မြန်မာ-အိန္ဒိယ နယ်စပ် ကုန်သွယ်ရေးရဲ့ အဓိက လမ်းမကြီးတစ်ခုဖြစ်တဲ့ စစ်ကိုင်းတိုင်း၊ ကလေးခရိုင်၊ ကလေး-တမူး အာရှလမ်းမကြီးကိုလဲ စစ်အုပ်စုကပြန်လည် စိုးမိုး ထိန်းချုပ်နိုင်ဖို့ ကြိုးစားနေတယ်။ စစ်အုပ်စုက အင်အားအလုံး အရင်းနဲ့ စစ်ကြောင်းထိုး ဝင်ရောက်နေပြီး တော်လှန်ရေးတပ်တွေ အနေနဲ့ စိုးမိုးနယ်မြေတွေ လက်လွှတ်နေရတယ်။ မိုင် ၈၀ ကျော် ရှည်လျားတဲ့ ကလေး – တမူးလမ်းကို ပြန်လည် စိုးမိုးထိန်းချုပ်နိုင်ဖို့ စစ်အုပ်စုက လေကြောင်းကနေ ကလေးမြို့ကို အရင်အင်အားဖြည့်တင်းပါတယ်။ ထို့နောက်ဩဂုတ်လက စတင်ကာ ကလေးမြို့ဘက်ကနေ စစ်ကြောင်းထိုးတာ ဖြစ်ပြီး အောက်တိုဘာလမှာ ကလေးမြို့ကနေ မိုင် ၆၀ခန့်အကွာအထိ စစ်အုပ်စု စစ်ကြောင်း ရောက်ရှိနေပါပြီ။ စစ်အုပ်စုက ကလေး-တမူး အာရှလမ်းမကြီးတလျှောက် အင်အား ၁၀၀၀ ခန့်ကို သုံးဖွဲ့ခွဲကာ စစ်ကြောင်းထိုးနေတာ ဖြစ်တယ်။
ကလေးမြို့ဟာ ချင်းပြည်နယ်နဲ့လဲထိစပ်နေပြီး ချင်းပြည်နယ်ဘက်ကိုတော့ စစ်ကြောင်းပြင်နေတာမတွေ့ရသေးပါဘူး။ အိန္ဒိယနဲ့ ကုန်သွယ်ရေးအရ အရေးပါတဲ့ ထိုလမ်းကြောင်းကိုပဲ ထိန်းချုပ်နိုင်အောင်အရင်လုပ်ဆောင်မယ့်ပုံပဲ။
