သွင်းကုန်တွေကို ပို့ကုန်ရငွေရှိမှတင်သွင်းခွင့်ပြုမယ့် အစီအစဥ်မှာ အဓိကအရေးကြီးတဲ့ဆေးဝါးတွေလဲ ပါဝင်မှာဖြစ်ပြီး ဆေးဝါးသွင်းကုန် လိုင်စင် စုစုပေါင်းတန်ဖိုး အမေရိကန်ဒေါ်လာ ၁၀၃ ဒသမ ၈၂၂ သန်းကိုလည်း စနစ်သစ်ဖြင့်သာ သွင်းကုန်လိုင်စင် ပြန်လျှောက်ရမယ်တဲ့။ ဆေးဝါးဆိုတာ ပြည်သူတွေအတွက် မရှိမဖြစ်အရာ တစ်ခုပဲလေ။ ဒါကိုပါတင်းကြပ်လိုက်တော့ စျေးကွက်ထဲမှာ ဆေးဝါးတွေပိုမိုပြတ်လတ်လာဖို့ ရှိနေပါပြီ။ အခုတောင် ဆေးဆိုင်တွေမှာ အခြေခံဆေးဝါးကအစ စျေးတွေမတရားတက်နေတာပါ။ ရောဂါအလိုက်သောက်ရတဲ့ ဆေးတွေဆိုရင် ဝယ်လို့တောင်မရတော့ပါဘူး။ နာတာရှည်ရောဂါသည်တွေဆိုရင် ပိုက်ဆံရှိတာတောင် စျေးကွက်ထဲမှာဆေးမရှိလို့ အခက်အခဲတွေကြုံနေရပါတယ်။ ရပ်ကွက်ထဲက တနိုင်တပိုင်ဆေးဆိုင်လေးတွေလဲ ဆေးဝယ်မရလို့ တချို့ဆိုင်တွေပိတ်ကုန်ကျပြီ။ ဒီထက်အခြေအနေဆိုးလာမယ်ဆိုရင် အခြေခံလူတန်းစားတွေရောဂါဖြစ်ရင် ဆေးကုဖို့နေနေသာသာ ဆေးတောင်ဝယ်မသောက်နိုင်လို့ သေရမယ့်ကိန်းဆိုက်နေပါပြီ။
အောက်တိုဘာ ၀၅၊ ၂၀၂၅။ (တနင်္ဂနွေ)
ဒီနှစ်မှာဒေါ်လာစျေးဆက်တိုက်ကျနေတဲ့အဓိကတရားခံကတော့စစ်ကော်မရှင်ကသွင်းကုန်တွေပိတ်ထားလို့ပါပဲ။တနေ့ကprinterတစ်လုံးလိုချင်လို့မြို့ထဲသွားတယ်။မြို့ထဲကကွန်ပြူတာပစ္စည်းဆိုင်နှစ်ဆယ်လောက်ရှာမေးခဲ့ပေမယ့်လိုချင်တဲ့printerရှာမရခဲ့ပါဘူး။ဆိုင်တွေအားလုံးပစ္စည်းပြတ်နေတယ်ပဲပြောကြတယ်။ဘယ်အချိန်ပစ္စည်းပြန်ရမလဲဆိုတာလဲအတိအကျမပြောနိုင်ကြဘူး။အနည်းဆုံးတစ်လကနေလနဲ့ချီပြီးကြာနိုင်တယ်တဲ့။printerဆိုတဲ့ပစ္စည်းမျိုးဟာပုံမှန်ဆိုရင်စျေးကွက်မှာအလွယ်တကူဝယ်လို့ရပါတယ်။ဒီလိုပစ္စည်းမျိုးတောင်စျေးကွက်မှာပစ္စည်းပြတ်နေပါပြီ။ကွန်ပြူတာပစ္စည်းအရောင်းဆိုင်တွေအတော်များများမှာလဲခင်ကျင်းထားတဲ့ပစ္စည်းတွေအရင်လိုပေါပေါများများမတွေ့ရတော့ပါဘူး။စစ်ကော်မရှင်ကပေးတဲ့ဒုက္ခမျိုးစုံကြောင့်ဘယ်စီးပွားရေးလုပ်ငန်းမဆိုအကြပ်အတည်းဆိုက်နေကြတယ်။
