မဇ္ဈိမ။ ။ရှမ်းပြည်နယ်မြောက်ပိုင်းတွင် MNDAAနှင့် စစ်ရေးတင်းမာမှုကို နှစ်ဖက်ခေါင်းဆောင်များ တွေ့ဆုံဖြေရှင်းမည်ဟု ရှမ်းပြည်တိုးတက်ရေးပါတီ၊ရှမ်းပြည်တပ်မတော်(SSPP/SSA)က ယနေ့ (မတ်လ ၃၀ ရက်) ထုတ်ပြန်သည်။
ကိုးကန့်တပ်မတော်(MNDAA)နှင့် SSPP သည် ရှမ်းမြောက် လားရှိုးနှင့်သီပေါမြို့နယ်ကြားရှိ နမ့်မကျေးရွာ၌ပစ်ခတ်မှု ဖြစ်ပွားခဲ့ပြီးနောက် စစ်ရေးတင်းမာလာခြင်းဖြစ်သည်။
ဧပြီ ၂၈ ရက်နှင့်၂၉ ရက်တွင် SSPP နှင့် MNDAA တပ်တို့အကြား စစ်ရေးထိတွေ့မှုရှစ်နေရာ၊ နှစ်ဘက်ထိုးကြိတ်မှု ၂၄ နေရာအထိ ရှိခဲ့သည်ဟု SSPPက ထုတ်ပြန်ထားသည်။
ဧပြီလ ၂၈ ရက်ကနမ့်မနှင့် ကုန်ပေါင်းကျေးရွာရှိ SSPP တပ်များဆုတ်ခွာပေးရန် MNDAAက လာရောက်ညှိနှိုင်းရာမှ နှစ်ဘက်တပ်များ ထိုးကြိတ်မှုဖြစ်ပွားခဲ့ပြီး ဧပြီ ၂၉ ရက်တွင် နမ့်မကျေးရွာထဲ ဝင်လာသည့် MNDAAတပ်ဖွဲ့ဝင်များကို SSPP က ပစ်ခတ်ခဲ့သည့်အတွက် နာရီဝက်ကြာ တိုက်ပွဲဖြစ်ခဲ့သည်ဟု ရှမ်းပြည်နယ်မြောက်ပိုင်းသတင်းရင်းမြစ်အချို့ထံမှ သိရသည်။ နှစ်ဖက်ထိခိုက်မှုများရှိခဲ့သည်ဟု စစ်ရေးသတင်းရင်းမြစ်အချို့ကပြောသည်။
MNDAAသည် ၁၀၂၇ စစ်ဆင်ရေး ဒုတိယပိုင်းကာလမှစပြီး SSPP နယ်မြေသို့ ဝင်ရောက်လာခြင်းကြောင့် အောက်ခြေတပ်များအကြား စစ်ရေးတင်းမာမှုများ ဖြစ်ပေါ်လာရသည်ဟု SSPP၏ ယနေ့ထုတ်ပြန်ချက်တွင်ပါရှိသည်။ လတ်တလော အခြေအနေများနှင့်ပတ်သက်၍ MNDAA က သတင်းထုတ်ပြန်ခြင်းမရှိသေးပေ။
MNDAAနှင့် SSPPသည် UWSA၊ NDAA၊ KIA ၊AA၊ TNLA တို့နှင့်ဖွဲ့စည်းထားသော ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ(FPNCC) တွင်ပါဝင်သည်။ရှမ်းပြည်နယ်မြောက်ပိုင်းတွင် ကချင်လွတ်လပ်ရေးတပ်မတော်(KIA)နှင့် တအာင်းအမျိုးသားလွတ်မြောက်ရေးတပ်မတော်(TNLA)၊ KIA နှင့် MNDAA၊ TNLA နှင့် MNDAAတို့ နယ်မြေအငြင်းပွားမှုအချို့လည်းရှိနေသည်။
လတ်တလောတွင် SSPP နှင့် MNDAAသည် သီပေါမြို့နယ်၊ စိန်ကျော့ရွာနှင့် လားရှိုးမြို့နယ်၊ ဟန်နားရွာအနီး၌ စစ်ရေးဆက်လက်တင်းမာနေပြီး ဒေသခံများ ထွက်ပြေးတိမ်းရှောင်နေရကြောင်းသိရသည်။
စာတည်း – အေးချမ်း
