ဒီလ၁ရက်နဲ့၂ရက်မှာပြုလုပ်တဲ့မြောက်ပိုင်းလက်နက်ကိုင်သုံးဖွဲ့နဲ့စစ်ကောင်စီတို့ကြားငြိမ်းချမ်းရေးဆွေးနွေးပွဲဟာဘာသဘောတူညီမှုမှမရပဲပြီးဆုံးသွားတယ်။တကယ်ကသုံးရက်လုပ်ဖို့စီစဉ်ထားတာဖြစ်ပြီးနှစ်ရက်နဲ့ပြီးဆုံးသွားတယ်ဆိုတော့ပွဲပျက်သွားတဲ့သဘောပဲ။ထိုဆွေးနွေးပွဲကိုလဲတရုတ်ကကြီးမှုးကျင်းပတာဖြစ်ပြီးနှစ်ဘက်စလုံးကစိတ်သိပ်မပါလှပဲဟန်ပြပုံစံသာလုပ်သွားတာပါ။တကယ်လဲဆွေးနွေးပွဲကျင်းပနေချိန်မှာစစ်ကောင်စီနဲ့MNDAAအဖွဲ့မြေပြင်မှာတိုက်ပွဲတွေဖြစ်နေခဲ့တယ်။စစ်တပ်ကအရင်စတိုက်တာဖြစ်လို့ဆွေးနွေးတာကသပ်သပ်၊စစ်တိုက်တာကသပ်သပ်လို့စစ်ကောင်စီကသဘောထားပုံရတယ်။ဒီပုံစံနဲ့တော့မြောက်ပိုင်းအဖွဲ့တွေနဲ့စစ်ကောင်စီတို့ငြိမ်းချမ်းရေးရဖို့မပြောနဲ့၊သဘောတူညီချက်အဆင့်တောင်ရဖို့မလွယ်ပါဘူး။သူတို့တွေအဆင်ပြေလေတော်လှန်ရေးအတွက်ပိုကောင်းလေပဲပေါ့။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။