မြဝတီမြို့ကို တော်လှန်ရေးတပ်ပေါင်းစုတွေက သိမ်းပိုက်ဖို့လုပ်လာရင် ပြန်လည်တိုက်ခိုက်သွားရ လိမ့်မယ်လို့ BGF ခေါင်းဆောင်စောချစ်သူက မီဒီယာကနေ တရားဝင်ပြောလာတယ်။ ဒီစကားကို KNU ခေါင်းဆောင်တွေ ဘယ်လိုသဘောထားမှာလဲ။ ဗိုလ်ချစ်သူက သူ့ကိုယ်ကျိုးစီးပွားကို ထိခိုက်လာမယ်ဆို KNU လည်းမသိဘူး တော်လှန်ရေးလည်းမသိဘူး ရင်ဆိုင်တိုက်ခိုက်သွားမယ်လို့ စိန်ခေါ်လိုက်တာပဲ။ KNU ရဲ့ကရင်လူမျိုးအချင်းချင်းမတိုက်ခိုက်ရမူဟာ အလုပ်မဖြစ်ကြောင်းထင်ရှားသွားပါပြီ။ BGF ကိုမတိုက်ရင် KNU ဟာတော်လှန်ရေးကိုဆက်လုပ်လို့မရတော့ပါဘူး။ တနိုင်ငံလုံးမှာရှိတဲ့ နယ်စပ်ဒေသအားလုံးနီးပါးကို တော်လှန်ရေးတပ်ပေါင်းစုတွေက ထိန်းချုပ်ထားပြီး စစ်ကောင်စီကို ဗျူဟာကျကျ ပိတ်ဆို့ထားတဲ့ အချိန်မှာ တောင်ပိုင်းထဲ မြဝတီ ဘုရားသုံးဆူနယ်စပ်ဒေသတွေ အခုထိ ကိုယ့်ဘက်က မထိန်းချုပ်နိုင်သေးတာလည်း တော်လှန်ရေးရင်းမြစ်တွေ အများဆုံးအသုံးပြုထားတဲ့ဒေသတခုအနေနဲ့ဆို နှမျောဖို့ ကောင်းပါတယ်။ တိကျတဲ့နိုင်ငံရေးရည်မှန်းချက်မရှိနေပဲ စစ်ရေးတခုတည်းရှိနေယုံနဲ့ အဲဒီဒေသဟာ ဘယ်တော့မှ စစ်မှန်တဲ့လွတ်မြောက်မှု မရလာနိုင်ဘူးဆိုတာ KNU ခေါင်းဆောင်တွေ ပိုသိမှာပါ။ ဒါကြောင့် KNU ရဲ့ အနာဂတ် ကရင်ပြည်နယ်နဲ့ပတ်သက် နိုင်ငံရေးမျှော်မှန်းကို လူထုကို အသိပေးချိန် တန်လာပြီ ဖြစ်ပါတယ်။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။