စစ်အာဏာရှင်ဆန့်ကျင်ရေး သပိတ်စစ်ကြောင်းများ အားကောင်းရာ မြို့နယ်တစ်ခုဖြစ်သော စမ်းချောင်းတွင် ဖြစ်သည်။ တနင်္လာနေ့ (မတ် ၈) နံနက်စောစောက ဒိုင်းကာများ၊ ဦးထုပ်များ ဆောင်းလျက် ဆန္ဒပြလူငယ်များ ထွက်လာကြသည်။ စစ်အာဏာရှင်ပြုတ်ကျရေး ဆန္ဒထုတ်ဖော်ရန် ထွက်လာကြခြင်းဖြစ်သည်။ ခါတိုင်းနေ့များ နည်းတူ သပိတ်စစ်ကြောင်းထွက်ရန် လူစုကြသည်။
သို့သော် လူငယ်များလမ်းပေါ်ရောက်သည်နှင့် တစ်ပြိုင်နက် စစ်တပ်နှင့် ရဲများက သူတို့ကို လိုက်လံဖမ်းဆီးတော့ သည်။ မျက်ရည်ယိုဗုံးများ၊ ရာဘာကျည်များဖြင့်လည်း ပစ်ခတ်ဖြိုခွင်းလေသည်။ ဆန္ဒပြလူငယ်များလည်း နီးစပ် ရာရပ်ကွက်အတွင်း ဝင်ရောက်ပြေးလွှားရင်း နေအိမ်တိုက်ခန်းပိုင်ရှင်များကို တိုးလျှိုးတောင်းပန်ကာ ပုန်းခိုကြရတော့သည်။
အည်းငယ်ငြိမ်သက်သွားချိန် နေ့လယ်ပိုင်းတွင် စစ်အာဏာရှင် ဆန့်ကျင်ရေး ဆက်လက်ဆန္ဒထုတ်ဖော်နိုင်ရန် အပြင်ပြန်ထွက်လာကြသည်။ စစ်တပ်နှင့် ရဲများကလည်း အလွတ်မပေးဘဲ နောက်တစ်ကြိမ် လိုက်လံဖမ်းဆီး ပြန်သည်။ ဆန္ဒပြလူငယ်များလည်း နောက်တစ်ကြိမ် ဝင်ရောက်ပုန်းခိုကြရပြန်သည်။
ထိုသို့ အကြိမ်းအနည်းငယ်မျှ ထွက်လာလိုက် လိုက်လံဖမ်းဆီးလိုက်ဖြစ်ပွားပြီးနောက် စစ်တပ်နှင့် ရဲများက ကျွန်းတောလမ်းနှင့် ဗဟိုလမ်းကြားရှိ ရပ်ကွက်တစ်ခုလုံးကို ပိတ်ဆို့ထားလိုက်တော့သည်။ လမ်းသွယ်များပါ မကျန် ပိတ်ဆို့ခံလိုက်ရသောအချိန်သည် နေ့ခင်း ၁၂ နာရီ ဝန်းကျင်ခန့်သာ ရှိသေးသည်။ ရာနှင့်ချီသော ပိတ်မိခဲ့သူများတွင် Myanmar Now သတင်းထောက်အချို့လည်း ပါဝင်ခဲ့သည်။ အချို့သောနေအိမ်များတွင် တိုက် ခန်းတစ်ခုတည်း၌ပင် လူ ၅၀ ခန့်ပင် ညပ်သိပ်ကာ ပိတ်မိနေခဲ့သည်။
Source; Myanmar Now
မူရင်း သတင်းအား ဝင်ဖတ်ရန်; https://www.myanmar-now.org/mm/news/6008
