ရွှေစျေးမြင့်တက်မှုနဲ့အတူ ဒေါ်လာစျေးတွေပါဆက်တိုက် မြင့်တက်လာလိုက်တာ အခုဆိုရင် တစ်ဒေါ်လာကို ၄၀၀၀ ကျော်သွားပါပြီ။ ၂၀၂၃ မေလမှာ ဒေါ်လာစျေး ၂၈၄၅ ကျပ်၊ အခု ၄၀၀၀ ကျပ်ဆိုရင် တနှစ်အတွင်း ငွေဖေါင်းပွမှုနှုံး ၄၀% တက်လာတယ်။ ဒီနှုံးအတိုင်းတက်နေရင် ၂၀၂၅ မေလ မှာ ဒေါ်လာစျေး ၆၂၀၀ နဲ့ ၉၀၀၀ ကျပ်ကြားအထိ တက်လာနိုင်တယ်။လက်ရှိ အခြေခံ ဝန်ထမ်းလစာတွေဟာ တလ ဒေါ်လာ ၅၀ လောက်ပဲရှိတော့တယ်။လူတဦးလုပ်အားခ တနေ့ တစ်ဒေါ်လာခွဲသာသာဝင်ငွေပေါ့။ ၂၀၂၅ မှာ တလ ဒေါ်လာ ၃၀ အထိဆင်းသွားမယ်။ တနေ့ စားဖို့ကလွဲရင် ကျန်းမာရေး ပညာရေးအတွက် လူထုဟာ ငွေမသုံးနိုင်တော့ဘူး။ လူတယောက်ရဲ့ဘဝဒုက္ခကို ဝင်ငွေက မထမ်းပေးနိုင်တော့ဘူး။ မွေးထားတဲ့ကလေးတွေ ဘယ်လို ပညာသင်ကြားပေးကြမလဲ။ ဓါတ်မြေဩဇာ၊ စက်သုံး၊ စားသုံးဆီ၊ ဆိုလာ၊ လျှပ်စစ်မီး၊ အိမ်ဆောက်ပစ္စည်း၊ လူမှုအသုံးအဆောင်၊ စစ်အသုံးအဆောင် အကုန်ဒေါ်လာနဲ့ ဝယ်တဲ့အခါ နယ်စပ်ကုန်သွယ်ရေးပျက်၊ စစ်ပွဲတွေဖြစ်နဲ့ဆို ငွေဖေါင်းပွတာဟာ ဆတိုးဖြစ်လာနိုင်တယ်။၂၀၀၀ ခုနှစ်တုန်းက ဇင်ဘာဘွေ၊ ၂၀၁၀ ခုနှစ်က ဗင်နီဇွဲလားတို့ဟာ ဒီလိုအခြေအနေကစတယ်။ ကိုယ့်နိုင်ငံအတွက် အတော်ရင်လေးတယ်။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။