မဇ္ဈိမ။ ။စစ်ကိုင်းတိုင်း၊ ဘုတလင်မြို့နယ်တွင် စစ်ကောင်စီတပ်က အင်အား ၁၀၀ ကျော်ဖြင့် စစ်ကြောင်း ထိုးလာခြင်းကြောင့် ဒေသခံများ ထွက်ပြေးတိမ်းရှောင်နေကြရကြောင်း ကာကွယ်ရေးတပ်ဖွဲ့များထံမှ သိရသည်။
စစ်ကောင်စီစစ်ကြောင်းသည် အောက်တိုဘာလ ၄ ရက်နေ့မှစတင်ကာ မုံရွာမြို့ဘက်မှ ခြေလျင်ထွက်လာ ပြီး လမ်းတလျှောက်ရှိကျေးရွာများကို ဝင်ရောက်နေခြင်းဖြစ်ကြောင်း Budalin Mobile Team အဖွဲ့ ဘဏ္ဍာရေးတာဝန်ခံ ဆရာဇော်က ပြောသည်။
“လူဦးရေကတော့ တော်တော်ကိုများမယ်။ ခုဟာက စစ်ကြောင်းလာတဲ့လမ်းတလျှောက်လုံး ပြေးရတာဆို တော့ ၂၀,၀၀၀ ၊ ၃၀,၀၀၀ လောက်တောင် ရှိနိုင်တယ်” ဟု ပြောသည်။
အဆိုပါ စစ်ကြောင်းသည် မုံရွာ-ဘုတလင်လမ်းတလျှောက်ကျေးရွာများကို ဝင်ရောက်နေသည့်အတွက် တရော်တော၊ ယုန်လှေးကုန်း၊ ကုက္ကိုစု၊ အုတ်ကျင်း၊ ညောင်ကန်၊ ရွာသာကျေးရွာများအပါအဝင် ကျေးရွာ ၁၀ ရွာခန့်မှ ဒေသခံများ ထွက်ပြေးတိမ်းရှောင်နေရခြင်းဖြစ်ကြောင်း သိရသည်။
“လမ်းတလျှောက် ရွာတွေကိုဝင်တယ်။ ကံဆွယ်မှာ တညတပ်စွဲတယ်။ မနေ့(အောက်တိုဘာ ၇ ရက်)က တရော်တော၊ ယုံလှေးကုန်းကိုဝင်တယ်။ ဒီနေ့မနက်ထွက်လာပြီးတော့ ခုလောလောဆယ် ကုက္ကိုစု၊ အုတ် ကျင်းကို ခွဲပြီးတပ်စွဲနေတယ်။ ဝင်ခဲ့တဲ့ရွာတွေမှာ ပြည်သူတွေရဲ့ပစ္စည်းတွေယူတယ်”ဟု ဆရာဇော်ကပြော သည်။
စက်တင်ဘာလ ၃၀ ရက်နေ့က ဘုတလင်မြို့နယ် ကူတော်ရဲစခန်းမှ ထွက်လာသည့် အင်အား ၈၅ ဦးပါ စစ် ကောင်စီစစ်ကြောင်းကို ပြည်သူ့ကာကွယ်ရေးတပ်ဖွဲ့များကတိုက်ခိုက်ခဲ့ရာ ၃၃ ဦးသေဆုံးပြီး ဗိုလ်ကြီးနှစ် ဦးအပါအဝင် ၄၃ ဦးဖမ်းခံခဲ့ရပြီးနောက် လေးရက်အကြာတွင် စစ်ကောင်စီတပ်က အင်အားအလုံးအရင်း ဖြင့် ဘုတလင်မြို့နယ်ထဲသို့ ထပ်မံဝင်ရောက်လာခြင်းဖြစ်သည်။
အဆိုပါ စစ်ကောင်စီစစ်ကြောင်းသည် လမ်းတလျှောက်တွင် အရပ်သားများကို ဖမ်းဆီးသတ်ဖြတ်ခြင်း များလုပ်ဆောင်နေကြောင်း ဆရာဇော်က ဆိုသည်။
“ဓားစားခံ ၁၄ ယောက် ဖမ်းထားတယ်၊ မနေ့က တရော်တောမှာ အမျိုးသမီးလေးယောက်ဖမ်းခံရပြီး နှစ်ယောက်တော့ ပြန်လွတ်လာတယ်။ ဒီမနက်မှာလည်း ဆိုင်ကယ်နဲ့စျေးရောင်းတဲ့ စျေးသည်တချို့ ဖမ်းဆီး သတ်ဖြတ်ခံထားရတယ်လို့လည်း ကြားရတယ်” ဟု ၎င်းကပြောသည်။
စစ်ကောင်စီစစ်ကြောင်းသည် ဘုတလင်မြို့သို့ဦးတည်သွားနေခြင်းဖြစ်ပြီး မြို့ပေါ်ရှိ စစ်ကောင်စီတပ်ဖွဲ့ နှင့်ပူးပေါင်းကာ ပြီးခဲ့သည့်ရက်ပိုင်းက စစ်ကောင်စီ၏စစ်ကြောင်း တခုလုံးချေမှုန်းခံလိုက်ရသည့် ကူတော်၊ ကတိုး စသည့်ကျေးရွာများအထိ စစ်ကြောင်းထိုးနိုင်သည့် အလားအလာရှိကြောင်း တော်လှန်ရေးတပ်ဖွဲ့ များက ဆိုသည်။
