မြန်မာနိုင်ငံဆိုင်ရာ ဂျပန်သံတမန်တွေနဲ့ JICA ဂျပန်ဝန်ထမ်းတွေ နေထိုင်တဲ့ ကွန်ဒိုမီနီ တိုက်ခန်းတွေကို အာဏာသိမ်း စစ်ကောင်စီလက်နက်ကိုင်တပ်ဖွဲ့ဝင်တွေက ပြီးခဲ့တဲ့ ဧပြီလလယ်ပိုင်းလောက်က ဝင်ရောက်စီးနင်းခဲ့ တယ်လို့ ဂျပန်အခြေစိုက် အဆာဟိသတင်းဌာနမှာ ဇူလိုင်လ ၄ ရက်နေ့က ရေးသားထားပါတယ်။
ဂျပန်သံတမန်တွေနဲ့ ဂျပန်အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ (JICA) ဝန်ထမ်းတွေနေထိုင်တဲ့ ရန်ကုန်မြို့လယ်က ကွန်ဒိုမီနီတိုက်ခန်းတစ်ခုကို ပြီးခဲ့တဲ့ ဧပြီလ ၁၇ ရက်နေ့ ညသန်းခေါင်ယံအချိန်မှာ အာဏာသိမ်းစစ်ကောင်စီတပ်က ဝင်ရောက်စီးနင်းခဲ့တာပါ။
အာဏာသိမ်း စစ်ကောင်စီတပ်ဖွဲ့ဝင်တွေဟာ ပိတ်ထားတဲ့ အခန်းတံခါးတွေကို မာစတာကီးနဲ့ သော့ဖျက်ဝင်ရောက်ပြီး ဂျပန်သံတမန်တွေနဲ့ JICA ဝန်ထမ်းတွေကို အတင်းအကျပ်ဖိအားပေးပြီး ဧည့်ခန်းထဲအထိ ဝင်ရောက်ရှာဖွေမှုတွေ ပြုလုပ်ခဲ့တယ်လို့ အဆာဟိသတင်းဌာနက ရေးသားပါတယ်။
ဂျပန်သံတမန်တွေနဲ့ JICA ဝန်ထမ်းတွေရဲ့ တိုက်ခန်းကို ရှာဖွေမှုလုပ်ဖို့ အာဏာသိမ်းစစ်ကောင်စီတပ်တွေက ဝင်ရောက်လာစဉ် ကွန်ဒိုမီနီမှာ တာဝန်ကျနေတဲ့ မြန်မာလူမျိုး ဝန်ထမ်းနှစ်ဦးကိုလည်း ရိုက်နှက်ခဲ့တယ်လို့ ဆိုပါတယ်။
ရှာဖွေမှုအပြီးမှာ ဂျပန် သံတမန်တွေနဲ့ JICA ဝန်ထမ်းတွေကိုတော့ ဂျပန်လူမျိုးမှန်းသိသွားလို့ စစ်ကောင်စီတပ်ဖွဲ့ဝင်တွေက ရိုက်တာနှက်တာ မလုပ်ခဲ့ပါဘူး။
ဂျပန်သံအရာရှိတွေနေထိုင်တဲ့တိုက်ခန်း အခုလို ဝင်ရောက်စီးနင်းခံရတာနဲ့ ပတ်သက်လို့ ဂျပန်နိုင်ငံခြားရေးဝန်ကြီးဌာနက မြန်မာဘက်ကို ဆန့်ကျင်ကန့်ကွက်ကြောင်း ပြောကြားခဲ့တယ်လို့ သိရပါတယ်။
Source – Mizzima News ဂျပန် သံတမန်တွေ နေထိုင်တဲ့ တိုက်ခန်းကို စစ်ကောင်စီ တပ်ဖွဲ့ဝင်တွေ ဝင်ရောက်စီးနင်း | Mizzima Myanmar News and Insight (mizzimaburmese.com)
