ကွမ်းလုံမြို့သိမ်းတိုက်ပွဲအတွင်း စစ်ကောင်စီတပ်ထံမှ သံချပ်ကာယာဉ်များ၊ အမြောက်များနှင့် လက်နက်ခဲယမ်းများစွာသိမ်းဆည်းရရှိခဲ့မှုအပါအဝင် စစ်ဆင်ရေးဆောင်ရွက်မှုများကို ကိုးကန့်တပ်မတော်(MNDAA)က ယနေ့ညပိုင်း၌ ထုတ်ပြန်ခဲ့ပြီး ၁၂ရက်အတွင်း ကွမ်းလုံမြို့ကို သိမ်းပိုက်နိုင်ခဲ့ကြောင်း အသိပေးသည်။
၁၀၂၇ စစ်ဆင်ရေးဆောင်ရွက်ရာတွင် MNDAA သည် မဟာမိတ်တပ်များနှင့်ပူးပေါင်းပြီး ကိုးကန့် ၊ မုံးကိုး ၊ မူပန်(သိန္နီ)စသည့်နေရာရှိ စစ်ကောင်စီ၏ အရေးကြီးတပ်စခန်းများကို အောင်မြင်စွာတိုက်ခိုက် သိမ်းပိုက်နိုင်ခဲ့သည့်အပြင် ချင်းရွှေဟော် ၊ မုံးကိုးနှင့် ကွမ်းလုံစသည့်မြို့နယ်များကိုလည်း ပိုင်ပိုင်နိုင်နိုင်ထိန်းချုပ်နိုင်ခဲ့ကာ အထူးဒေသ(၁)၏ သမိုင်းဝင်အုပ်ချုပ်နယ်မြေများကို ပြန်လည်ထူထောင်နိုင်ခဲ့ကြောင်း ယနေ့ ထုတ်ပြန်ချက်၌ ဖော်ပြသည်။
စစ်ဆင်ရေး အစိတ်အပိုင်းတစ်ခုဖြစ်သည့် ကိုးကန့်ဒေသတောင်ပိုင်း၊ သံလွင်မြစ်အရှေ့ဘက်ခြမ်းရှိ ကွမ်းလုံမြို့လွတ်မြောက်ရေးတိုက်ပွဲကို နိုဝင်ဘာ ၁ရက်တွင် စတင်ဖော်ဆောင်ခဲ့ရာ ကွမ်းလုံတံတားကို ဦးစွာသိမ်းပိုက်ပြီး မြို့တွင်းရှိရန်သူများကို လျင်မြန်စွာသုတ်သင်ရှင်းလင်းကာစစ်ကောင်စီလက်အောက်ခံ ရဲစခန်း ၊ ယာဉ်ထိန်းရဲများနှင့် မြို့နယ်အုပ်ချုပ်ရေးရုံးများကို တိုက်ခိုက်သိမ်းပိုက်နိုင်ခဲ့သည်ဟု အသိပေးသည်။
နိုဝင်ဘာ ၂ရက်တွင် စစ်ကောင်စီတပ်စခန်းတစ်ခုကို ထပ်မံသိမ်းပိုက်ပြီး ကွမ်းလုံမြို့ (သံလွင်မြစ်အရှေ့ဘက်ခြမ်း)ကို ထိန်းချုပ်နိုင်ခဲ့သည်ဟု အသိပေးသည်။ထို့နောက် နိုဝင်ဘာ ၆ရက်တွင် ကိုးကန့်(MNDAA)နှင့်မဟာမိတ်အဖွဲ့တို့သည်သံလွင်မြစ်အနောက်ဘက်ခြမ်း၊ကွမ်းလုံမြို့၏မျက်နှာချင်းဆိုင်ဒေသရှိ စစ်ကောင်စီ၏ ဗျူဟာကုန်း နှင့်တပ်စခန်းများကို စတင်ထိုးစစ်ဆင်ခဲ့ရာ ၆ရက်အကြာ ယနေ့ နံနက် ၁၀နာရီ ၁၅ မိနစ်တွင် အပြီးအပိုင် သိမ်းယူနိုင်ခဲ့သည်ဟု ထုတ်ပြန်သည်။
