မေ ၁၄၊ ၂၀၂၂။ (စနေ)

ပြီးခဲ့တဲ့လကတည်းကမြန်မာပြည်ကနိုင်ငံတကာလေဆိပ်တွေကိုကိုဗစ်ရောဂါလျော့ပါးသွားပြီဆိုတဲ့အကြောင်းပြချက်နဲ့စစ်ကောင်စီကပြန်ဖွင့်ပေးလိုက်တယ်။အခုလထဲမှာအလည်အပတ်ဗီဇာကိုပါထုတ်ပေးပြီးနိုင်ငံတကာခရီးသွားတွေကိုဖိတ်ခေါ်ဖို့ကြိုးစားနေတယ်။ဒါပေမယ့်လက်ရှိနိုင်ငံရေးအခြေအနေကြောင့်ဘယ်ခရီးသွားမှမလာကြဘူး။တနိုင်ငံလုံးနီးပါးစစ်ပွဲတွေဖြစ်နေပြီးပြည်တွင်းကပြည်သူတွေတောင်မလုံခြုံတဲ့အနေအထားမှာတိုးရစ်တွေဝင်လာဖို့ဆိုတာအဝေးကြီးမှာပါ။
အလားတူအတင်းအကြပ်ပြန်ဖွင့်ခိုင်းထားတဲ့ရုပ်ရှင်ရုံအတော်များများလဲလူမဝင်လို့ပြန်ပိတ်ကုန်ကြပြီ။ရုပ်ရှင်ကြည့်ရှုသူမရှိသလောက်နည်းပါးနေတယ်လို့သိရတယ်။ကိုယ်တွေဆိုလဲဒီအချိန်မှာသွားမကြည့်ဘူး။ရုံပိုင်ရှင်တွေနဲ့ဇာတ်ကားပိုင်ရှင်တွေကတော့အရှုံးပေါ်ကြတာပေါ့။စစ်ကောင်စီဟာပုံမှန်အခြေအနေပြန်ရောက်နေပြီလို့ပြသဖို့စိတ်ကူးယဉ်နေတုန်းပဲ။