မဇ္ဈိမ။ ။မကွေးတိုင်း၊ မြိုင်မြို့နယ်၊ မန်ကျည်းလေးပင်ကျေးရွာအနီးရှိ စစ်ရှောင်စခန်းကို စစ်ကောင်စီတပ် က Mi 35 ရဟတ်ယာဉ်ဖြင့်ပစ်ခတ်တိုက်ခိုက်ခဲ့၍ အရပ်သားငါးဦးနှင့်ကာကွယ်ရေးတပ်ဖွဲ့ဝင်နှစ်ဦး ထိခိုက် ဒဏ်ရာရရှိခဲ့ကြောင်း မြိုင်မြို့နယ်ပြည်သူ့ကာကွယ်ရေးတပ်ဖွဲ့ထံမှ သိရသည်။
ယနေ့(နိုဝင်ဘာလ ၂ ရက်)နံနက် ၉ နာရီဝန်းကျင်တွင် မန်ကျည်းလေးပင်ကျေးရွာ၏မြောက်ဘက်ရှိ စစ် ရှောင်စခန်းအား လာရောက်ပစ်ခတ်သွားခြင်းဖြစ်ကြောင်း မြိုင်မြို့နယ်ပြည်သူ့ကာကွယ်ရေးတပ်ဖွဲ့မှ တာဝန် ရှိသူက ပြောသည်။
“မန်ကျည်းလေးပင်ရွာက ကန်နီပျူရွာနဲ့နီးတော့ လက်နက်ကြီးရန်ကိုကြောက်ပြီး ရွာထဲမှာမနေကြပဲ လမ်းဘေးမှာ တဲလေးတွေဆောက်ပြီးနေကြတာ။ အဲဒီနေရာကို လာပစ်သွားတာ။ ဒုံးတွေ၊ စက်လတ်တွေ နဲ့ပစ်သွားတာ” ဟု ၎င်းကပြောသည်။
ထိခိုက်ဒဏ်ရာရရှိသူများကို နီးစပ်ရာဆေးရုံများသို့ ပို့ဆောင်ကုသပေးနေပြီး တဦးမှာ စိုးရိမ်ရသည့် အခြေ အနေတွင်ရှိကြောင်း နွေဦးတော်လှန်ရေး(မြိုင်)အဖွဲ့မှ တာဝန်ရှိသူတဦးက ပြောသည်။
“လေယာဉ်နဲ့ကြဲနေတုန်း ကယ်ထုတ်ပြီး ကားနဲ့ဆေးရုံပို့ချိန်မှာ ကားကို လေယာဉ်နဲ့လိုက်ပစ်နေလို့ အပင် အောက်ထိုးရပ်ပြီး ပြန်ထုတ်ရတယ်လို့ သိရတယ်” ဟု ၎င်းကပြောသည်။
မြိုင်နှင့်ရေစကြိုမြို့နယ်အစပ်ကို စစ်ကောင်စီတပ်ဖွဲ့ကစစ်ကြောင်းထိုးနေပြီး ပြည်သူ့ကာကွယ်ရေးတပ်ဖွဲ့ များမှပြန်လည်ခုခံနေခြင်းကြောင့် ဒရုန်းဖြင့်တိုက်ခိုက်ခြင်းအပြင် လေကြောင်းမှပါလာရောက်တိုက်ခိုက် ခြင်းဖြစ်ကြောင်း မြိုင် ပကဖ တာဝန်ရှိသူတဦးက ပြောသည်။
ပြီးခဲ့သည့် အောက်တိုဘာလ ၂၃ ရက်နေ့ကလည်း မြိုင်မြို့မြောက်ဘက်ရှိ ကန်ကြီးတောကျေးရွာကို စစ်ကောင်စီတပ်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့ကြောင်း သိရသည်။
