ဟစ်ဟော့အဆိုတော်ဗျူဟာဟာလူမှုကွန်ယက်ကနေစစ်ကောင်စီကိုဝေဖန်မိလို့ဖမ်းဆီးခြင်းခံလိုက်ရတယ်။အဆိုတော်ဗျုဟာဟာသူ့ဖေ့ဘုတ်ပေ့ကနေပြီးရန်ကုန်မှာဆိုးရွားစွာပြတ်တောက်နေတဲ့လျှပ်စစ်မီးအကြောင်းကိုဒေါ်အောင်ဆန်းစုကြည်အစိုးရလက်ထက်ကအခြေအနေနဲ့နှိုင်းယှဉ်ဝေဖန်မိရာကနေအိမ်မှာအင်အားအများအပြားသုံးပြီးလာရောက်ဖမ်းဆီးခြင်းခံလိုက်ရတယ်။ဖမ်းဆီးခံရပြီးနောက်စစ်ကောင်စီဘက်တော်သားလူမှုကွန်ယက်စာမျက်နှာတွေမှာထိုးကြိတ်ခံထားရတဲ့မျက်နှာနဲ့ပုံတွေတက်လာတယ်။သူ့ကိုဘယ်ပုဒ်မတပ်မယ်သေချာမသိသေးပေမယ့်နိုင်ငံတော်အကြည်အညိုပျက်စေမှုပုဒ်မ၅၀၅ပဲတပ်ဖို့များတယ်။စစ်ကောင်စီလက်အောက်မှာပြည်သူတွေဟာလွတ်လပ်စွာပြောဆိုခွင့်လုံးဝဆုံးရှုံးလျက်ရှိတယ်။ကအကြည်ညိုပျက်ရအောင်ကြည်ညိုစရာတစက်မှမရှိတဲ့စစ်ကောင်စီပဲ။
နိုဝင်ဘာ ၁၉၊ ၂၀၂၃။ (တနင်္ဂနွေ)
ကရင်နီပြည်နယ်လွိုင်ကော်မြို့ကကုလသမဂ္ဂဝန်ထမ်းတွေနဲ့အန်ဂျီအိုဝန်ထမ်းတွေရှမ်းပြည်နယ်ဘက်ကိုထွက်ခွာခွင့်ရသွားတယ်။ဒါပေမယ့်မြို့ထဲမှာအရပ်သားအများအပြားပိတ်မိနေဆဲပဲ။လွိုင်ကော်တက္ကသိုလ်ထဲမှာစစ်တပ်ရဲ့လူသားဒိုင်းအဖြစ်အသုံးချခံထားရတဲ့ဝန်ထမ်းတွေနဲ့ကျောင်းသားတွေကိုတော့တော်လှန်ရေးအဖွဲ့တွေကယ်ထုတ်လိုက်နိုင်တယ်။ဒါကိုစစ်ကောင်စီကထိုဝန်ထမ်းတွေကိုတော်လှန်ရေးအဖွဲ့တွေကမတရားဖမ်းဆီးသွားပါတယ်ဆိုပြီးအသံလွှင့်သေးတယ်။သူတို့ဘာတွေပြောနေပါစေအမှန်တရားကိုလူတိုင်းသိနေတာပဲ။အခုဆိုစစ်ကောင်စီတပ်တွေနှစ်ရှည်လများတပ်စွဲအထိုင်ချထားတဲ့လွိုင်ကော်တက္ကသိုလ်ကိုကရင်နီတပ်ပေါင်းစုအဖွဲ့တွေထိန်းချုပ်ထားနိုင်ပြီးလွိုင်ကော်မြို့ပတ်ပတ်လည်ကိုလဲဝိုင်းထားနိုင်ပြီ။မြို့လယ်ကနေရာကွက်ကွက်လေးကိုသားစစ်သူပုန်တွေထိန်းချုပ်ထားနိုင်တော့တယ်။ ရခိုင်ပြည်နယ်မှာလဲအေအေကဆက်တိုက်ဆိုသလိုထိုးစစ်ဆင်နေတယ်။တချို့ရဲ့စခန်းတွေဆိုရင်သေနတ်သံကြားတာနဲ့လက်နက်ချကုန်တော့တာပဲ။ဒါ့ကြောင့်စစ်ကောင်စီဟာစခန်းအသေးတွေကသူတို့လူတွေကိုစွန့်ခွာခိုင်းပြီးစခန်းအကြီးတွေမှာပူးပေါင်းခိုင်းထားတာကြောင့်အေအေဟာစစ်မတိုက်လိုက်ရပဲရခိုင်ပြည်နယ်ကစခန်း၄၀လောက်ကိုရရှိလိုက်တယ်။ဒါပေမယ့်စစ်ကောင်စီဟာရခိုင်ပြည်နယ်မှာတိုက်ပွဲတွေပြန်စတဲ့နေ့ကစပြီးကုန်လမ်းကြောင်းတွေကိုပိတ်ဆို့ထားလိုက်ပါပြီ။ပြည်မကဝင်တဲ့လမ်းကြောင်းတွေအကုန်ပိတ်ဆို့ထားတဲ့အပြင်ပြည်နယ်ထဲမှာတမြို့နဲ့တမြို့ကိုတောင်ကူးလူးသွားလာလို့မရတော့ပါဘူး။ဒါကြောင့်ရခိုင်ပြည်နယ်ထဲမှာကုန် ဈေးနှုန်းတွေမြင့်တက်လာပြီးပြည်သူတွေဒုက္ခရောက်နေကြပြီ။ဒီအခြေအနေကိုအေအေကဘယ်လိုဖြေရှင်းမလဲဆိုတာစိတ်ဝင်စားစရာပဲ။