မင်းအောင်လှိုင်၏ နောက်ဆုံးထုတ်ပြန်ခဲ့သော ရွေးကောက်ပွဲဆိုင်ရာ ထုတ်ပြန်ချက်များသည် သတင်းမှားဖြန့်ချိမှု၊ လှည့်ဖြားမှုနှင့် သူ့ကိုယ်သူ တရားဝင်အဖြစ် သတ်မှတ်ရန်အတွက် အချိန်ဝယ်ယူခြင်းသာဖြစ်သည်။ ထိုပြောကြားချက်သည် စစ်အုပ်စုက အမှန်တကယ် ရွေးကောက်ပွဲကျင်းပမည်ဆိုသော တရားဝင် ကြေညာချက်မဟုတ်ပါ။
မင်းအောင်လှိုင်သည် ရုရှားနှင့် ဘီလာရုစ်ခရီးသွားစဉ်တွင် မီဒီယာအသိုင်းအဝိုင်းမှ အထူးဂရုစိုက်မှု (နိုင်ငံတကာမီဒီယာပါဝင်သည်) ကို ခံရမည်ဖြစ်ကြောင်း သိမြင်ခဲ့သည်။ ထိုအခွင့်အရေးကို အသုံးချပြီး သူသည် ရွေးကောက်ပွဲကျင်းပမည်ဆိုသည့် သတင်းမှားကို ထုတ်လွှင့်ခဲ့ခြင်းဖြစ်သည်။ သို့သော် သူ၏စကားကို ဂရုတစိုက်ဆန်းစစ်လျှင်၊ စစ်ကောင်စီက တကယ်ပဲ ရွေးကောက်ပွဲကျင်းပမည် မဟုတ်ကြောင်း တွေ့နိုင်သည်။
သူတကယ် ပြောလိုက်သောအရာမှာ ၂၀၂၅ ခုနှစ်တွင် ရွေးကောက်ပွဲမကျင်းပနိုင်ဘဲ ၂၀၂၅ ဒီဇင်ဘာမှ ၂၀၂၆ ဇန်နဝါရီအထိ နောက်ထပ်ရွှေ့ဆိုင်းလိုက်ခြင်းသာဖြစ်သည်။ ထိုသို့ မပြတ်မစဲ တိကျမှုမရှိသော ပြောဆိုချက်သည် ရွေးကောက်ပွဲရှိမည်ဟု ဆိုခြင်း မဟုတ်ဘဲ “နောက်ထပ်ရွှေ့လိုက်ပါမယ်၊ တချိန်ချိန်မှာတော့လုပ်ပါမယ်” ဆိုသည့် အရိပ်အမြွက်သာဖြစ်သည်။
မင်းအောင်လှိုင်သည် စစ်တပ်ကာကွယ်ရေးဦးစီးချုပ်နှင့် အစိုးရခေါင်းဆောင်ဆိုသည့် အာဏာနှစ်ခုကိုတပြိုင်တည်း လွှတ်ချနိုင်မည် မဟုတ်ပါ။ သူ့တွင် အာဏာတစ်ခုခုလွှတ်လိုက်သည်နှင့် စစ်တပ်မှ သတ်ဖြတ်ခြင်း သို့မဟုတ် ထောင်ချခြင်း ခံရနိုင်သည်။ ထို့ကြောင့် သူ့နေရာတွင် ရှိနိုင်သမျှ ဆက်ရှိရန် ကြံစည်နေသည်။
စစ်ကောင်စီက ရွေးကောက်ပွဲတစ်ခု ဇွတ်အတင်းပြုလုပ်လာလျှင်သော်မှ အလိမ်အညာမဲများ၊ ပြည်သူများအား ဖိအားဖြင့် မဲပေးစေခြင်း၊ တော်လှန်ရေးတိုက်ပွဲများနည်းပါနေသည့် နယ်မြေ အနည်းငယ်အတွင်းသာ မဲပုံး ထောင်ခြင်းနှင့် စစ်တပ်ပံ့ပိုးမှုရှိသော ပါတီများ၊ နိုင်ငံရေးအကျင့်ပျက်လူစုများ၊ စစ်တပ်၏ရုပ်သေးအုပ်စု များသာပါ၀င်မည့် ရွေးကောက်ပွဲတစ်ခုဖြစ်လာမည်။ သို့သော် မင်းအောင်လှိုင်သည်ထိုသို့သော ရွေးကောက်ပွဲမျိုးပင်ခွင့်ပြုနိုင်သည့်အခြေအနေမရှိပေ။
