စစ်အာဏာသိမ်းတစ်နှစ်ပြည့်အသံတိတ်သပိတ်ကြီးကိုတနိုင်ငံလုံးမှာညီညာစွာဆင်နွှဲကြတယ်။စာရင်းတွေအရမြို့ပေါင်း၁၉၀ကျော်ပါဝင်ကြတယ်။စစ်ကောင်စီရဲ့ခြိမ်းခြောက်မှုကြောင့်စျေးတွေဆိုင်တွေဖွင့်ထားကြပေမယ့်ဝယ်သူမရှိတိတ်ဆိတ်ငြိမ်သက်နေတယ်။စစ်ကောင်စီဘက်ကဘယ်လိုပဲဖျက်ဖျက်သူတို့မအောင်မြင်ခဲ့ဘူး။ပြည်သူတွေရဲ့အာဏာရှင်လက်အောက်မှာမနေလိုတဲ့ဆန္ဒကပြင်းပြလွန်းတယ်။
ဒီနေ့မှာပဲအမေရိကန်ကလဲစစ်ကောင်စီရဲ့အပေါင်းအပါတချို့ကိုထပ်ပြီးပိတ်ဆို့အရေးယူလိုက်တယ်။UNသံအမတ်ကတော့စစ်ကောင်စီကိုနေရာပေးချင်တဲ့ပြောဆိုမှုတွေကြောင့်အပြင်းအထန်ဝေဖန်ခံနေရတယ်။ဘာပဲဖြစ်ဖြစ်နောက်နှစ်ဒီလိုအချိန်မှာတော့ဒီကပ်ဆိုးကြီးအောက်ကလွတ်မြောက်ပါစေလို့မျှော်လင့်တယ်။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။