စစ်ကိုင်းတိုင်း၊ မြောင်မြို့နယ်အတွင်းသို့ စက်တင်ဘာ ၄ ရက် ညပိုင်းက စစ်ကောင်စီတပ်သားများ ရုတ်တရက် ဝင်ရောက်လာခြင်းကြောင့်ကျေးရွာများမှပြည်သူထောင်နှင့်ချီမှာညတွင်းချင်းထွက်ပြေးတိမ်းရှောင်ခဲ့ရကြောင်း မြောင်မြို့နယ် ပြည်သူ့ ကာကွယ်ရေးနှင့် လုံခြုံ ရေးအဖွဲ့ (CDSOM) က သိရသည်။
CDSOM က တာဝန်ရှိသူတဦးက “မနေ့ည ၁၀ နာရီကျော်မှာ ကျော်ရစ်စခန်းက စခတွေ ညစစ်ကြောင်း ထွက်လာလို့ စစ်ကြောင်းဖြတ်သွားနိုင်ခြေရှိတဲ့ တွင်းကြီး၊ မကျည်းဘုတ်၊ တမဆေးကန်၊ ဇရပ်ကုန်း ဒေသခံ ၁၃၀၀ကျော်ကညတွင်းချင်းပြေးလွှားရှောင်တိမ်းနေခဲ့ရတာပါ။အရင်ရက်တွေကရှောင်နေရတဲ့သူတွေကလည်း ၃၀၀၀ ကျော်ရှိပါတယ် ” ဟု ပြောသည်။
စက်တင်ဘာ ၄ ရက် နံနက်ပိုင်းကလည်း ပန်းညိုကျေး ရွာသို့ ရောက်ရှိလာသော စစ်ကြောင်းက နေအိမ်တလုံးနှင့် တဲတလုံးကို မီးရှို့ဖျက်ဆီးခဲ့သလို စစ်ဘေးရှောင် မင်းလှကျေးရွာသား ၅ ဦး၊ ငါးရံ့အိုကျေးရွာမှ အသက် ၁၄ နှစ်အရွယ် လူငယ်တဦး အပါအဝင် ၁၅ ဦးကို စစ် ကြောင်းတလျှောက် အထုပ်များ သယ်ခိုင်းရန်အတွက် ဖမ်းဆီးသွားကြောင်း သိရသည်။
ထို့ပြင် ရွာအတွင်း ဝင်ရောက်၍ ပစ်ခတ်မှုကြောင့် ၁၅ နှစ်အရွယ် အမျိုးသမီးတဦး၏ ကျောသို့ ထိမှန် ဒဏ်ရာရခဲ့သဖြင့် ဆေးဝါးကုသမှုများ ခံယူနေရကြောင်း ဒေသခံသတင်းရင်းမြစ်များက ပြောသည်။
လက်ရှိအချိန်၌ မြောင်မြို့နယ်အတွင်းသို့ သြဂုတ်လကုန်ပိုင်းမှ စတင်ကာ စစ်ကြောင်းထိုးနေခြင်းကြောင့် ပန်းညို၊ ညောင်ကားယား၊ ရွာပုလဲ၊ ဘူးကိုင်း ၊ ဆယ်ရွာ၊ ခေါင်းခွဲ၊ ဆင်မင်း၊ မယ်မသော်၊ သောင်ကြီးကျေးရွာများမှ ပြည်သူ ၆၀၀၀ ကျော်လည်း စစ်ဘေးရှောင်နေကြရကြောင်း သိရသည်။
Source – Irrawaddy
