မနေ့ကပြောခဲ့တဲ့ငွေကြေးဖောင်းပွမှုနှုန်းကအတော်ကြောက်စရာကောင်းတယ်။ဒီနေ့ဆိုသုံးနေကြဆပ်ပြာဘူးတစ်ဘူးဝယ်ခဲ့တာမှာဈေးနှုန်းက၁၀၀၀ကနေ၂၅၀၀အထိတက်သွားတယ်။ဒါဟာအခုတလောအတွင်းမှာပဲဖြစ်နေတဲ့အခြေအနေကိုပြောပြတာ။တချို့ပစ္စည်းတွေဆိုရင်နှစ်ဆသုံးဆကျော်အထိခုန်တက်သွားတယ်။အထူးသဖြင့်သွင်းကုန်ပစ္စည်းတွေပေါ့။စစ်ကောင်စီဟာသူတို့ဒေါ်လာတွေထွက်သွားမှာစိုးလို့သွင်းကုန်လိုင်စင်တွေမချပေးပဲအလွန်အမင်းတင်းကြပ်ထားတယ်။ဒီနိုင်ငံမှာကလဲအပ်တိုတချောင်းတောင်မထုတ်နိုင်တော့အများစုဟာသွင်းကုန်တွေကိုပဲအားကိုးနေရတာပိုဆိုးကုန်တာပေါ့။ကုန်စျေးနှုန်းကအနည်းဆုံးနှစ်ဆတက်သွားပေမယ့်လစာဝင်ငွေတွေကတိုးမလာတဲ့အပြင်တချို့ဆိုအလုပ်လက်မဲ့တွေပါဖြစ်ကုန်ကြပြီ။စစ်ကောင်စီဆက်လက်တည်မြဲနေသ၍အခြေအနေတွေဟာတိုးတက်မလာပဲဆက်လက်ဆိုးရွားလာဖို့ပဲရှိမယ်။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။