၂၀၂၂ ခုနှစ်အတွင်း စစ်ကောင်စီက လူနေအိမ် ၄၁,၀၀၀ ကျော်ကို မီးရှို့ဖျက်ဆီးခဲ့သည်ဟု NUG မီးသတ်ဦးစီးဌာနထုတ်ပြန်

စစ်ကောင်စီက လူနေအိမ် ၄၁,၀၀၀ ကျော်ကို ၂၀၂၂ ခုနှစ်အတွင်း မီးရှို့ဖျက်ဆီးခဲ့သည်ဟု NUG မီးသတ်ဦးစီးဌာနက ထုတ်ပြန်သည်။

စစ်ကောင်စီ ကျူးလွန်ခဲ့သည့် မီးရှို့ဖျက်ဆီးသည့် အမှု ပေါင်း ၁,၀၅၈ မှု တွင် လူနေအိမ်ခြေပေါင်း ၄၁,၃၅၅ လုံးကျော် ပျက်စီးခဲ့သည်ဟု NUG ကဆိုသည်။

NUG အစိုးရ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန

မီးသတ်ဦးစီးဌာနက လွတ်လပ်သော မီဒီယာများ၊ အရပ်ဘက်လူမှုအဖွဲ့အစည်းများနှင့် ပြည်သူလူထု ပေးပို့လာသည့် အချက်အလက်များကို စိစစ်ကာ ထုတ်ပြန်ထားခြင်းဖြစ်သည်။

၂၀၂၂ခုနှစ် ဇန်နဝါရီ ၁ရက်မှ ၂၀၂၂ခုနှစ် ဒီဇင်ဘာ ၃၁ ရက်အထိ

တစ်နှစ်အတွင်း အကြမ်းဖက်စစ်ကောင်စီ ကျူးလွန်ခဲ့သော မီးရှို့ဖျက်ဆီးမှုများမှာ စစ်ကိုင်းတိုင်းတွင် အများဆုံးဖြစ်သည်ဟု NUG မီးသတ်ဦးစီးဌာနက ဆိုသည်။

စစ်ကိုင်းတိုင်းတွင် နေအိမ် ၃၁,၄၀၀ လုံးကျော်၊ မကွေးတိုင်းတွင် နေအိမ် ၈,၅၀၀ ကျော်နှင့် မန္တလေးတိုင်းတွင် နေအိမ် ၄၈၀ ကျော် မိးရှို့ခံခဲ့ရသည်ဟု NUG က ထုတ်ပြန်သည်။

ထုတ်ပြန်သည့်စာရင်းမှာ သတင်း ပေးပို့မှုများကို အခြေခံ ထားခြင်းဖြစ်ပြီး မြေပြင်တွင် ဖျက်ဆီးခံရသည့် အိမ်အရေအတွက်မှာ ပိုများနိုင်သည်ဟု NUG က ဆိုသည်။

NUG ၏ စာရင်းအရ နေပြည်တော်အပါအဝင် တိုင်းနှင့်ပြည်နယ် ၁၅ ခုအနက် ၁၂ ခုတွင် စစ်ကောင်စီက မီးရှို့ဖျက်ဆီးခဲ့သည်ကို တွေ့ရသည်။

စစ်ကောင်စီက အညာဒေသဖြစ်သည့် စစ်ကိုင်းတိုင်းအတွင်း မီးရှို့မှုများကို ဆက်တိုက်လုပ်ဆောင်နေပြီး ဒေသကာကွယ်ရေး တပ်ဖွဲ့များက အပြင်းအထန် ခုခံလျက်ရှိသည်။

စာတည်း။ ။ အောင်ကျော်ဖြိုး

Source: မဇ္ဈိမ