက်စစ်ကောင်စီလက်အောက်ခံ ဘဏ် ၂ ခုဖြစ်တဲ့ မြန်မာ့နိုင်ငံခြားကုန်သွယ်မှုဘဏ်နဲ့ မြန်မာ့ရင်းနှီးမြှုပ်နှံမှုနှင့်ကူးသန်းရောင်းဝယ်ရေးဘဏ်တို့ကို အမေရိကန်ကစီးပွားရေးအရ ဒဏ်ခတ်ပိတ်ဆို့လိုက်တယ်။ထိုဘဏ်နှစ်ခုဟာနိုင်ငံပိုင်စီးပွားရေးလုပ်ငန်းကြီးတွေနိုင်ငံခြားငွေလည်ပတ်ဖို့နဲ့စစ်ကောင်စီလက်နက်ဝယ်ဖို့အဓိကပံ့ပိုးနေတဲ့ဘဏ်တွေဖြစ်တာကြောင်းစစ်ကောင်စီကိုအထိနာသွားစေမှာအမှန်ပဲ။စစ်ကောင်စီကတော့ထုံးစံအတိုင်းပိတ်ဆို့မှုကြောင့်ဆုံးရှုံးမှုမရှိဘူးလို့ထုတ်ပြန်ထားပေမယ့်သူတို့ရဲ့နိုင်ငံခြားငွေပေးငွေယူကိစ္စရပ်တွေကိုအများကြီးထိခိုက်နိုင်တယ်လို့ပညာရှင်တွေကခန့်မှန်းထားတယ်။စစ်ကောင်စီဘက်မှာထိခိုက်သလိုကြပ်တည်းနေတဲ့ပြည်တွင်းစီးပွားရေးအခြေအနေကိုလဲထိခိုက်လာနိုင်တယ်။အခုလောလောဆယ်တော့အမေရိကန်ကထိုကြေငြာချက်ထုတ်ပြန်လိုက်ပြီးနောက်ဒေါ်လာဈေးနဲ့ရွှေဈေးတွေခုန်တက်သွားတယ်။ဒေါ်လာဈေးရွှေဈေးတွေတက်ရင်ကုန်ဈေးနှုန်းတွေပါတက်လာမှာမို့ပြည်သူတွေမျက်ခုံးလှုပ်နေကြပြီ။မင်းအောင်လှိုင်မသေသ၍တော့ဒီဒုက္ခတွေခါးစည်းပြီးခံရဦးမှာပဲ။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။