SweetDecemberလို့ခေါ်ကြတဲ့ချိုသောဒီဇင်ဘာလကိုရောက်ရှိလို့လာပါပြီ။မနှစ်ကဒီလိုအချိန်မှာငါးထောင်တန်FoodBoxတွေခေတ်စားခဲ့တယ်။ကျပ်ငါးထောင်ဆိုတဲ့ပမာဏဟာလူတိုင်းအတွက်ဘာမှမဟုတ်ခဲ့ဘူး။ဒီနှစ်တော့ဒီအချိန်မှာငါးရာတန်ထမင်းပွဲတွေခေတ်စားလာတယ်။
လူတွေကတော်တော်များများအလုပ်လက်မဲ့ဖြစ်သွားကြပြီ။ဝင်ငွေမရှိတော့ဘူး။ကမ္ဘာဘဏ်ကတော့၂၀၂၂မှာမြန်မာပြည်သူတဝက်လောက်ဟာဆင်းရဲမွဲတေမှုမျဉ်းအောက်မှာအသက်ရှင်ရလိမ့်မယ်လို့ခန့်မှန်းထားတယ်။လက်တွေ့မြေပြင်မှာလဲအဲ့ဒီအတိုင်းဖြစ်နေပြီ။စားစရာမရှိတော့တာနဲ့အမျှခိုးဆိုးလုယက်မှုတွေပေါလာလိမ့်မယ်။ခုတောင်တချို့နေရာတွေမှာတွေ့နေရပြီ။တရားဥပဒေစိုးမိုးမှုလဲမရှိတော့ဘူးလေ။စစ်ကောင်စီဟာအခုအချိန်မှာရာဇဝတ်မှုတွေကိုစိတ်မဝင်စားတော့ဘူး။သူတို့အာဏာတည်မြဲဖို့ကိုပဲအာရုံစိုက်နေရတယ်။ပြည်သူတွေရဲ့ဘဝဟာစားဖို့လဲပူရ၊ရာဇဝတ်မှုတွေကိုလဲကြောက်ရနဲ့အပူလုံးကြွနေပြီ။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။