ကရင်နီပြည်နယ်မှာပြည်နယ်ကြားကာလအုပ်ချုပ်ရေးကောင်စီကိုဖွဲ့စည်းပြီးနောက်တစ်ရက်မှာပဲပြည်နယ်အရှေ့ပိုင်းထိုင်းနိုင်ငံနဲ့ကပ်လျက်မယ်စဲ့မြို့နယ်ထဲကမြို့နယ်ရဲစခန်းနဲ့စစ်တပ်အခြေစိုက်စခန်းကုန်းသုံးခုကိုတော်လှန်ရေးအဖွဲ့တွေကတိုက်ခိုက်သိမ်းပိုက်လိုက်တယ်။မယ်စဲ့မြို့နယ်ဘက်မှာအရင်ကတိုက်ပွဲတွေဖြစ်လေ့မရှိပဲအခုမှတော်လှန်ရေးအဖွဲ့တွေကအလစ်အငိုက်တိုက်ခိုက်ခဲ့တာဖြစ်တယ်။တိုက်ခိုက်မှုကြောင့်စစ်တပ်ဘက်ကစခန်းမှုးအပါအဝင်ထိခိုက်သေဆုံးမှုတွေရှိခဲ့တယ်လို့သိရတယ်။တော်လှန်ရေးအဖွဲ့တွေကလက်နက်ခဲယမ်းများစွာသိမ်းပိုက်ရရှိပြီးပြန်လည်ဆုတ်ခွာသွားပြီးနောက်စစ်တပ်လေကြောင်းကရောလက်နက်ကြီးတွေနဲ့ပါရမ်းသမ်းပစ်ခတ်နေတယ်။အခုတော့မယ်စဲ့မြို့နယ်အနီးဖားဆောင်မြို့ပေါ်မှာစစ်တပ်ကအင်အားအများအပြားဖြည့်တင်းထားတယ်။ကရင်နီပြည်နယ်ထဲမှာတော်လှန်ရေးအဖွဲ့တွေကစစ်တပ်ကိုအရူးမီးဝိုင်းအောင်နေရာစုံမှာစစ်မျက်နှာဖွင့်တိုက်ခိုက်လျက်ရှိတယ်။
အောက်တိုဘာ ၀၆၊ ၂၀၂၄။ (တနင်္ဂနွေ)
ဒီရက်ပိုင်းမှာတော့စစ်ကောင်စီဟာအသက်ရှူချောင်နေပါတယ်။စစ်ရေးပိုင်းမှာတရုတ်ဖိအားကြောင့်မြောက်ပိုင်းထိုးစစ်တွေကြီးကြီးမားမားမလုပ်တော့ပဲရပ်တန့်ထားရတယ်။ဒါ့အပြင်ရေဘေးကြောင့်နိုင်ငံရဲ့နေရာဒေသအနှံအပြားမှာလဲတော်လှန်ရေးထက်ကယ်ဆယ်ရေးကိုဦးစားပေးလုပ်နေရတယ်။ နိုင်ငံရေးပိုင်းမှာတော့စစ်ကောင်စီဟာလောလောဆယ်မှာသန်းခေါင်စာရင်းကိုတွန်းကောက်နေတယ်။ပြီးရင်လာမယ့်နှစ်ဒီအချိန်မှာအတုအယောင်ရွေးကောက်ပွဲတစ်ခုပြန်လုပ်ပေးမယ်လို့လေသံပစ်ထားတယ်။ စီးပွားရေးဘက်မှာလဲတရုတ်ကပေးထားတဲ့ယွမ်ငွေတစ်ဘီလီယံကြောင့်လတ်တလောကြုံတွေ့နေရတဲ့ငွေကြေးအကြပ်အတည်းကစစ်ကောင်စီဟာလွတ်မြောက်သွားတယ်။ဒေါ်လာစျေးတွေသိသိသာသာကျလာတယ်။စက်သုံးဆီပြတ်လတ်မှုတွေမရှိသလောက်ဖြစ်သွားတယ်။ဒါပေမယ့်စစ်ကောင်စီပဲအသက်ရှူချောင်တာပါ။သာမာန်ပြည်သူတွေကတော့အရင်အတိုင်းကုန်စျေးနှုန်းကြီးမြင့်မှုတွေနဲ့စီးပွားရေးအကြပ်အတည်းတွေကိုရင်ဆိုင်နေရဆဲပါပဲ။