စစ်ကောင်စီတပ်သည် မကြာသေးခင်က ရုရှားနှင့် ဘီလာရုစ်နိုင်ငံများမှ အဆင့်မြင့်ဒရုန်းများဝယ်ယူခဲ့ပြီး ဗိုလ်ချုပ်မှူးကြီးမင်းအောင်လှိုင်၏ လူယုံတဦးက အဓိကပတ်သက်နေသည်ကို မဇ္ဈိမ၏စုံစမ်းဖော်ထုတ်မှုအရသိရှိရသည်။
ဧပြီလ ၂၀ ရက်နေ့က UAV ဒရုန်း ၁၅ စင်းနှင့် Drone Guard များ မြန်မာနိုင်ငံသို့ရောက်ရှိလာခဲ့ရာတွင် အဆိုပါဒရုန်းများဝယ်ယူရရှိနိုင်ရေးနှင့် ဒရုန်းတပ်များကွပ်ကဲရေးတွင် ရုရှားပြန် ဗိုလ်မှူးကျော်ဇောရဲက လုပ်ဆောင်လျှက်ရှိသည်။
ဝယ်ယူထားသော UAV ဒရုန်းများသည် ဒရုန်းတား လှိုင်း ဖြတ်စက်ဂျန်မာများကို ကျော်ဖြတ်နိုင်ပြီး ဒေါင်လိုက်တက်ဆင်းလုပ်နိုင်ကာ ပုံသေတောင်ပံ fixed wings များနှင့်ဖြစ်သည်။ Drone Guard ဆိုသည်မှာ တန်ပြန်ဒရုန်းစနစ်ဖြစ်ပြီး ဒရုန်းများ၏ ဆက်သွယ်ရေးဒေတာလင့်ခ်ကို ထောက်လှမ်းခြင်း၊ အမျိုးအစားခွဲခြင်း၊ ခြေရာခံခြင်းများလုပ်နိုင်သည်။
ဒရုန်းတပ်ဖွဲ့များအတွက် တိုက်ရိုက်ကွပ်ကဲမှုကိုတော့ ဗိုလ်မှူးကျော်ဇောရဲ၏တပည့်ရင်းဖြစ်သူ ရုရှားမှပင် ဘွဲ့လွန်ရခဲ့သူ ဗိုလ်ကြီးကျော်မျိုးအောင်က လုပ်ဆောင်နေသည်။
မှော်ဘီအခြေစိုက် အမှတ် (၅) လေကြောင်းရန်ကာကွယ်ရေး စစ်ဆင်ရေးကွပ်ကဲမှုဌာနချုပ်တွင် ဒရုန်းတပ်ဖွဲ့များ တည်ထောင်ဖွဲ့စည်းထားပြီး ဧပြီ ၂၆ ရက်နေ့ကစတင်ကာ သင်တန်းပို့ချပေးနေသည်ဟု DVB သတင်းတရပ်က ပြောသည်။ လစခ (၅)သည် ၎င်း၏တပ်ရင်းများကို ရန်ကုန်တိုင်းဒေသကြီးနှင့် ပဲခူးတိုင်းဒေသကြီးတို့တွင် ဖြန့်ခွဲထားသည်။
ဒရုန်းသင်တန်းသို့ တပ်မ (၁၁)၊ တပ်မ (၆၆) နှင့် တပ်မ (၇၇) လက်အောက်ခံ စစ်ဆင်ရေးတွင်ပါဝင်သော ခြေလျင်၊ ခြေမြန်တပ်ရင်းများမှ အရာရှိနှင့် အခြားအဆင့်စစ်သည်အချို့ကို သင်ကြားပေးနေသည်ဟု ဒီဗီဘီက ပြောသည်။
စစ်တက္ကသိုလ် (DSA) အပတ်စဉ်-၄၇ ဆင်း ဗိုလ်မှူးကျော်ဇောရဲသည် ရုရှားဘာသာစကား ကျွမ်းကျင်သူဖြစ်ကာ ဗိုလ်ချုပ်မှူးကြီးမင်းအောင်လှိုင်အိမ်နှင့် ရုံးသို့ ဝင်ထွက်ခွင့်ရသူ လူယုံအနည်းငယ်ထဲမှ တဦးဖြစ်သည်။ သူသည် သိုသိုဝှက်ဝှက်နေသူဖြစ်ကာ စစ်ကောင်စီအတွက် ဒီဇယ်အပါအဝင် လောင်စာဆီများ စင်္ကာပူ၊ ထိုင်းတို့မှတဆင့် မှောင်ခိုတင်သွင်းမှုကွန်ရက်တွင်လည်း အခရာကျသူဖြစ်သည်။
သူသည် အင်းတိုင်ရှိ တပ်မ (၁၁) အခြေစိုက် စစ်ကောင်စီတပ်၏ သတင်းတု၊ သတင်းမှားထုတ်လုပ်သော ဝါဒဖြန့်ချိရေးအဖွဲ့ကိုလည်း ဦးဆောင်သူဖြစ်သည်။ အဆိုပါအဖွဲ့မှာ တယ်လီဂရမ်အပါအဝင် လူမှုကွန်ရက်မှ စစ်ကောင်စီဆန့်ကျင်သော တော်လှန်ရေးအင်အားစုများနှင့် လူပုဂ္ဂိုလ်များနှင့်ပတ်သက်၍ သတင်းမှားထုတ်လွှင့်ခြင်း၊ သတင်းမီဒီယာများတွင် ကွန်မင့်များရေးသားခြင်းစသည်တို့ကို ကျယ်ကျယ်ပြန့်ပြန်လုပ်ဆောင်နေခဲ့သည်။
အရပ်ဝတ်ဖြင့်နေလေ့ရှိသော သူ၏အကြောင်းကို မဇ္ဈိမက “မင်းအောင်လှိုင်အတွင်းလူ ဝါဒဖြန့်အဖွဲ့ခေါင်းဆောင် ဗိုလ်မှူးကျော်ဇောရဲ” ဟူ၍ စုံစမ်းဖော်ထုတ်ခဲ့ပြီးနောက် လုံခြုံရေးစိုးရိမ်ကာ နေရာပြောင်းအိပ်မှုများပင် ဖြစ်ပေါ်ခဲ့သည်။