အတုအယောင်ရွေးကောက်ပွဲတခု ဇွတ်ကျင်းပဖန်တီးကာ လွှတ်တော်နှင့် အစိုးရအသစ်တခု ဖန်တီးသွားမည်ဆိုပါက အတုအယောင်သမ္မတ၊ လွှတ်တော်ဥက္ကဋ္ဌစသည့်အာဏာ နှစ်ခုပေါ်လာကာ ထိုအာဏာများကို စစ်တပ်ထိန်းချုပ်ထားမည်ဖြစ်သော်လည်း မင်းအောင်လှိုင်၏ တိုက်ရိုက်ထိန်းချုပ်မှုအောက်တွင်တော့ ရှိမနေနိုင်တော့ပါ။ သူသည် နိုင်ငံတဝန်းလုံးမှ ပြင်းပြင်းထန်ထန် မုန်းတီးခံနေရုံသာမက၊ စစ်တပ်ထဲတွင်ပါ သူ့ကြောင့်ခေါင်းကိုက်မှုများ ရှိနေသည်။ သို့မဟုတ် မင်းအောင်လှိုင်သည် စစ်ဦးစီးချုပ်နှင့် အစိုးရခေါင်းဆောင်အဖြစ်မရှိနေတော့ပါက စစ်တပ်ထဲက သူ့ကို ဖယ်ရှားရန် အခွင့်အရေးရှိလာမည်။
ထို့ကြောင့် သူသည် ရွေးကောက်ပွဲကို စဉ်ဆက်မပြတ်နှောင့်နှေးအောင် လုပ်နေသည်။ မီဒီယာအားဖမ်းစားရန် ရွေးကောက်ပွဲနှင့်ပတ်သက်သော သတင်းများ ထုတ်လွှင့်သည်။ တရုတ်လိုနိုင်ငံတကာက သူ့ကို ဖိအားပေးလာသောအခါသာ ပြောဆိုသည်။ သို့သော် မီဒီယာသတင်းမှတ်ချက်များအသံကုန်သွားသောအခါ၊ ပြန်လည် ပြောဆိုမည်မှာ “ပစ်ခတ်တိုက်ခိုက်မှုများ ရပ်တန့်ရေး” နှင့် “ငြိမ်းချမ်းရေး” ဖြစ်လာမည်။
မင်းအောင်လှိုင်သည် ရုရှားနှင့် ဘီလာရုစ်သို့ သွားခဲ့ခြင်းသည် ရွေးကောက်ပွဲနှင့်ပတ်သက်ခြင်း မဟုတ်ဘဲ၊ စစ်ပွဲအတွက်လက်နက်၀ယ်ရန်၊ အချိန်ဝယ်ရန်သာဖြစ်သည်။ သူသည် ပစ်ခတ်ရေးလက်နက်များ၊ ဒရုန်းများနှင့် စစ်ဆိုင်ရာ အကူအညီများ ရှာဖွေနေသည်။ သူသည် အသစ်သော ငွေကြေးအရင်းအမြစ်များ၊ သစ်တော၊ သယံဇာတများနှင့် စစ်ကောင်စီအတွက်တရားမဝင်ငွေများ ရှာဖွေနေသည်။ မြန်မာလုပ်သားများကို နိုင်ငံခြားပို့၍ စစ်လက်နက်အဖြစ် အသုံးချနိုင်ရန် နည်းလမ်းရှာနေပြီး၊ မြောက်ကိုရီးယားကဲ့သို့ ကျင့်ကြံလာသည်။
ထို့ကြောင့် သူသည် ပြန်လာစဉ် “ရွေးကောက်ပွဲ” အကြောင်း ပြောသည်။ သို့သော် သူ့ရည်ရွယ်ချက်သည် တကယ်လက်တွေ့ကျသော ရွေးကောက်ပွဲကျင်းပခြင်း မဟုတ်ဘဲ သူ၏ စစ်ပွဲကို ဆက်တိုက်နိုင်ရန်အချိန်ဝယ်ခြင်းသာ ဖြစ်သည်။
မင်းအောင်လှိုင်အား ဆက်လက်တော်လှန်တိုက်ခိုက်ရေးကိုဦးတည်လုပ်ဆောင်ရပါမည်။ ရွေးကောက်ပွဲအတုများနှင့် သတင်းမှားများကို အာရုံမစိုက်ပါနှင့်။ စစ်ကောင်စီသည် အချိန်ဝယ်ရန် ကြိုးစားနေသည်။ သူ့စစ်တပ်ကို ထပ်မံတိုးချဲ့ရန်၊ ဒရုန်းများနှင့် လက်နက်များ ရယူရန်၊ တိုက်ပွဲသွားမည့် စစ်သည်များ ထပ်မံစုဆောင်းရန် ကြိုးစားနေသည်။ မင်းအောင်လှိုင်ကို နားချိန်ပေးခြင်းမျိုးသည် မှားယွင်းမည်ဖြစ်မည်။ လွတ်မြောက်ရေးတိုက်ပွဲ၀င်နေသည့် ပြည်သူ့တော်လှန်ရေးကြီးကိုသာ အာရုံစိုက်ကြရန်ဖြစ်သည်။