ယခုအချိန်တွင် ကိုးကန့်(MNDAA)နှင့် မဟာမိတ်အဖွဲ့တို့သည် ကွမ်းလုံမြို့နယ်တစ်ခုလုံးအတွင်းရှိ စစ်ကောင်စီ တပ်ဖွဲ့ဝင်အားလုံးကို ရှင်းလင်းနိုင်ခဲ့ပြီး ကွမ်းလုံမြို့ကို လုံးဝထိန်းချုပ်နိုင်ခဲ့ကြောင်း၊ ထို့ပြင် ကိုးကန့်(MNDAA)နှင့် မဟာမိတ်အဖွဲ့များ၏ ပူးတွဲဆောင်ရွက်မှုတို့ဖြင့် ကွမ်းလုံ- နန်ဟူ – ချင်းရွှေဟော်-တုန်ရှမ်းဒေသတာတုံအထိ နေရာတကြောလုံးကို ပြန်လည်သိမ်းပိုက်ထိန်းချုပ်နိုင်ခဲ့ကြောင်း အသိပေးသည်။ကွမ်းလုံမြို့သိမ်းတိုက်ပွဲအတွင်း ကွမ်းလုံဗျူဟာကုန်း၊ ခမရ (၃၁၂) တပ်စခန်း၊ ကွမ်းလုံရဲစခန်း၊ကွမ်းလုံးတံတားဟောင်း၊ ကွမ်းလုံတံတားသစ်နှင့် စစ်ကောင်စီတပ်စခန်းများအား သိမ်းပိုက်နိုင်ခဲ့မှုကို ဓာတ်ပုံမှတ်တမ်းနှင့်အတူ ဖော်ပြသည်။ထို့ပြင် သံချပ်ကာယာဉ် ၃စီး၊ (၁၂၂) မမ အတွဲလိုက်ဒုံး၊ ၁၂၂ မမ ဟောင်ဝစ်ဇာအမြောက်နှင့် စစ်ကားများစွာ ၊ လက်နက်ခဲယမ်းများစွာ သိမ်းဆည်းရရှိခဲ့မှုကိုလည်း ထုတ်ပြန်ပြသခဲ့သည်။
လွန်ခဲ့သည့်နှစ်ပေါင်း၅၀ကျော်၁၉၇၀ပြည့်နှစ်နောက်ပိုင်းတွင်ဗမာပြည်ကွန်မြူနစ်ပါတီ(ဗကပ)တပ်များက ကွမ်းလုံကို ထိုးစစ်ဆင်တိုက်ခိုက်ခဲ့ရာ ရက်ပေါင်း ၄၀ကျော်ကြာ တိုက်ပွဲဖြစ်ပွားခဲ့သော်လည်း စစ်တပ်စခန်းများ မသိမ်းယူနိုင်ခဲ့ဘဲ ဗကပများအရေးနိမ့်ခဲ့သည်။ ထိုစဉ်ကတည်းက ကွမ်းလုံကို စစ်အစိုးရက ထိန်းချုပ်ခဲ့သည်ဟု ဆိုသည်။
ကွမ်းလုံသည် စစ်ရေးမဟာဗျူဟာအရ အလွန်အရေးကြီးသောကြောင့် မြန်မာတပ်မတော်မှ ၎င်းတပ်စခန်းကို အလွန်ခိုင်မာတဲ့ခံတပ်တစ်ခုအဖြစ် အထူးဂရုပြုတည်ဆောက်ခဲ့ကြောင်း၊ယခုတစ်ကြိမ် ကိုးကန့်(MNDAA)နှင့် မဟာမိတ်အဖွဲ့တို့မှ ကွမ်းလုံဒေသကို ပြန်လည်သိမ်းပိုက်နိုင်ခဲ့သော အောင်မြင်မှုသည် သမိုင်းကြောင်းတွင်အလွန်အရေးကြီးလှသည့်ဖြစ်ရပ်ဖြစ်ကြောင်း MNDAAက ထုတ်ပြန်သည်။
ထို့ပြင် ၁၀၂၇ စစ်ဆင်ရေးကာလအတွင်း အများပြည်သူများကို အန်မတန်အားတက်စေသည့် သတင်းကောင်းဖြစ်ကြောင်းဖော်ပြကာ လက်နက်ကိုင်တော်လှန်ရေးအဖွဲ့အစည်းမှ အာဏာသိမ်းစစ်ကောင်စီတို့အား သိက္ခာကျအောင်၊ အထိနာအောင် လုပ်ဆောင်နိုင်ခဲ့သော လုပ်ရပ်တစ်ခုလည်းဖြစ်ကြောင်း ဖော်ပြထားသည်။
Source-PEOPLE SPRING
